جۇما, 23 ءساۋىر 2021
ءبىزدىڭ شەنەۋنىك 7136 17 پىكىر 24 اقپان, 2021 ساعات 15:26

ەكەۋى دە كونە بيلىكتىڭ كونە كادرلارى...

وتكەن اپتادا ەكى بىردەي وبلىس اكىمى الەۋمەتتىك جەلىدە قىزۋ تالقىعا ءتۇستى. ول ەكەۋى دە الپىستان اسىپ، جەتپىسكە تاياعان اقساقال اكىمدەر. ەكەۋى دە كونە بيلىكتىڭ كونە كادرلارى. ەكەۋى دە بىرنەشە وبلىستى باسقارىپ، بىرنەشە مينيسترلىكتىڭ كرەسلوسىن توزدىرعان. ەكەۋىنىڭ دە جاسى قارايلاس ء(بىرى 67-دە، ءبىرى 68-دە). 

ەڭ قىزىعى ۇقساستىقتارى كوپ ەكى اكىم ءبىر كۇندە كىشىگىرىم كۇتپەگەن وقيعاعا تاپ بولدى. زەينەت جاسىنان 5 جاس اسىپ كەتەن جامبىل وبلىسىنىڭ اكىمى بەردىبەك ساپارباەۆ 19 اقپاندا ەلگە ەسەپ بەرۋ جينالىسىن وتكىزدى. بەردىبەك مىرزا بيىك مىنبەردە كوسىلە سويلەپ تۇرعاندا تريبۋنادا ءىلۋلى تۇرعان ەلتاڭبا ەدەنگە قۇلاپ ءتۇستى. كوپتى كورگەن كونەكوز اكىم ەلدىكتىڭ سيمۆولى ەلتاڭبانى ەڭكەيىپ العانعا ەرىنگەن بولۋ كەرەك، كومەكشىلەرىنە «الساڭدارشى انانى…»، دەپ جەكىپ تاستاپ، ءسوزىن جالعاي بەردى.

ءدال سول كۇنى جىلى كابينەتتەن شىعىپ، اۋىل ارالاۋعا بەل بۋعان شىعىس قازاقستان وبلىسىنىڭ اكىمى دانيال احمەتوۆتى دە ءسال ىڭعايسىز جاعداي كۇتىپ تۇر ەكەن. سەمەي قالاسىنا قاراستى ابىرالى وڭىرىندەگى قاينار اۋىلىنا بارعان احمەتوۆ ەمحاناداعى ەسىگى سىنعان شكافقا تاپ بولدى. وبلىس اكىمى الگى ەمحانانى ارالاپ ءجۇرىپ، ەسىگى سىنعان شكافتان بولەك، سۋ اقپايتىن قولجۋعىش پەن وزگە دە ەسكىرگەن جيھازداردى كوردى. جەرگىلىكتى باسشىلاردى سىناعان بولدى.

ەندى وسى ەكى وقيعانىڭ قانشا قاتىسى بار دەرسىز؟ ەڭ ۇلكەن بايلانىسى، ەكى اكىمنىڭ الدىندا قۇلاعان ەكى زات ەلدەگى جاعدايدىڭ توزعانىن كورسەتەتىن سەكىلدى. زات توزباسا، ەسكىرمەسە قۇلامايدى عوي. دەمەك، اكىمدەردىڭ كوزىنشە قۇلاپ جاتقان ەلتاڭبا مەن ەسىك مەملەكەتتىك مۇلىكتىڭ قاۋساپ توزعانىن كورسەتەدى. ءتىپتى مال-مۇلىك عانا ەمەس، تۇتاس باسقارۋ جۇيەسىنىڭ ەسكىرگەنى انىق. وعان توزعان زاتتارعا كۋا بولعان قوس زەينەتكەر اكىم دالەل. زەينەت جاسىنان 4-5 جاس اسىپ كەتەن اكىمدەر، پايدالانۋ مەرزىمى اسىپ، سىنا باستاعان جيھازبەن قاتار ەل نازارىنا ىلىگىپ وتىر.

ءسوز سوڭىندا ايتارىمىز، ءبىزدىڭ ەلدە جاسى الپىستان اسسا دا، لاۋازىمدى قىزمەتتەردەن كەتپەيتىن زەينەتكەر كادرلار از ەمەس. ءوزىنىڭ بەرەرى تاۋسىلعان، ەلگە بەرەرى بار جاستارعا جول اشپايتىن سول باسشىلار ەلدىڭ دامۋىنا كوپ پايدا تيگىزە الماسى انىق. سول ءۇشىن دە ەلدىڭ باسقارۋ جۇيەسى ەسكىردى، كادرلارى قارتايدى دەپ ءجيى ايتامىز. بۇرىننان ايتىلىپ كەلە جاتقان وسى سىنداردى وتكەن اپتاداعى ەكى وقيعا ەل ەسىنە قايتا سالدى...

قۋانىش قاپپاس

Abai.kz

17 پىكىر