ناۆالنىيدىڭ ۇستىنەن قىلمىستىق جازانى اتقارۋ فەدەرالدىق قىزمەتى (فسين) شاعىم ءتۇسىرىپ، سوتتان ناۆالنىيدىڭ «يۆ روشە» ءىسى بويىنشا ءۇش جارىم جىلدىق شارتتى جازاسىن تۇرمە جازاسىنا اۋىستىرۋدى سۇراعان (ساياساتكەر 2014 جىلى «يۆ روشە» كومپانياسىنان اقشا جىمقىردى دەپ 3,5 جىلعا شارتتى جازا العان ەدى).
قىلمىستىق جازانى اتقارۋ فەدەرالدىق قىزمەتى ناۆالنىي ءۇش جارىم جىلدىق شارتتى جازا اياسىندا «پوليتسياعا كەلىپ بەلگىلەنۋ شارتىن بۇزدى» دەپ ايىپتادى.
سوتتا ناۆالنىي بەرليندەگى اۋرۋحانادا ەمدەلىپ جاتقاندىقتان «پوليتسياعا كەلە الماعانىن» ايتتى.
«كومادا جاتتىم، دەنساۋلىق جاعدايىم مەن جاتقان جەرىم جايلى بارلىق قۇجاتتى جىبەردىم. كەيىن ۇشاقپەن رەسەيگە كەلدىم. تاعى نە ىستەۋىم كەرەك ەدى؟ ۇيىمە كەلگەندە بولمادى دەيسىزدەر. ارينە، ۇيدە بولمادىم. تاعى نە ىستەي الامىن؟»، دەدى ناۆالنىي سوتتا.
وپپوزيتسيونەردىڭ بۇل سوزىنە فسين وكىلى «ۆەدومستۆو سايتىندا كورسەتىلگەن تەلەفونعا حابارلاسۋ كەرەك ەدى»، دەپ جاۋاپ بەردى.
سوتتاعى ءۇزىلىس كەزىندە ناۆالنىي «بۇعان بۋنكەردە تۇرىپ جاتقان ءبىر ادامنىڭ جەك كورۋشىلىگى مەن قورقىنىشى سەبەپ»، دەدى.
ەكى تاراپ سوت شەشىمىنە شاعىم تۇسىرە الادى.
رەسەيلىك وپپوزيتسيونەردى قازاقستان جۇرتشىلىعى دا كوپتەن بەرى بىلەدى. ءتىپتى ونىڭ ءار قادامىن اڭدىپ، جاڭالىقتارعا قۇلاق ءتۇرىپ وتىر دەۋگە بولادى. ناۆالنىي بىلتىر تامىزدا تومسك قالاسىنان ماسكەۋگە ۇشىپ بارا جاتقاندا جاعدايى كۇرت ناشارلاپ، ومبى قالاسىنداعى اۋرۋحاناعا جەتكىزىلگەننەن باستاپ، قازاقستاندىق باق بۇل ماسەلەگە ءجىتى نازار اۋدارىپ كەلەدى.
كەيىن شۇعىل ومبى ەمحاناسىنا جەتكىزىلگەن ناۆالنىيدىڭ ۋلانعانى بەلگىلى بولدى. ەس-ءتۇسسىز جاتقان ول گەرمانيا بيلىگى جىبەرگەن ارنايى ۇشاقپەن بەرلينگە جەتكىزىلىپ، سول جاقتا بىرنەشە اي ەمدەلدى.
17 قاڭتاردا ول گەرمانيادان رەسەيگە ورالعان ەدى. رەسەي پوليتسياسى ناۆالنىيدى ماسكەۋدەگى شەرەمەتەۆو اۋەجايىنان ۇستاپ اكەتكەن. وسى كۇنى پوليتسيا ناۆالنىيدى كۇتىپ الۋعا كەلگەن جەتپىسكە جۋىق ادامدى ۇستادى.
18 قاڭتاردا ماسكەۋدەگى سوت ناۆالنىيدى 30 كۇنگە قاماۋعا الدى. سوتقا دەيىن ساياساتكەرگە ادۆوكاتى جىبەرىلمەدى. قورعاۋشىلارعا سوت بولاتىنى جايلى وتىرىس باستالار ساتتە حابارلاندى. ناۆالنىي بۇل جايتتى «زاڭسىزدىقتىڭ شەكتەن شىققان ءساتى» دەدى. سوتتا ءىىم وكىلى ناۆالنىي شارتتى جازاسى ءۇشىن پوليتسياعا بىرنەشە رەت بەلگىلەنبەدى دەدى.
ناۆالنىي قاماۋدا وتىرعاندا ول باسقاراتىن «جەمقورلىقپەن كۇرەس قورى» «پۋتين سارايى» اتتى زەرتتەۋىن شىعاردى. اتالعان ۆيدەوماتەريالدا رەسەي پرەزيدەنتى ءپۋتيننىڭ گەلەندجيكتە ءزاۋلىم سارايى بارى ايتىلادى.
23 جانە 31 ناۋرىزدا رەسەيدە مىڭداعان ادام ناۆالنىيدى بوساتۋدى تالاپ ەتىپ نارازىلىققا شىقتى. جۇرت ەلدەگى جەمقورلىققا دا قارسىلىق ءبىلدىردى. 23 قاڭتارداعى ميتينگىدە پوليتسيا ءتورت مىڭ ادامدى، 31 قاڭتاردا 5,3 مىڭ ادامدى ۇستادى.
ەكى ميتينگىدەن كەيىن رەسەي بيلىگى بەلسەندىلەرگە، قۇقىق قورعاۋشىلارعا، وپپوزيتسونەرلەرگە قارسى قىرىقتاي قىلمىستىق ءىس قوزعادى. وسى ءىستىڭ اياسىندا پوليتسيا قىلمىستىق ءىس قوزعالعانداردىڭ ءۇيىن ءتىنتىپ، كەيبىرىن قاماۋعا الدى.
ەۋروپارلامەنت پەن اقش رەسەي بيلىگىنەن ناۆالنىيدى بوساتۋدى تالاپ ەتەدى.
ناۆالنىيعا قاتىستى سوت ۇكىمى شىققاننان كەيىن دە رەسەيدىڭ بىرنەشە قالاسىندا نازىلىق شەرۋى ءوتتى. ماسكەۋ مەن سانكت-پەتەربۋرگتە مىڭداعان ادام كوشەگە شىعىپ، نارازىلىق ءبىلدىردى. بىراق پوليتسيا قىزمەتكەرلەرى نارازىلاردى كۇشپەن تاراتۋعا تىرىستى.
Abai.kz
