دۇيسەنبى, 17 مامىر 2021
1886 4 پىكىر 19 ءساۋىر, 2021 ساعات 11:48

رەسەي 49 مىڭ قر ازاماتىن (ميگرانت) ەلدەن شىعارماق

رەسەي ايماعىندا زاڭسىز جۇرگەن پوستسوۆەتتىك مەملەكەتتەردىڭ ءبىر ميلليوننان استام ازاماتى 15 ماۋسىمعا دەيىن ەلىنەن شىعىپ كەتۋى كەرەك. بۇل تۋرالى رەسەيدىڭ ىشكى ىستەر ءمينيسترىنىڭ ورىنباسارى الەكساندر گوروۆوي تمد-نىڭ پارلامەنتارالىق اسسامبلەيا وتىرىسىندا مالىمدەدى.

"ەگەر زاڭسىز جۇرگەن ميگرانتتاردى 15 ماۋسىمعا دەيىن ولكەدەن شىعارا الماساق، وندا ولار كۇشپەن دەپورتاتسيالانىپ، ولار ءۇشىن شەكارا جابىق بولۋى مۇمكىن. بۇل بويىنشا ءوز ەلدەرىڭىزدە باق وكىلدەرى مەن بلوگەرلەردىڭ كومەگىمەن اقپاراتتى تاراتساڭىزدار جاقسى بولۋشى ەدى", - دەدى گوروۆوي.

ونىڭ سوزىنشە، بۇگىنگى كۇنى رەسەي اۋماعىندا وزبەكستاننىڭ 332 مىڭ، تاجىكستاننىڭ 247 مىڭ، ۋكراينانىڭ 152 مىڭ، ازەربايجاننىڭ 120 مىڭ، قىرعىزستاننىڭ 115 مىڭ، ارمەنيانىڭ 61 مىڭ، مولدوۆانىڭ 56 مىڭ جانە قازاقستاننىڭ 49 مىڭ ازاماتى زاڭسىز ءجۇر.

وتكەن اپتادا رەسەي پرەزيدەنتىنىڭ ءباسپاسوز حاتشىسى دميتري پەسكوۆ كوروناۆيرۋس پاندەمياسىنان ەلدە ەڭبەك ميگرانتتارى ازايعانىن، ءىرى ءجوبالاردى ىسكە اسىرۋ ءۇشىن جۇمىس كۇشى جەتپەي جاتقانىن مالىمدەگەن.

رەسەيدىڭ ىشكى ىستەر مينيسترلىگىنىڭ مالىمەتىنە سايكەس، 2020 جىلى پاندەمياعا بايلانىستى ولكەدەگى ميگرانتتار سانى ەكى ەسەگە ازايعان.

Abai.kz

4 پىكىر