نۇر-سۇلتان اكىمدىگى نوسەر كاناليزاتسياسىنىڭ قۇرىلىسى مەن تازالىعىنا ەرەكشە كوڭىل بولەدى. قازىر قالادا 3 ءىرى نوسەر كاناليزاتسياسىنىڭ قۇرىلىسى مەن تازارتۋ قۇرىلىسى جۇرگىزىلۋدە. بۇل تۋرالى ەلوردا اكىمى التاي كولگىنوۆ تۇرعىندارمەن ەسەپتىك كەزدەسۋىندە ايتتى.

«قۇرىلىستىڭ قارقىنىن ەسكەرە وتىرىپ، سونىمەن قاتار، نوسەر كاناليزاتسياسىنىڭ جۇيەسىمەن دە ۋاقتىلى اينالىسىپ وتىرۋ قاجەت. قالاداعى پروبلەمالى ورىنداردىڭ ءبىرى - ب.مومىشۇلى ۋچاسكەسى. وندا نوسەر كاناليزاتسياسىنىڭ ماگيسترالدى كوللەكتورىنىڭ قۇرىلىسىن اياقتايمىز. اتالعان نوسەر كاناليزاتسياسىنىڭ ۇزىندى 500 مەتردى قۇرايدى – باسى داۋىلپاز كوشەسىنەن ەلىم-اي كوشەسىنە دەيىن (ب.مومىشۇلى داڭعىلىن باسىپ وتەدى). بۇل قولدانىستاعى نوسەر كاناليزاتسياسى جەلىسىنىڭ وتكىزۋ قۋاتىن ءبىر جارىم ەسەگە ارتتىرۋعا مۇمكىندىك بەرەدى.

سونداي-اق، «جاستار» ىقشام اۋدانىنداعى (تاشەنوۆ پەن اممان كوشەلەرىنىڭ قيىلىسى) كوللەكتورلارعا رەكونسترۋكتسيا جاساپ، تازارتۋ قۇرىلىسىن جۇرگىزەمىز. بۇرىن بۇل جەر باتپاقتى بولعان. مۇنداعى تازارتۋ قوندىرعىسى  جاۋىن-شاشىن سۋىن ەسىل وزەنىنە تازارتىپ قۇيۋعا مۇمكىندىك بەرەدى. بۇعان دەيىن قالدىق سۋ وزەنگە سول كۇيى قۇيىلىپ، اعىندى سۋدى لايلاپ، قالا ەكولوگياسىنا دا كەرى اسەرىن تيگىزگەن. قۇرىلىستى بيىل اياقتاۋدى جوسپارلاپ وتىرمىز. الايدا سۋدى تازالاۋدىڭ ءبىرىنشى كەزەڭىن وتكەن جىلدىڭ كۇزىندە ىسكە قوسقان بولاتىنبىز»، - دەدى ەلوردا اكىمى التاي كولگىنوۆ.

«جاستار» ىقشام اۋدانىنداعى جاڭا تازارتۋ قوندىرعىسى قۋاتى تاۋلىگىنە 42 مىڭ تەكشە مەتردەن اسادى. بۇل تازارتۋ قوندىرعىسى تاشەنوۆ، باراەۆ، ءۋاليحانوۆ، يمانباەۆا كوشەلەرى مەن رەسپۋبليكا داڭعىلىن سۋ باسۋدان قورعاۋعا مۇمكىندىك بەرەدى. بۇل تازارتۋ قوندىرعىسى جەراستى بولعاندىقتان، ونىڭ ۇستىڭگى جاعىندا اباتتاندىرىلعان گۇل باعىن ورنالاستىرۋ،  كوگالداندىرۋ قاراستىرىلعان.

سونداي-اق، ەلوردا اكىمى التاي كولگىنوۆ «تەلمان» تۇرعىن الابىنداعى ماگيسترالدى كوللەكتور مەن تازارتۋ قوندىرعىسى جۇمىستارىنىڭ  اياقتالعانىن اتاپ ءوتتى. ونىڭ قۋاتى تاۋلىگىنە 36 مىڭ تەكشە مەتردى قۇرايدى. بۇل جوبانى جۇزەگە اسىرۋ «تەلمان» تۇرعىن الابى مەن № 27 كوشە بويىنداعى جانە باسقا دا قۇرىلىسى قارقىندى ءجۇرىپ جاتقان اۋماقتى سۋ باسۋدان قورعاۋعا مۇمكىندىك بەرەدى.

بۇدان بولەك، 2020 جىلى تازارتۋ قۇرىلىستارى «پريگورودنىي» تۇرعىن الابى مەن الاش تاس جولىنىڭ بويىنداعى لوگيستيكالىق اۋدانىندا دا جۇرگىزىلدى. 2019 جىلى «مىڭجىلدىق» اللەياسى اۋماعىنداعى ەكى ۋچاسكەدە نوسەر كاناليزاتسياسىنىڭ ماسەلەسى شەشىلدى.

نوسەر كاناليزاتسياسىنىڭ جۇيەسى توقتاۋسىز جۇمىس ىستەۋى ءۇشىن كوللەكتورلاردى ۇنەمى تازارتۋ جۇمىستارى دا جۇرگىزىلۋدە. تاشەنوۆ كوشەسىنىڭ بويىنان 30 توننا، ارىقتار مەن قۇدىقتان 2,5 مىڭ توننا قوقىس شىعارىلدى. بۇدان بولەك، نوسەر كاناليزاتسيالارىنا زاڭسىز قوقىس تاستاۋدى تەكسەرۋ بويىنشا رەيدتەر دە جۇرگىزىلىپ تۇرادى.

Abai.kz