جۋىردا وتكەن جەر كوميسسياسىنىڭ وتىرىسىندا «ۇلت تاعدىرى» قوزعالىسىنىڭ جەتەكشىسى، كوميسسيا مۇشەسى دوس كوشىم جەر ماسەلەسىنە بايلانىستى ءۇش ماسەلەنى كوتەرىپتى. ءبىز دوس مىرزانىڭ اتالعان جيىندا سويلەگەن ءسوزىن وقىرمان نازارىنا ۇسىنۋدى ءجون كوردىك. 

ءبىرىنشى ماسەلە - ءبىز ءدال الدىڭعى كوميسسيانى قايتا قۇرعان سياقتىمىز. مەنىڭشە، 5 جىلدان كەيىن بۇل ماسەلە پارلامەنتكە بەرىلۋى كەرەك ەدى. پارلامەنت جۇمىسشى توبىن قۇرادى. سولارعا وسى وتىرعان ساراپشىلار، جەر ماماندارى ت.ب ەنۋى كەرەك ەدى.

ەكىنشى ماسەلە - پرەزيدەنتتىڭ جەردىڭ ساتىلماۋى تۋرالى ايتقانى ءبىرىنشى وقىلىمدا ءوتتى دەپ قۋانىپ جاتىر. بىراق، سول قۋانعان پارلامەنت مۇشەلەرى  2015 جىلى 2 قاراشادا جەردى ساتۋ تۋرالى شەشىم شىعارعان ادامدار. بۇل ەكىجۇزدىلىكتىڭ شىڭى.

سوسىن پرەزيدەنت 2016 جىلى حالىقتى كوشەگە شىعارعان ەكى ماسەلەنىڭ ءبىرىنشىسىن ايتپاي، ەكىنشىسىن عانا ايتتى. ءبىرىنشىسى - جەردى ساتۋعا بولمايدى، جەردى جەكەمەنشىككە بەرۋگە بولمايدى دەگەن. ەكىنشىسى - جەردى ۇزاق مەرزىمگە شەت ەلدىك ينۆەستورلارعا جالعا بەرۋگە بولمايدى. پرەزيدەنت سونىڭ تەك ەكىنشىسىن ايتىپ، ءبىرىنشى ماسەلەسى دالادا قالدى.

سوندىقتان ءبىز جەردى جەكە مەنشىككە بەرۋگە بولا ما، بولماي ما، اۋەلى وسى ماسەلەنى شەشىپ الۋىمىز كەرەك.

ءۇشىنشى ماسەلە - گرۋزيادا 80 پايىز، وزبەكستاندا 67 پايىز، تاجىكستاندا 60 پايىز، قىرعىزستاندا 50 پايىز، قازاقستاندا 20 پايىز تۇرعىندار ورىس ءتىلىن بىلمەيدى. سىزدەردىڭ سوزدەرىڭىزدى 20 پايىز قازاقتار تۇسىنبەي وتىر. كىمگە ايتىپ وتىرسىزدار؟ قانداي ماسەلەنى تالداپ جاتىرسىزدار؟ قازاقتىڭ جەرىنىڭ ماسەلەسىن ورىس تىلىندە تالداۋدىڭ ءوزى ۇيات. ەگەر سويلەي الماساڭىزدار سويلەمەي-اق قويىڭىزدار.

Abai.kz