ەردوعان وتباسى، ايەل قۇقىعىن قوزعايتىن «ستامبۋل كەلىسىمىنەن» شىقتى. تۇركيا بۇل كەلىسىمگە 2011 جىلدىڭ 11 مامىرىندا قول قويعان. ەردوعان بيلىگىنىڭ ءۋاجى بۇل كەلىسىمدە گەندەرلىك تەڭدىك ماسەلەسى كۇماندى ءارى ايەل مەن وتباسى ماسەلەسىندە جاۋاپتى سىرتتان ەمەس، تۇرىكتىڭ مەنتاليتەتى مەن داستۇرىنەن ىزدەۋ قاجەت. لگبت-نى مەڭزەپ تۇر عوي.

وپپوزيتسيا ەردوعانعا قارسى. ايەل قۇقىعىن اياققا تاپتاعان بيلىك دەپ ەردوعاندى سىناپ جاتىر. وپپوزيتسيانىڭ ايتۋىنشا وتباسى، ايەل قۇقىعى ەۆروپالىق ستاندارتتار شەڭبەرىندە شەشىلۋى ءتيىس.

ايتا كەتۋ كەرەك 2021 جىلدىڭ 8 ناۋرىزىندا (الماتىمەن ءبىر ۋاقىتتا) تۇركيادا فەمينيستەر، لگبت وكىلدەرى ۇلكەن ميتينگ وتكىزدى. ميتينگ كەزىندە مەشىتتەردەن شىققان ازان داۋسىنا ىسقىرىپ، ايقايلاپ قارسى دا شىقتى. وپپوزيتسيا بۇل دۇرىس دەيدى. ەردوعان بۇل قاتە دەيدى. ماسەلە وسىندا.
2 كۇن بولدى تۇرىك ليراسى 15%-كە قۇلدىرادى. ەردوعان ورتالىق بانك باسشىسىن اۋىستىردى. تۇركيا وبليگاتسيالارى 10-15% قۇلدىراپ جاتىر. بۇل دا وپپوزيتسيانىڭ ەردوعاندى سىناۋىنا جاقسى سەبەپ. قۇر جىبەرىپ جاتقان جوق.

وعان قارسى ەردوعاننىڭ جاۋابى تومەندەگىدەي:
«ءبىز باتىستىڭ ايتقانىنا مويىنسىنباي، ءوز ساياساتىمىزدى جۇرگىزگەن سايىن تۇركيانى قىسپاققا الۋدا. دوللاردىڭ ەسەبىنەن ءوز مۇددەلەرىنە قارسى ساياسات ۇستانعان كەزدە بىزگە دە وسىنداي قارجىلىق شابۋىلدار جاسالادى» دەگەنگە كەلەدى.

قازىر سوعىسىپ، ەلدى جاۋلاۋدىڭ قاجەتى جوق. باتىس ەلدەرىنىڭ وزگە مەملەكەتتەر ىعىنان شىعا باستاسا ەكونوميكالىق، قارجىلىق قىسپاققا الىپ-اق مويىنداتاتىنى راس. تۇركياعا دا سول جاسالۋدا.
باستىسى حالقى قاي جولدى تاڭدار ەكەن؟ ەردوعانعا قارسى شىعىپ، مۇددەلەرىنەن باس تارتىپ، باتىستىڭ ىعىنا جىعىلادى ما؟ الدە ءوزىنىڭ تاۋەلسىز ساياسات جۇرگىزۋگە ۇمتىلعان باعىتىنان تايماي ما؟ ماسەلە وسىندا.

بۇدان دا قىزىق سۇراق بار. ءبىز كوپۆەكتورلى باعىتتان كەتسەك، وسىنداي قىسىم جاسالسا «ەلىم. وتانىم. قازاعىم» دەيتىن قانشا حالىق قولدايدى؟ الدە سىرتقى كۇشتەردىڭ ىقپالىنا شىداماي مويىنداي سالامىز با؟.. جالپى دايىن با ءبىزدىڭ قوعام مۇنداي گەوساياسي ويىندارعا؟..

باۋىرجان سەرىكباەۆ

Abai.kz