بۇگىن ءماجىلىستىڭ جالپى وتىرىسىندا دەپۋتات م.رامانقۇلوۆ پرەمەر-ءمينيسترىنىڭ ورىنباسارى  ە.توعجانوۆقا تەحنيكالىق قىزمەتكەرلەردىڭ جالاقىسىنا قاتىستى ماسەلەنى كوتەردى.

دەپۋتاتتىڭ ايتۋىنشا، مەملەكەت الەۋمەتتىك سالاعا ءجىتى نازار اۋدارىپ كەلەدى، بۇل اسىرەسە پاندەميا كەزىندە ايقىن كورىنىس تاپتى. پاندەميا كەزىندە "پەداگوگ مارتەبەسى تۋرالى" زاڭ قابىلدانىپ، دارىگەرلەرگە قوسىمشا تولەمدەر ەنگىزىلدى. جىل سايىن مۇعالىمدەر مەن دارىگەرلەردىڭ جالاقىسى 20-30%-عا ارتىپ كەلەدى، مۇنىڭ ءبارى وتە ورىندى، ءبىز ريزاشىلىعىمىزدى بىلدىرەمىز جانە وسىنداي كوزقاراستى ءاردايىم قولدايمىز.

«اق جول» پارتياسىنا وسى سەكتورلاردىڭ قاتارداعى قىزمەتكەرلەرى، ياعني سانيتارلار، اسسيستەنتتەر، ەدەن جۋشىلار، جەدەل جاردەم جۇرگىزۋشىلەرى، مۇراجاي، ونەر، مەكتەپ، بالاباقشا، كىتاپحانا، مۇراعات سالاسىنداعى وزگە دە قىزمەتكەرلەر ولاردىڭ ارىپتەستەرى ءۇشىن مەملەكەت جىل سايىن جالاقىنى كوبەيتسە، ال سول سالالارداعى تەحنيكالىق قىزمەتكەرلەردىڭ جالاقىسى قاتارىنان كوپتەگەن جىلدار بويى وزگەرىسسىز قالادى دەگەن شاعىمدارمەن ءجيى جۇگىنەدى.

ماسەلەن، ءبىز بۇگىنگى كۇنى «رۋحاني جاڭعىرۋ» باعدارلاماسى تۋرالى ءجيى ايتامىز جانە وسى باعىتتا اشارشىلىق پەن قۋعىن-سۇرگىن قۇرباندارىن اقتاۋ بويىنشا جۇمىستار جالعاسۋدا. بۇل قىزمەتتەگى نەگىزگى جۇكتەمە مۇراعات، مۇراجاي جانە كىتاپحانا قىزمەتكەرلەرىنە، تاريحشىلارعا، ونەرتانۋشىلارعا جانە باسقا دا ماماندارعا جۇكتەلەدى. سونىمەن قاتار، وسى سالاداعى ورتا بۋىن قىزمەتكەرلەرىنىڭ ءتىپتى جوعارى ءبىلىمى بار قىزمەتكەرلەردىڭ ورتاشا جالاقىسى شامامەن 60 مىڭ تەڭگەنى قۇرايدى.

جەدەل جاردەم جۇرگىزۋشىلەرىنىڭ جالاقىسى - شامامەن 70-75 مىڭ تەڭگە جانە 5 جىلدان استام ۋاقىت بويى جوعارىلاعان جوق، مەكتەپتەر مەن بالاباقشالاردىڭ تەحنيكالىق قىزمەتكەرلەرىنىڭ جالاقىسى – شامامەن 50 مىڭ تەڭگە.

مۇنداعى قىزمەتكەرلەردىڭ كوپشىلىگى ءوز جۇمىسىن ادال اتقارادى جانە ونداعان جىلدار بويى وسىلاي جۇمىس ىستەيتىن شىنايى ەنتۋزياستار.

سونىمەن قاتار، ينفلياتسيانىڭ ەكونوميكالىق سيپاتىن ەشكىم جويعان جوق، مەملەكەتتىك ورگاندار تاۋارلار مەن ازىق-تۇلىك باعاسىنىڭ ءوسۋىن ايتپاعاننىڭ وزىندە، تۇرعىن ءۇي كوممۋنالدىق شارۋاشىلىعىنداعى مونوپوليستەردىڭ تاريفتەرىن ۇلعايتۋعا ۇنەمى كەلىسەدى.

ءبىزدىڭ ازاماتتارىمىزدىڭ بۇل ساناتى ءتىپتى يپوتەكا بويىنشا تۇرعىن ۇيگە قول جەتكىزە المايدى جانە ونداعان جىلدار بويى جالدامالى پاتەرلەردە تۇرادى. جالاقىلارىنا دۇرىس كيىنە المايدى، بالالارىن اسىراي المايدى، كۇندەلىكتى ماسەلەلەردى شەشە المايدى.

الايدا بۇل ازاماتتار ءبىزدىڭ مەملەكەت رەتىندە جاۋاپ بەرەتىن ماماندارىمىز ەمەس پە؟!

وسىنداي جالاقىعا قالاي ءومير ءسۇرسىن ؟

ءبىز تەحنيكالىق كادرلاردىڭ الەۋمەتتىك سالاداعى، ياعني ءبىلىم بەرۋ، دەنساۋلىق ساقتاۋ جۇيەسىندەگى، مادەنيەتتەگى مۇددەلەرىن قورعاۋ ماسەلەسى مەملەكەت نازارىنان تىس قالدى دەپ سانايمىز.

وسىعان بايلانىستى «اق جول» فراكتسياسى الەۋمەتتىك سالاداعى جالاقىنى كوتەرۋ كەزىندە ءبىر مەزگىلدە تەحنيكالىق قىزمەتكەرلەردىڭ ەڭبەكاقىسىن كوتەرۋ قاجەت دەپ ەسەپتەيدى.

ەگەر دارىگەرگە سكالپەل نەمەسە قىسقىش بەرەتىن ەشكىم بولماسا نەمەسە وتتەگى اپپاراتى جۇمىس ىستەمەسە، بىردە-ءبىر دارىگەر وتا جاساي المايدى.

ەگەر مەكتەپتىڭ وت جاعۋشىسى جۇمىسقا شىقپاسا جانە مەكتەپتىڭ اعاش ۇستاسى سىنعان تەرەزەنى الماستىرماسا، مۇعالىم سۋىق سىنىپتا ساباق وتكىزە المايدى.

ەگەر ساحنا جۇمىسشىلارى اپپاراتۋرا مەن دەكوراتسيالاردى ورناتپاسا، ەشبىر ەڭبەك سىڭىرگەن ءارتىس ونەر كورسەتە المايدى.

ەگەر مۇراعات قىزمەتكەرلەرى توننا قۇجاتتاردى مۇقيات اينالدىرا الماسا، قۋعىن-سۇرگىن قۇرباندارىن اقتاۋ بولمايدى.

سوندىقتان ءبىز الەۋمەتتىك سالانىڭ كومەكشى جانە تەحنيكالىق قىزمەتكەرلەرىنە قاتىستى ادىلەتتىلىك تانىتۋدى، جالاقىنى كوتەرۋ كەزىندە ولاردى نازاردان تىس قالدىرماۋدى سۇرايمىز.

نەلىكتەن ءبىزدىڭ وسى سالاداعى ماماندارىمىز قينالۋ كەرەك، ولاردىڭ دا كوپتەگەن پروبلەمالارى بار ەمەس پە، ولار دا ءبىزدىڭ مەملەكەتىمىزدىڭ ازاماتتارى عوي؟!  مەنىڭ بىلۋىمشە، وسى ازاماتتاردىڭ 90 پايىزىنىڭ شاعىن نەسيەلەرى بار، قارىزعا بەلشەسىنەن باتقان، شىعارماشىلىق تۋىندىلارىن شىعارۋعا قاراجاتى جوق، ۇكىمەت تاراپىنان ناقتى كومەك تە جوق.

اتالعان فاكتورلار الەۋمەتتىك «جارىلىسقا» ۇلاسۋى مۇمكىن الەۋمەتتىك شيەلەنىستى كۇشەيتە تۇسەدى.

مەملەكەتتىڭ ىشكى ساياساتى ۇلتتىڭ رۋحاني تاربيەسىن دامىتۋعا باعىتتالۋعا ءتيىس.  مەديتسينا جانە مادەنيەت پەن ءبىلىمi جوق ۇلتتىڭ – كەلەشەگى دە جوق.

جوعارىدا ايتىلعاندارعا بايلانىستى، «اق جول» قدپ دەپۋتاتتىق فراكتسياسى ايتىلعان ماسەلەگە نازار اۋدارۋدى قاجەت دەپ ەسەپتەيدى جانە اتالعان ساناتتاعى قىزمەتكەرلەردى لايىقتى تابىس دەڭگەيىمەن قامتاماسىز ەتۋ مۇمكىندىگىن قاراۋىڭىزدى سۇرايدى.

Abai.kz