جەتىسۋ وبلىسىندا مەملەكەتتىك رامىزدەر كۇنى سالتاناتتى تۇردە اتالىپ ءوتتى. نەگىزگى شارا رەتىندەگى تاۋەلسىزدىكتىڭ 35 جىلدىعىنا وراي «35 اۋىل – 35 تۋ تۇعىرى» پاتريوتتىق اكتسياسى اياسىندا اۋدان-قالالارداعى 35 ەلدى مەكەندە ءبىر مەزەتتە تەلەكوپىر بايلانىسى ارقىلى 35 جاڭا تۋ تۇعىرى اشىلىپ، تۋ كوتەرىلدى. بۇل تۋ تۇعىرلارى جەرگىلىكتى مەتسەناتتار مەن كاسىپكەرلەردىڭ قولداۋىمەن ورناتىلدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

وبلىس كولەمىندە كەڭىنەن اتاپ وتىلگەن پاتريوتتىق ءىس-شارالارعا جالپى سانى 3,5 مىڭعا جۋىق ادام قاتىستى، ونىڭ مىڭنان استامى وبلىس ورتالىعىندا جينالدى.

تالدىقورعان قالاسىنداعى «جاستار» ساياباعى الاڭىندا بيىكتىگى 92 مەترلىك تۋ تۇعىرىندا ورناتىلعان مەملەكەتتىك تۋدى كوتەرۋ سالتاناتى ءوتتى.

مەرەكەلىك شاراعا جەتىسۋ وبلىسىنىڭ اكىمى بەيبىت يساباەۆ، ءماسليحات دەپۋتاتتارى، ارداگەرلەر، مەملەكەتتىك قىزمەتشىلەر، زيالى قاۋىم وكىلدەرى، قۇقىق قورعاۋ ورگاندارىنىڭ قىزمەتكەرلەرى، اسكەري قىزمەتشىلەر، سپورتشىلار، جاستار، قالا تۇرعىندارى قاتىستى.

مەملەكەتتىك تۋ كوتەرىلگەن ساتتە تالدىقورعان اسكەري گارنيزونىنىڭ ۇرمەلى وركەسترىنىڭ سۇيەمەلدەۋىمەن كامەرالىق حور مەن وبلىستىق فيلارمونيا ارتىستەرى قازاقستان رەسپۋبليكاسىنىڭ ءانۇرانىن ورىندادى. سونىمەن قاتار جەرگىلىكتى شىعارماشىلىق ۇجىمداردىڭ ورىنداۋىندا پاتريوتتىق اندەر شىرقالدى.

جالپى، تالدىقورعانداعى تۋ تۇعىرىنىڭ بيىكتىگى كەزدەيسوق تاڭدالماعان. ونىڭ 92 مەتر بولۋى - تاۋەلسىز قازاقستاننىڭ مەملەكەتتىك رامىزدەرى بەكىتىلگەن 1992 جىلدىڭ سيمۆولدىق بەلگىسى. مەملەكەتتىك تۋدىڭ ۇزىندىعى – 25 مەتر، ەنى – 12 مەتر. كومپوزيتسيانىڭ تۇعىر بولىگىندە قازاقستان كارتاسى بەينەلەنگەن. تۋ تۇعىرى مەملەكەتتىك تۋدى اۆتوماتتى تۇردە كوتەرۋگە ارنالعان ارنايى مەحانيزممەن جابدىقتالعان بولات كونسترۋكتسيادان تۇرادى. ونىڭ جانىندا سالتاناتتى ءىس-شارالاردى وتكىزۋگە ارنالعان امفيتەاتر ورنالاسقان.

پاتريوتتىق اكتسياعا قاتىسقان ءوڭىردىڭ اۋدان-قالالارىنىڭ تۇرعىندارى بۇل باستامانىڭ ماڭىزدىلىعىن اتاپ ءوتىپ، پىكىرلەرىن ءبىلدىردى.

- مەملەكەتتىك رامىزدەر – بىزگە اتا-بابامىزدان جەتكەن مۇرا ءارى ءبىزدىڭ باستى قۇندىلىعىمىز. مەملەكەتتىك تۋلاردىڭ ءبىر مەزەتتە كوتەرىلگەنىن كورۋ وتە اسەرلى بولدى، - دەدى تالدىقورعان قالاسىنداعى № 18 مەكتەپ-ليتسەيىنىڭ وقۋشىسى اققوجا ءنۇرالى.

- مەن «جاسىل ەل» جاستار ەكولوگيالىق قوزعالىسىنىڭ مۇشەسىمىن. بۇگىن مەملەكەتتىك رامىزدەر كۇنىنە ارنالعان شاراعا قاتىسۋعا كەلدىم. بۇل مەرەكەنىڭ ءبىز ءۇشىن ماڭىزى زور. ويتكەنى رامىزدەر - ءبىزدى تاريحىمىزدى قادىرلەۋگە، وتانعا دەگەن سۇيىسپەنشىلىكتى ەسەلەۋگە ۇيرەتەتىن ەلىمىزدىڭ سيمۆولى، - دەدى تالدىقورعانداعى № 12 مەكتەپ-گيمنازيانىڭ وقۋشىسى، ۆولونتەر اياۋلىم اسحاتقىزى.

- بۇگىن - ءبىزدىڭ اۋدانىمىز ءۇشىن ەرەكشە كۇن. مەملەكەتتىك رامىزدەر كۇنىندە اۋىلىمىزعا تۋ تۇعىرى ورناتىلدى. بۇل تۋ تۇعىرى اۋىلعا كىرە بەرىس جەردەگى مادەنيەت ءۇيى مەن سپورت كەشەنى ورنالاسقان ورتالىققا قويىلدى. تۋدىڭ كۇندە جەلبىرەپ تۇرعانىن كورۋ بولاشاق چەمپيوندارعا، ونرپازدارعا، جالپى اۋىل حالقىنا ۇلكەن شابىت بەرىپ، ماقساتتارىنا جەتۋگە تالپىندىرادى دەپ ويلايمىن، - دەدى قاراتال اۋدانى ەسكەلدى بي اۋىلىنىڭ تۇرعىنى مۇرات بەرىكبولۇلى.

- بۇگىن ءبىزدىڭ اۋىلدا جاڭا تۋ تۇعىرىنان مەملەكەتتىك تۋ كوتەرىلدى. رامىزدەردى ناسيحاتتاۋدىڭ ۇرپاقتى تاربيەلەۋدەگى ءرولى ۇلكەن. سوندىقتان اۋىلىمىزدا وسىنداي ماڭىزدى ورىن اشىلعانىنان قۋانىشتىمىز، - دەدى پەداگوگ، الاكول اۋدانى جىلاندى اۋىلىنىڭ تۇرعىنى ەلميرا راپيلوۆا.

- جولامان اۋىلىندا جاڭا مەملەكەتتىك تۋ جاڭا بيىك تۇعىرعا كوتەرىلگەنىنە كۋا بولدىق. كوك بايراعىمىز – تاۋەلسىزدىگىمىزدىڭ سيمۆولى، ەل بىرلىگى مەن بولاشاققا دەگەن سەنىمنىڭ بەلگىسى. مەملەكەتتىك رامىزدەرگە كورسەتىلگەن قۇرمەت ءار ازاماتتىڭ بويىندا وتانعا دەگەن سۇيىسپەنشىلىك پەن ماقتانىش سەزىمىن ارتتىرادى. تۋ تۇعىرىن ورناتۋ جاس ۇرپاققا پاتريوتتىق تاربيە بەرۋدىڭ دە ماڭىزدى ۇلگىسى دەپ بىلەمىن. ونى ورناتۋ جوباسىنا اتسالىسقان ازاماتتاردىڭ بارىنە ريزاشىلىعىمىزدى بىلدىرەمىز، - دەدى كەربۇلاق اۋدانى جولامان اۋىلىنىڭ تۇرعىنى ديدار ديحانباەۆ.

- بۇگىن ەل كولەمىندە ءوتىپ جاتقان رامىزدەر كۇنىن ءبىز، اقسۋ اۋدانىنىڭ تۇرعىندارى لايىقتى اتاپ ءوتىپ وتىرمىز. وسى اۋداننىڭ 5 بىردەي ەلدى مەكەنىندە – ەگىنسۋ، ماتاي، قىزىلاعاش، اراسان، كوشكەنتال اۋىلدارىندا جاڭا تۋ تۇعىرى اشىلىپ، ولاردان تۋ بيىككە كوتەرىلدى. سالتاناتتى شاراعا اسىرەسە جاستارىمىزدىڭ، وقۋشىلاردىڭ بەلسەندى قاتىسقانىنا قۋاندىق. بۇل ولاردىڭ ەل بولاشاعىنا دەگەن جاۋاپكەرشىلىكتى سانالى تۇردە سەزىنەتىنىن بىلدىرەدى، - دەدى قىزىلاعاش اۋىلىنىڭ تۇرعىنى اشىمعالي جۇماگەلدى.

- «جەڭىس» ساياباعى - ەسكەلدى اۋدانىنداعى ەڭ كورىكتى ورىنداردىڭ ءبىرى. بۇگىن وسى جەردە مەملەكەتتىك تۋىمىزدىڭ بيىك تۇعىرعا كوتەرىلگەنىن كورىپ، ەرەكشە تولقىدىق. اۋىل بولىپ جينالىپ ءبارىمىز تاماشالادىق. كوك بايراعىمىز ساياباققا ەرەكشە ءسان بەرىپ تۇر. وسىنداي ساتتەر ەلگە دەگەن ماقتانىشىمىزدى ارتتىرا تۇسەدى. تۋىمىز ءاردايىم اسقاقتاپ، ەلىمىز امان بولسىن، - دەدى قارابۇلاق اۋىلىنىڭ تۇرعىنى ساۋلە امانتاەۆا.

جەتىسۋ وبلىسى اكىمىنىڭ ءباسپاسوز قىزمەتى.

Abai.kz