دۇيسەنبى, 1 ناۋرىز 2021
1461 3 پىكىر 14 قاڭتار, 2021 ساعات 11:45

قازاقستاندىق ۆاكتسينا ۋاقىتشا تىركەۋگە الىندى

قازاقستاندىق KazCOVID-in ۆاكتسيناسى 31 جەلتوقساندا ۋاقىتشا تىركەۋگە الىندى. وسىلاي دەپ 13 قاڭتاردا دەنساۋلىق ساقتاۋ مينيسترلىگىنىڭ مەديتسينالىق جانە فارماتسەۆتيكالىق باقىلاۋ كوميتەتى توراعاسىنىڭ ورىنباسارى مىندەتىن اتقارۋشى نۇرلىبەك اسىلبەكوۆ مالىمدەدى.

- دەنساۋلىق ساقتاۋ مينيسترلىگى بارلىق ۆاكتسينالاردىڭ قولجەتىمدى بولۋىن قاراستىرىپ جاتىر. قازىر ءوزىمىزدىڭ وتاندىق ۆاكتسينا مەن "سپۋتنيك V" ۆاكتسيناسىنا دايىندىق جەتكىلىكتى. KazCOVID-in ۆاكتسيناسى ۋاقىتشا تىركەۋگە الىندى. 31 جەلتوقساندا 9 ايعا تىركەدى، - دەدى اسىلبەكوۆ.

ول سونىمەن بىرگە حالىققا جاپپاي ەكپە جۇرگىزۋگە دايىندىق ءجۇرىپ جاتقانىن جەتكىزدى. ونىڭ سوزىنشە، "سك-فارماتسيا" ۆاكتسينالاردى ساقتايتىن ءتورت ورىن دايىنداپ قويعان. سونىمەن بىرگە ەكپەلەردى ايماققا جەتكىزۋ، ساقتاۋ ماسەلەلەرى دە تالقىلانىپ جاتىر.

شەنەۋنىك Pfizer جانە Moderna ۆاكتسيناسىنا قاتىستى شەتەلدىك ارىپتەستەرىمەن سويلەسكەنىن دە ايتتى. ولاردى ەلگە شاقىرىپ جاتىرمىز دەيدى.

رەسەيلىك "سپۋتنيك V" ۆاكتسيناسىنا قاتىستى ەگەر سىناق ناتيجەلەرى جاقسى بولسا، اقپان ايىندا ەلگە جەتكىزىلە باستايدى دەدى.

قازىر باتىستا ەڭ تانىمال ءۇش ۆاكتسينا - Pfizer/BioNTech, Moderna جانە وكسفوردتىق AstraZeneca. Pfizer/BioNTech جانە Moderna ۆاكتسيناسى سىناق ناتيجەلەرى بويىنشا 90 پروتسەنت، AstraZeneca ۆاكتسيناسى 70 پروتسەنت تيىمدىلىگىن كورسەتتى. قىتايدا جاسالىنعان Sinopharm ۆاكتسيناسى بولسا 79 پروتسەنت وڭ ناتيجە بەرگەن.

قازاقستان بيلىگى قازىر ەڭ ءتيىمدىسى وتاندىق ۆاكتسينا دەپ ەسەپتەيدى.

11 قاڭتاردا ءۇش مىڭ ەرىكتىگە وتاندىق ۆاكتسينانى سالۋ اياقتالعان. قازىر ولار دارىگەرلەردىڭ باقىلاۋىندا.

Abai.kz

3 پىكىر