اقش پرەزيدەنتى دجو بايدەن 13 ساۋىردە رەسەي پرەزيدەنتى ۆلاديمير پۋتينمەن تەلەفون ارقىلى سويلەستى. ولار ايماقتىق جانە عالامدىق ماسەلەلەردى تالقىلاپ، قارۋلانۋدى باقىلاۋ جانە قاۋىپسىزدىك ماسەلەلەسىندە تۇراقتىلىقتى ساقتاۋ ءۇشىن ديالوگ جۇرگىزۋگە نيەت بىلدىرگەن.

ەكى ەل باسشىسى سونىمەن بىرگە ستراتەگيالىق قارۋلانۋدى قىسقارتۋ جونىندەگى كەلىسىم مەرزىمىن ۇزارتۋ جونىندە دە سويلەسكەن. بۇل جونىندە اق ءۇيدىڭ رەسمي سايتىندا جازىلعان.

پرەزيدەنت بايدەن اقش ۇلتتىق مۇددەلەرىن قورعاۋ جولىندا رەسەيدىڭ امەريكا سايلاۋىنا ارالاسۋىنا جانە كيبەرشابۋىلىنا قاتال تۇردە جاۋاپ بەرەتىنىن جەتكىزگەن.

اقش پرەزيدەنتى سونىمەن بىرگە ۋكراينانىڭ ەگەمەندىگى مەن ونىڭ تەرريتوريالدىق تۇتاستىعىنىڭ ساقتالۋىن قولدايتىنىن ايتقان. ول رەسەي اسكەرىنىڭ ۋكراينا شەكاراسىنا جاقىن اۋماققا شوعىرلانىپ جاتقانىنا الاڭدايتىنىن دا بىلدىرگەن.

پرەزيدەنت بايدەن اقش رەسەيمەن تۇراقتى قارىم-قاتىناس ورناتقىسى كەلەتىن نيەتىن ءبىلدىرىپ، ءۇشىنشى مەملەكەتتە امەريكا جانە رەسەي ليدەرىنىڭ كەزدەسۋىن وتكىزۋدى ۇسىنعان.

ەكى ەل پرەزيدەنتىنىڭ تەلەفون ارقىلى سويلەسۋى كرمەل سايتىندا دا جاريالاندى. وندا سويلەسۋ امەريكالىق تاراپتىڭ باستاماسى بويىنشا ءوتتى دەلىنگەن. سونىمەن بىرگە دجو بايدەننىڭ رەسەي پرەزيدەنتىنىڭ 22–23 ساۋىردە ۆيدەوكونفەرەنتسيا ارقىلى وتەتىن كليماتتىڭ وزگەرۋىنە بايلانىستى سامميتكە شاقىرۋىن قابىل العانى ايتىلعان.

رەسەي تاراپى دا ءوز كەزەگىندە عالامدىق قاۋىپسىزدىكتى قامتاماسىز ەتۋ ءۇشىن اقش-پەن ديالوگقا دايىن ەكەنىن جەتكىزگەن.

ۋكرايناداعى داعدارىسقا قاتىستى كرەمل مۇنى "ىشكى ماسەلە" دەپ اتاپ وتكەن.

Abai.kz