ءماجىلىستىڭ جالپى وتىرىسىندا دەپۋتات جۇلدىز سۇلەيمەنوۆا مەكتەپ وقۋشىلارىنىڭ ساپالى ءبىلىم الۋىنا قولجەتىمدىلىكتى قامتاماسىز ەتۋگە قاتىستى دەپۋتاتتىق ساۋال جولدادى.

دەپۋتاتتىڭ ايتۋىنشا، 2021 جىلدىڭ 25 ناۋرىزىندا جاريالانعان باس مەملەكەتتىك سانيتارلىق دارىگەرىنىڭ قاۋلىسىنا سايكەس، IV توقساندا  تومەن جانە ورتاشا تاۋەكەل ايماقتارىنداعى بالا سانى 300-دەن ءۇش مىڭعا دەيىنگى وقۋشىنى قامتيتىن قالا جانە اۋىل مەكتەپتەرى ارالاس فورماتتا وقىتۋدى جوسپارلاۋدا.

«اتالعان ماسەلە حالىق تىعىز ورنالاسقان وڭتۇستىك ايماقتارىنا عانا ەمەس، ەلورداعا جاقىن ورنالاسقان ورتا مەكتەپتەرگە دە قاتىسى بار ەكەندىگىنە نازارىڭىزدى اۋدارعىمىز كەلەدى. سەبەبى، ءبىر عانا يلينكا اۋىلىندا جوبا قۋاتتىلىعى 1200 وقۋشىعا ارنالعان  ورتا مەكتەپتە بۇگىندە 3 مىڭنان استام بالا وقيتىندىعى ەشكىمگە جاسىرىن ەمەس» - دەدى ج.سۇلەيمەنوۆا.

وسى رەتتە، باس سانيتارلىق دارىگەردىڭ سىنىپتارداعى بالالار سانىن 25 ادامنان اسىرماي، ارالاس فورماتتا وقىتۋ جانە «1 سىنىپ-1 كابينەت» قاعيداتىن ساقتاۋ قاۋلىسىن ورىنداۋ مۇلدەم مۇمكىن ەمەس ەكەندىگىن اتاپ ءوتتى.

سەبەبى، كوپشىلىك ورتا ءبىلىم بەرۋ مەكەمەلەرىندە قالىپتاسقان جاعدايعا سايكەس ءبىر سىنىپتا وقۋشى سانى 35-تەن جوعارى مەكتەپتەر بار. بۇل شارا ءوز كەزەگىندە وسىنداي سىنىپتاردى ەكىگە بولۋگە، سايكەسىنشە مۇعالىم جۇكتەمەسىن ەكى ەسە ارتتىرۋعا الىپ كەلەدى. وقۋ جىلىنىڭ سوڭىندا مۇعالىمنىڭ  جوسپارلانباعان مۇنداي جۇكتەمەسىنە جالاقىنىڭ قانداي قاراجاتتان تولەنۋى ۇلكەن سۇراق.

- مەكتەپتەرگە بۇل ورايدا قوسىمشا قاراجات بولىنەدى مە؟ ەگەر بولىنبەسە، مۇعالىمنىڭ ەڭبەگى، ماڭداي تەر اقىسى قايدان تولەنبەك؟ – دەگەن ماسەلەنى كوتەرگەن دەپۋتات ەگەر سىنىپقا وقۋشى سانىن 25-تەن كوبەيتۋگە شەشىم قابىلدانسا، وندا مەكتەپ ديرەكتورلارى ءوز قالتاسىنان ايىپپۇل تولەۋگە ءماجبۇر. پاندەميا كەزىندە مەكتەپ ديرەكتورلارىنا ايىپپۇل تولەتۋ قانشالىقتى قيسىندى ەكەنىنە نازار اۋداردى.

مىسالى، دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى 2020 جىلدىڭ 1 قىركۇيەگىنەن 2021 جىلدىڭ 26 ناۋرىزىنا دەيىنگى ارالىقتا كارانتين تالاپتارىن ساقتاۋعا بايلانىستى جالپى ءبىلىم بەرەتىن مەكتەپتەردە 1787  تەكسەرۋ، بالاباقشالاردا 104 تەكسەرىس جۇرگىزگەن. وسى نەگىزدە سانيتارلىق-ەپيدەميولوگيالىق نورمالاردى بۇزعانى ءۇشىن مەكتەپ ديرەكتورلارىنا جالپى سومماسى 18 ملن.3 23 مىڭ.تەڭگە جانە بالاباقشالار مەڭگەرۋشىلەرىنە جالپى سومماسى 9 ملن. 309 مىڭ تەڭگە  ايىپپۇل سالىنعان.

ج.سۇلەيمەنوۆا اتاپ وتكەندەي، ديرەكتورلار، مەڭگەرۋشىلەر ءۇشىن اكىمشىلىك ايىپپۇل كولەمى 230 ايلىق ەسەپتىك كورسەتكىشتى نەمەسە 638 940 تەڭگەنى قۇرايدى.  وسى ورايدا، Nur Otan پارتياسى فراكتسياسىنىڭ دەپۋتاتتارى بىرقاتار ۇسىنىستار بەردى. اتاپ ايتقاندا، بىرىنشىدەن، باس سانيتارلىق دارىگەر قاۋلىسىنىڭ تالاپتارىن، سىنىپتارداعى بالالار سانىن 25 ادامنان اسىرماۋ، مۇعالىمدەرگە جالاقى تولەۋ تەتىكتەرى تولىققاندى ءتۇسىندىرىلۋى قاجەت. ەكىنشىدەن،  وقۋشىلاردىڭ ءبىلىم ساپاسىن انىقتاۋ ءۇشىن، جاراتىلىستانۋ-ماتەماتيكالىق جانە قوعامدىق-گۋمانيتارلىق پاندەردەن ىبىراي التىنسارين اتىنداعى ءبىلىم اكادەمياسى، ۇلتتىق تەستىلەۋ ورتالىعىنىڭ ماماندارىمەن بىرلەسىپ، وقۋشىلاردىڭ پاندىك ولقىلىقتارىن، ياعني تۇسىنبەي قالعان كۇردەلى تاقىرىپتاردى قايتالاپ، ورنىن تولتىرۋدىڭ جەكە مارشرۋتىن ازىرلەۋى قاجەت. ءبىلىم جانە عىلىم مينيسترلىگى اۋىل جانە قالا مەكتەپتەرىندەگى ءبىلىم ساپاسىنىڭ الشاقتىعىن ازايتۋ تەتىكتەرىن ويلاستىرۋى ماڭىزدى. ۇشىنشىدەن، ءبىلىم جانە عىلىم مينيسترلىگى اقپارات جانە قوعامدىق دامۋ مينيسترلىگىمەن بىرلەسىپ، ءداستۇرلى جانە ارالاس وقىتۋ فورماتىن ۇيىمداستىرۋ ەرەكشەلىكتەرى، سونىمەن بىرگە وقۋ پروتسەسىنىڭ سانيتارلىق-ەپيدەميولوگيالىق قاۋىپسىزدىگىن قامتاماسىز ەتۋ تەتىكتەرى تۋرالى اتا-انالار ءۇشىن تولىققاندى ءارى كەڭ اۋقىمدى ءتۇسىندىرۋ جۇمىستارىن جۇرگىزۋى قاجەت. تورتىنشىدەن، جەرگىلىكتى اتقارۋشى بيلىك ورگاندارى باس سانيتارلىق دارىگەرلەرمەن بىرلەسىپ، وففلاين نەگىزدە سىنىپقا كەلەتىن 25 وقۋشىنىڭ ناقتى كريتەريلەرىن انىقتاپ،  ايماقتاعى ەپيدەميولوگيالىق جاعدايعا بايلانىستى ءداستۇرلى فورماتتا ءبىلىم بەرۋگە كوشۋگە يكەمدى شەشىم قابىلداۋلارىن ۇسىندى.

Abai.kz