جۇما, 26 اقپان 2021
1442 1 پىكىر 11 قاڭتار, 2021 ساعات 14:42

جاپاروۆ العاشقى ساپارىن قازاقستاننان باستايدى

قازاقستان پرەزيدەنتى قاسىم-جومارت توقاەۆ قىرعىزستانداعى پرەزيدەنت سايلاۋىندا الدا كەلە جاتقان سادىر جاپاروۆتى "سايلاۋداعى جەڭىسىمەن" قۇتتىقتادى.

پرەزيدەنت سايلاۋىنىڭ تۇپكىلىكتى قورىتىندىسى ءالى شىققان جوق. الدىن الا مالىمەت بويىنشا، جاپاروۆ قارسىلاستارىنان باسىپ وزعان (شامامەن 79 پايىز).

اقوردانىڭ حابارلاۋىنشا، جاپاروۆپەن تەلەفون ارقىلى سويلەسكەن توقاەۆ سايلاۋ ناتيجەسى "قىرعىزستان حالقىنىڭ جاپاروۆ ۇسىنعان مەملەكەتتىلىكتى نىعايتۋ مەن ەلدىڭ الەۋمەتتىك-ەكونوميكالىق تۇراقتىلىعىن دامىتۋ باعدارلاماسىن قولدايتىنىن ايعاقتادى" دەپ اتاپ وتكەن. حابارلامادا توقاەۆتىڭ جاپاروۆتى قازاقستانعا رەسمي ساپارمەن كەلۋگە شاقىرعانى، جاپاروۆتىڭ پرەزيدەنت رەتىندە العاشقى ساپارىن قازاقستاننان باستايتىنى ايتىلعان.

10 قاڭتاردا وتكەن قىرعىزستانداعى پرەزيدەنت سايلاۋىنىڭ الدىن الا ناتيجەسى بويىنشا، سادىر جاپاروۆ 79,24 پايىزبەن الدا كەلەدى. جاپاروۆقا نەگىزگى باقتالاس دەلىنگەن اداحان مادۋماروۆ 6,71 پايىز العان. ءۇشىنشى ورىندا 2,35 پايىز داۋسى بار بابىرجان تولباەۆ تۇر. قالعان 12 ۇمىتكەردىڭ كوبى 1 پايىزدان اسا الماعان.

10 قاڭتاردا قىرعىزستاندا سونىمەن بىرگە مەملەكەتتىك باسقارۋ فورمانى انىقتايتىن رەفەرەندۋم دا وتكەن. ول بويىنشا سادىر جاپاروۆ كومانداسىنىڭ ۇسىنىسى – پرەزيدەنتتىك باسقارۋدى قالايتىندار باسىم تۇسكەن. قاتىسقانداردىڭ 81,27 پايىزى بارلىق بيلىكتى پرەزيدەنت قولىنا تاپسىرۋعا كەلىسكەن. پارلامەنتتىك باسقارۋ فورماسىن قولداعاندار 10,82 پايىز، ەكەۋىنە دە قارسىلار 4,42 پايىز بولعان.

  • بىلتىر 4 قازاندا قىرعىزستاندا وتكەن پارلامەنت سايلاۋىنىڭ قورىتىندىسىمەن كەلىسپەگەن جۇرت كوشەلەردە نارازىلىق وتكىزىپ، مۇنىڭ سوڭى مەملەكەتتىك عيماراتتاردى باسىپ الۋعا، ساياسي داعدارىسقا الىپ كەلگەن. حالىق نارازىلىعىنان سوڭ ۇكىمەت تە، پرەزيدەنت سوورونباي جەەنبەكوۆ تە وتستاۆكاعا كەتكەن.
  • ساياسي قارسىلاسىن ۇرلاپ اكەتكەنى ءۇشىن قاماۋدا وتىرعان سادىر جاپاروۆتى نارازىلىققا شىققان جۇرت 5 قازاندا تۇرمەدەن بوساتقان. كەيىن پارلامەنت مۇشەلەرى ونى پرەمەر-ءمينيستردىڭ مىندەتىن اتقارۋشى ەتىپ تاعايىندادى. جەەنبەكوۆ ورنىنان كەتكەن سوڭ ول پرەزيدەنت مىندەتىن دە قوسا اتقارۋعا كوشكەن. كەيىن ول پرەزيدەنت سايلاۋىنا ءتۇسۋ ءۇشىن ۋاقىتشا پرەزيدەنتتىكتەن باس تارتقان.
  •  ەل باسقارۋ فورماسىن قازىرگى پارلامەنتتىك ۇلگىدەن پرەزيدەنتتىك ۇلگىگە كوشىرۋ ۇسىنىسىن دا سادىر جاپاروۆ ۇسىنعان.

Abai.kz

1 پىكىر