شىرىنبەك قويلىباەۆ. مىرزاتاي جولداسبەكوۆ قىزمەتىنەن قالاي كەتتى؟
ءماجىلىس سايلاۋىنان كەيىنگى كادرلىق ساپىرىلىستاردىڭ سالقىنى قازاقستان رەسپۋبليكاسى پرەزيدەنتتىك مادەنيەت ورتالىعىنا دا ءتيدى.
2012 جىلى قاڭتاردىڭ 24 كۇنى قازاقستان رەسپۋبليكاسى پرەزيدەنتتىك مادەنيەت ورتالىعىنىڭ ديرەكتورى «ءوز ءوتىنىشى بويىنشا» قىزمەتىنەن بوسادى. ءوز ءوتىنىشى بويىنشانى تىرناقشاعا الۋىمىزدىڭ سەبەبى بار. قاڭتاردىڭ 20 كۇنى ءتۇس اۋا، ەكىندىدە بۇرىنعى مادەنيەت ءمينيسترى م. قۇل-مۇحاممەد مىرزاتاي اعانى ءوز كابينەتىنە شاقىرادى. اڭگىمەنى الىستان وراعىتىپ: پرەزيدەنتتىك مادەنيەت ورتالىعى بۇگىندە رۋحانياتىمىزدىڭ التىن بەسىگىنە اينالعانىن، بيىل مىرزەكەڭنىڭ مامىر ايىندا 75 جاسقا تولاتىنىن، ونى اتاپ وتۋگە ءوزى اتسالىساتىنىن، بۇل سەكىلدى اۋىزى دۋالى، ءسوزى ءۋالى اقساقالداردىڭ قوعامىمىزدا از ەكەنى ايتىلادى. وسىلايشا جۇمساق سويلەپ وتىرىپ، جۇمىستان ءوز ەركىمەن كەتۋ تۋرالى ءوتىنىشتى جازدىرتىپ الادى.
سول ءوتىنىشتىڭ سوڭى قازاقستان رەسپۋبليكاسى پرەزيدەنتتىك مادەنيەت ورتالىعىنىڭ 354 قىزمەتكەرىن ءارى-ءسارى كۇيگە ءتۇسىرىپ وتىر.
ويلاماعان جەردەن ورتالىق بازاسىندا «نازارباەۆ ورتالىعى» كوپفۋنكتسيونالدى عىلىمي تالداۋ جانە گۋمانيتارلىق اعارتۋ مەكەمەسىن قۇرۋ جونىندە ەلباسىنىڭ جارلىعى شىقتى. 24 قاڭتار كۇنى ورتالىققا باسشى بولىپ ساۋداباەۆ كەلە قالدى. سونىمەن قىسقاسى، استانانىڭ تورىندەگى پرەزيدەنتتىك مادەنيەت ورتالىعىنىڭ 354 قىزمەتكەرىنىڭ اپام دا اڭ تاڭ، مەن دە اڭ تاڭ بولىپ وتىرعان جاعدايى بار.
ءماجىلىس سايلاۋىنان كەيىنگى كادرلىق ساپىرىلىستاردىڭ سالقىنى قازاقستان رەسپۋبليكاسى پرەزيدەنتتىك مادەنيەت ورتالىعىنا دا ءتيدى.
2012 جىلى قاڭتاردىڭ 24 كۇنى قازاقستان رەسپۋبليكاسى پرەزيدەنتتىك مادەنيەت ورتالىعىنىڭ ديرەكتورى «ءوز ءوتىنىشى بويىنشا» قىزمەتىنەن بوسادى. ءوز ءوتىنىشى بويىنشانى تىرناقشاعا الۋىمىزدىڭ سەبەبى بار. قاڭتاردىڭ 20 كۇنى ءتۇس اۋا، ەكىندىدە بۇرىنعى مادەنيەت ءمينيسترى م. قۇل-مۇحاممەد مىرزاتاي اعانى ءوز كابينەتىنە شاقىرادى. اڭگىمەنى الىستان وراعىتىپ: پرەزيدەنتتىك مادەنيەت ورتالىعى بۇگىندە رۋحانياتىمىزدىڭ التىن بەسىگىنە اينالعانىن، بيىل مىرزەكەڭنىڭ مامىر ايىندا 75 جاسقا تولاتىنىن، ونى اتاپ وتۋگە ءوزى اتسالىساتىنىن، بۇل سەكىلدى اۋىزى دۋالى، ءسوزى ءۋالى اقساقالداردىڭ قوعامىمىزدا از ەكەنى ايتىلادى. وسىلايشا جۇمساق سويلەپ وتىرىپ، جۇمىستان ءوز ەركىمەن كەتۋ تۋرالى ءوتىنىشتى جازدىرتىپ الادى.
سول ءوتىنىشتىڭ سوڭى قازاقستان رەسپۋبليكاسى پرەزيدەنتتىك مادەنيەت ورتالىعىنىڭ 354 قىزمەتكەرىن ءارى-ءسارى كۇيگە ءتۇسىرىپ وتىر.
ويلاماعان جەردەن ورتالىق بازاسىندا «نازارباەۆ ورتالىعى» كوپفۋنكتسيونالدى عىلىمي تالداۋ جانە گۋمانيتارلىق اعارتۋ مەكەمەسىن قۇرۋ جونىندە ەلباسىنىڭ جارلىعى شىقتى. 24 قاڭتار كۇنى ورتالىققا باسشى بولىپ ساۋداباەۆ كەلە قالدى. سونىمەن قىسقاسى، استانانىڭ تورىندەگى پرەزيدەنتتىك مادەنيەت ورتالىعىنىڭ 354 قىزمەتكەرىنىڭ اپام دا اڭ تاڭ، مەن دە اڭ تاڭ بولىپ وتىرعان جاعدايى بار.
«نازارباەۆ ورتالىعى» كوپفۋنكتسيونالدى عىلىمي تالداۋ جانە گۋمانيتارلىق اعارتۋ مەكەمەسىن قۇرۋ ارقىلى رۋحانياتتىڭ التىن بەسىگىنە اينالعان مەكەمەنى تاراتۋ قانداي قاجەتتىلىكتەن تۋىندادى؟ بىزدىڭشە، بۇل - اقوردانىڭ ساۋداباەۆتان قۇتىلۋ ءۇشىن ارنايى اشقان مەكەمەسى مە دەپ ويلايمىز. قانات بەكمىرزاۇلىنىڭ ايتۋىنشا، بۇل مەكەمەنىڭ ماقساتى - ەلباسى ساياساتىن شەت مەملەكەتتەرگە ناسيحاتتاۋ بولاتىن سەكىلدى. بىرىنشىدەن، قازاقستان رەسپۋبليكاسىنىڭ جانە ەلباسى ن.نازارباەۆتىڭ ەل بىرلىگىن تۋ ەتكەن ساياساتىن ناسيحاتتايتىن الەمنىڭ 75 ەلىندە ەلشىلىكتەر مەن وكىلەتتىلىكتەر اشىلعان. ەكىنشىدەن، مۇنداي عىلىمي جۇمىستى شەتەلدىك ماماندارمەن تىعىز جۇمىس جاساپ جاتقان نازارباەۆ ۋنيۆەرسيتەتىنىڭ بازاسىندا جۇرگىزۋگە دە بولاتىن ەدى.
بىزدىڭشە، «نازارباەۆ ۋنيۆەرسيتەتىمەن» قوسا «نازارباەۆ ورتالىعىن» قۇرۋ داعدارىستى توسىپ وتىرعان قازىرگى جاعدايدا، ءارى جاڭاوزەندەگى جاعدايدان كەيىن ەلباسىن حالىققا جەككورىنىشتى كورسەتپەي مە؟ اقورداداعى اقىلشىلار وسىنى نەگە ويلامادى؟
قىستىڭ كوزى قىراۋدا جۇمىسسىز قالعالى وتىرعان پرەزيدەنتتىك مادەنيەت ورتالىعىنىڭ 354 قىزمەتكەرىنىڭ تاعدىرى ءوز الدىنا بولەك اڭگىمە... ورتالىقتىڭ جاڭا باسشىسى ق.ب. ساۋداباەۆ كەلگەن كۇنى 354 قىزمەتكەرگە «ۋۆەدوملەنيا» تاراتىپ، قول قويدىرىپ العاننان باسقا مەكەمەنىڭ بولاشاعى تۋرالى ۇجىممەن سويلەسكەن ەمەس. كۇن ارالاتىپ كابينەتىنە كەلىپ كەتكەنى بولماسا، مۇندا قانداي قۇندى مۇرالار بار دەپ ورتالىق مۋزەيىن ارالاپ تا كورگەن جوق.
سوناۋ كەڭەس وداعىنىڭ ايتقانى بولىپ، اتقانى ءتيىپ تۇرعان زاماندا پروفەسسور بەيسەنباي كەنجەباەۆتىڭ جەتەكشىلىگىمەن 1967 جىلى بايىرعى تۇرك ەسكەرتكىشتەرى تاقىرىبىندا كانديداتتىق ديسسەرتاتسيا قورعاپ، قازاق ادەبيەتىنىڭ تاريحىن 12 عاسىرعا تەرەڭدەتكەن تانىمال تۇركولوگ عالىم، ەلباسى ن.نازارباەۆتىڭ سەنىمدى سەرىكتەرىنىڭ ءبىرى رەتىندە تاۋەلسىز قازاقستان مەملەكەتىن ورناتۋعا «كۇندىز وتىرماي، تۇندە ۇيىقتاماي» ەڭبەك ەتكەن مەملەكەتشىل قايراتكەر مىرزاتاي جولداسبەكوۆ اعامىز ەش نەگىزسىز قىزمەتىنەن الىپ تاستاي سالاتىن تۇلعا ما ەدى؟ باسالقالى ءسوز ايتاتىن، اۋىزى دۋالى، ءسوزى ءۋالى قاريالاردى پايدالانىلعان قالبىرداي لاقتىرىپ تاستاي بەرسەك، ءبىزدىڭ ەلدىگىمىز قايدا، اعا سىيلاعان، اقساقالىن ارداقتاعان كىسىلىگىمىز قايدا؟
وسىلايشا 1986 جىلى دىنمۇحاممەد اقساقال بيۋرودا 18 مينۋتتا ورنىنان الىنسا، مىرزاتاي اعامىز 24 قاڭتار كۇنى 12 مينۋتتا قىزمەتىمەن قوشتاسىپ، «كىتاپ جازۋ ءۇشىن» زەينەتكەرلىكە شىعىپ كەتە باردى.
بارعان جەرىن جاندىرىپ، جانداندىرىپ جىبەرەتىن مىرزاتاي اعامىز 2003 جىلى ەۋرازيا ۇلتتىق ۋنيۆەرسيتەتىنىڭ رەكتورلىعىنان دا «ناشا ساتىلدى» دەگەن جالامەن نەگىزسىز شەتتەتىلگەن بولاتىن.
ات جالىن تارتىپ ەل ىسىنە ارالاسقالى ەلىمىزدىڭ رۋحانيات سالاسىنىڭ دامۋىنا تەر توگىپ كەلە جاتقان مىرزاتاي اعامىزدىڭ باسشىلىعىمەن پرەزيدەنتتىك مادەنيەت ورتالىعىندا قانداي يگىلىكتى شارالار جۇزەگە استى. قىسقاشا توقتالىپ وتەلىك.
مىرزاتاي جولداسبەكۇلى پرەزيدەنتتىك مادەنيەت ورتالىعىن 2006 جىلدىڭ اقپان ايىنان بەرى التى جىلداي باسقاردى. بۇل ورتالىقتىڭ التى جىلدا العان اسۋلارىن العا تارتساق، ەڭ باستىسى - حالىق ۇعىمىندا مۋزەي دەپ عانا اتالاتىن مەكەمە رۋحانياتتىڭ ورداسىنا، التىن بەسىگىنە اينالدى. بۇرىن بار-جوعى بىلىنبەيتىن، «ايدالادا اق وتاۋ، اۋزى مۇرنى جوق وتاۋ» سەكىلدى ورتالىق ەلوردا زيالىلارى مەن جۇرتشىلىعىنىڭ ىزدەپ كەلەتىن، ءجيى باس قوساتىن مادەني وشاعىنا اينالدى.
مۋزەي، كىتاپحانا، عىلىمي زەرتحانا، كونتسەرت زال قىزمەتى مەن «ۇلتتىق داستۇرلەر تەاترى»، «مادەني مۇرا» جۋرنالى سەكىلدى بەس سالادان تۇراتىن ورتالىق جۇمىسى جان-جاقتى جانداندى.
مۋزەي قورى ۇلتتىق قۇندى مۇرالارمەن مولىعا ءتۇستى. بىلتىر ءۇش ءجۇز جىلدىق مەرەيتويى اتاۋسىز قالعان ابىلاي حاننىڭ التىن زەرلى قامقا تونى، قاز داۋىستى قازىبەك ءبيدىڭ شاپانى، بالۋان شولاقتىڭ بەلدىگى، الەمدە انالوگى جوق ساق زامانى مەن تۇرك داۋىرىنە ءتان ەسكەرتكىشتەر ورتالىق مۋزەيگە تەگىن الىنىپ، كورەرمەندەردىڭ كوزايىمىنا اينالدى. ەلىمىزگە كەلگەن شەتەلدىك قوناقتار تاماشالايتىن مەملەكەتتىك مازمۇنى تەرەڭ تاريحي مۋزەي تولىق جۇيەلەنىپ، «جاڭا زاماننىڭ - جاڭا تاريحى»، «ساق زامانى»، «قاسيەت»، «قازاق الەمى» كورمە زالدارى قايتا جاڭعىرتىلىپ، جۇرتشىلىق نازارىنا ۇسىنىلدى.
شىعىس قازاقستانداعى بەرەل قورعانىنان تابىلعان، وسىدان 2500 جىل بۇرىن سالتانات قۇرعان ساق پاتشاسىنىڭ اسىل بۇيىمدارى، باتىس تۇرك قاعاناتىنىڭ عاجاپ ەسكەرتكىشتەرى - ءبارى دە بۇگىندە وسى ورتالىقتىڭ مۋزەيىن بايىتىپ ءارى اجارلاندىرىپ تۇر.
2008 جىلى اقتوبەدە پرەزيدەنتتەر ن.نازارباەۆ پەن د.مەدۆەدەۆ بارىپ اشقان «نۇر عاسىر» مەشىتىنىڭ ماكەتى مۋزەي قورىنا تەگىن الىندى. سول سەكىلدى قازاق سسر-ءنىڭ ەڭبەك سىڭىرگەن ونەر قايراتكەرى، سۋرەتشى توقبولات توعىسباەۆتىڭ قازاقتىڭ كەمەڭگەر بيلەرى - تولە-قازىبەك-ايتەكە پورترەتتەرىنىڭ تريپتيحى جانە قازاق حاندىعى داۋىرىنە قاتىستى اسا قۇندى مۇرا - يتاليان سۋرەتشىسى دجۋزەپپە كاستيلونيدىڭ «قازاقتاردىڭ تسين يمپەراتورىنا سايگۇلىك سىيلاۋى» كارتيناسى نەگىزىندە سالىنعان ونەر تۋىندىسى ورتالىقتىڭ مۋزەي قورىنا سىيعا الىنىپ، حالقىمىزدىڭ رۋحاني قازىناسىنا قوسىلعان قىمبات جادىگەرلەر بولىپ وتىر.
2005 جىلى قازاق قازاق بولعالى ءوز تاريحىندا تۇڭعىش رەت اق وردا اشىلعاندا ەلباسىنىڭ ارنايى شاقىرتۋىمەن مىرزاتاي جولداسبەكوۆ، ءابىش كەكىلباەۆ، اقسەلەۋ سەيدىمبەك سەكىلدى رۋحانيات قايراتكەرلەرى اق وردانى اشىپ، ەلباسىنا باتا بەرگەنى كوپشىلىككە ايان. سول تاريحي وقيعانىڭ كۋاسى رەتىندەگى ەلباسى سىيلاعان ءۇش تاريحي شاپاندى دا ورتالىق مۋزەيىنەن تاماشالاۋعا بولادى. ونىڭ ۇستىنە مىرزاتاي اعامىز ءوزىنىڭ ءومىر بويى جيعان بايلىعى - باي كىتاپحاناسىن دا، شەت ەل باسشىلارى سىيعا تارتقان اسىل، قۇندى مۇلىكتەردى دە ەل، ۇرپاق پايدالانسىن دەپ 2008 جىلى وسى ورتالىققا تەگىن تاپسىرعان بولاتىن.
2007 جىلدان بەرى مۋزەي قورىن قۇندى ەكسپوناتتارمەن تولىقتىرۋعا بيۋدجەتتەن ەشقانداي قاراجات بولىنبەگەنىن ەسكەرسەك، بۇل يگىلىكتى ءىستىڭ ءبارى تەك مىرزاتاي اعامىزدىڭ بەدەل-ابىرويىنىڭ ارقاسىندا جۇزەگە اسقانىن اڭعارۋ قيىن ەمەس.
سونىمەن بىرگە، ورتالىقتىڭ كورمە زالدارى 2009 جىلى قايتا جوندەۋدەن ءوتىپ، اتاقتى قىلقالام شەبەرلەرى: گۋلفايرۋس يسمايلوۆا، ايشا عالىمباەۆا، كاميل مۋللاشەۆ، ەربولات تولەپباي، ءباتيما زاۋىربەكوۆا، ازات اكىمبەكتىڭ كورمەلەرى تابىسپەن وتكىزىلدى. ورتالىق مۋزەيى وسى سالادا شەتەلدىك ارىپتەستەرمەن دە تىعىز بايلانىستا جۇمىس ىستەپ كەلەدى. ورتالىقتا ماسكەۋدەگى «كرەمل» جانە سانكت-پەتەربۋرگتەگى «ەرميتاج» مەملەكەتتىك مۋزەيلەرىنىڭ كوشپەلى كورمەلەرىنىڭ تابىستى ءوتۋى وسىنىڭ ايعاعى. بۇگىنگى تاڭدى بۇل كورمە زالى ءوزىنىڭ سالتاناتى جاعىنان الەمدىك تالاپتارعا جاۋاپ بەرەتىن استاناداعى بىردەن-ءبىر كورمە زالى بولىپ وتىر.
پرەزيدەنتتىك مادەنيەت ورتالىعى سوڭعى ءۇش جىلدا عىلىمي جۇمىسپەن دە تابىستى اينالىسىپ كەلەدى. ورتالىقتا 2007 جىلى قازاق مەملەكەتتىلىگىنىڭ تاريحى جانە تاۋەلسىز قازاقستان مەملەكەتىنىڭ قۇرىلۋ جانە قالىپتاسۋ تاجىريبەسىن سارالاۋ ماقساتىندا عىلىمي زەرتحانا قۇرىلعان بولاتىن.
قازىرگى تاڭدا ەلباسىنىڭ قولداۋىمەن جۇزەگە اسا باستاعان ماڭىزدى جوبالاردىڭ ءبىرى - «قازاقستان رەسپۋبليكاسى. تاۋەلسىزدىك شەجىرەسى» دەرەكنامالىق كوپتومدىقتارىنىڭ 29 كىتابى جارىق كورىپ وتىر.
ورتالىق قازاق مەملەكەتتىلىگى تاريحىن بۇگىنگى زامان تۇرعىسىنان زەرتتەپ، زەردەلەۋ ماقساتىندا سوڭعى ءۇش جىلدا ءۇش ۇلكەن حالىقارالىق كونفەرەنتسيا وتكىزدى.
قازاقستان رەسپۋبليكاسى پرەزيدەنتتىك مادەنيەت ورتالىعى كىتاپحاناسى دا استانا قالاسىنداعى كىتاپ قورىنا باي كىتاپحانالاردىڭ ءبىرى بولىپ سانالادى. كىتاپحاناداعى كىتاپ قورىنىڭ جالپى سانى - 603 000 دانانى قۇرايدى. سيرەك كىتاپتار مەن قولجازبالار قورىنىڭ سانى 3000 دانادان اسادى. ورتالىق كىتاپحاناسى جىل سايىن 8000 وقىرمانعا قىزمەت كورسەتىپ كەلەدى.
ورتالىقتا 2008 جىلى «رۋسسكي مير»، 2010 جىلى «تۇرك دۇنيەسى» كىتاپحانالىق اقپاراتتىق-انىقتامالىق وقۋ زالدارى اشىلدى. بۇل ورتالىقتار ينتەرنەتكە قولجەتىمدى كومپيۋتەرلىك جابدىقتارمەن، سپۋتنيك انتەنناسىمەن، فوتو-اۋديو-بەينە اپپاراتۋرالارىمەن جاراقتانعان. كىتاپ قورىندا سلاۆيان-ورىس جانە تۇرك ادەبيەتى مەن مادەنيەتىنەن مول ماعلۇمات بەرەتىن 2500 ەڭبەك بار.
پرەزيدەنت ن.نازارباەۆتىڭ ورتالىقتا «ۇلتتىق داستۇرلەر تەاترىن» قۇرۋ جونىندەگى 2000 جىلى بەرگەن تاپسىرماسى دا 2006 جىلى جۇزەگە استى. تەاتر ساحناسىنان «ۇلبيكە»، «الپامىس»، «ابىلاي اماناتى»، «بايتەرەك» سپەكتاكلدەرى مەن «قازاق جىرىنىڭ - حان ءتاڭىرى»، «ابايمەن سىرلاسۋ»، «اسەت پەن دانەش»، «بۇلبۇل ەدى، ءدۇلدۇل ەدى كەنەكەڭ» سەكىلدى جۇرتشىلىقتىڭ جۇرەگىنە جول تاپقان شىعارماشىلىق كەشتەر وتكىزىلدى. «بايتەرەك» سپەكتاكلىنىڭ پرەمەراسىنا ەلباسى ن.نازارباەۆ كەلىپ قاتىستى. مۇنىڭ ءبارىن قازاق ءباسپاسوزى كەڭىنەن جازعان بولاتىن.
سونىمەن بىرگە ورتالىقتىڭ كونتسەرت زالىندا مايلىقوجا سۇلتانقوجاۇلى، كەنەن ازىرباەۆ، ءابدىلدا تاجىباەۆ، مىرجاقىپ دۋلاتوۆ، باۋىرجان مومىشۇلى، شىڭعىس ايتماتوۆ، عاريفوللا قۇرمانعاليەۆ، زامزاگۇل ءشارىپوۆا، ولجاس سۇلەيمەنوۆ سەكىلدى ۇلت قايراتكەرلەرىنىڭ ءومىرى مەن شىعارماشىلىعىنا ارنالعان ادەبي-مۋزىكالىق، تاعىلىمدى كەشتەر ءوتتى.
از عانا ۋاقىتتىڭ ىشىندە اتقارىلعان وسىنداي يگىلىكتى جۇمىستاردىڭ ارقاسىندا پرەزيدەنتتىك مادەنيەت ورتالىعى كوپشىلىك كۇتكەندەي، استانامىزدىڭ، وتانىمىزدىڭ شىن مانىندەگى رۋحاني ورداسىنا، رەسمي ىسساپارمەن كەلگەن شەت ەل باسشىلارى تاماشالايتىن بىردەن-ءبىر قاسيەتتى شاڭىراققا، تاربيە ۋنيۆەرسيتەتىنە اينالعان ەدى.
ءبىزدىڭ نازارباەۆ ورتالىعىنىڭ اشىلۋىنا ەش قارسىلىعىمىز جوق، ەلباسى ن.نازارباەۆتىڭ ساليحالى ساياساتىن ناسيحاتتاۋ، حالىققا كەڭىنەن ءتۇسىندىرۋ ەشقاشان كوپتىك ەتپەيتىنى انىق. الايدا، ءبىر ادامنىڭ لاۋازىمى ءۇشىن استانانىڭ تورىندە جۇمىسى جان-جاقتى جولعا قويىلعان «رۋحانياتتىڭ التىن بەسىگىنىڭ» شاڭىراعىن ورتاسىنا ءتۇسىرىپ، 354 قىزمەتكەردىڭ تاعدىرىن تالكەككە اينالدىرۋ ەش اقىلعا سىيمايدى.
2001 جىلى ەلباسىنىڭ ءوز قولىمەن سىزىلىپ سالىنعان، استانانىڭ قازاقىلانۋى مەن ۇلتتىق قۇندىلىقتارىمىزدى دارىپتەۋدە ون جىل بويى ءوزىنىڭ ميسسياسىن اتقارىپ كەلگەن بۇل تاريحي عيماراتتى جاڭا كەلگەن باسشىلىق جەكەشەلەندىرىپ الادى دەگەن دە ءسوز شىعۋدا. مۇنى شەنەۋنىكتەر قالاسىنداعى ونسىز دا شەكەسى قىزىپ تۇرماعان قازاق رۋحانياتىنا، مادەنيەتى مەن ونەرىنە جاسالعان سوراقى سوققى دەپ بىلەمىز.
شىرىنبەك قويلىباەۆ،
قازاقستان رەسپۋبليكاسى
پرەزيدەنتتىك مادەنيەت ورتالىعى
ديرەكتورىنىڭ عىلىم جونىندەگى ورىنباسارى،
فيلولوگيا عىلىمدارىنىڭ كانديداتى
«اباي-اقپارات»
