«زاڭ بارشاعا ورتاق، بىرەۋگە جالا جاپتىڭ با، سوت الدىندا ايتقان ءسوزىڭ ءۇشىن جاۋاپ بەر!». ءماجىلىس دەپۋتاتى ەلنۇر بەيسەنباەۆ وپپوزيتسيونەر جانبولات مامايدىڭ Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەككە قاتىستى جاريالاعان ۆيدەوسىنا پىكىر ءبىلدىرىپ، وسىلاي دەپتى.

«بۇل ساسقان ۇيرەك ارتىمەن جۇزەدى دەگەننىڭ كەيپى. قانداي دەبات، ادامعا جالا جاپتىڭ با، ەندى سوتتىڭ الدىندا جاۋاپ بەر. ايتىلعان ءسوز – اتىلعان وق. زاڭ ساياساتكەرگە دە، قاراپايىم ادامدارعا ورتاق. ول ەرتەڭ سوت وتىرىسىن دەبات رەتىندە پايدالانسىن، سول جەرگە بۇكىل دالەلدەرىن الىپ كەلىپ، ايتقان سوزدەرىنە جاۋاپ بەرسىن»، - دەدى ە.بەيسەنباەۆ جۋرناليست نارتاي ارايلبايۇلىمەن بولعان سۇحباتتا.

ايتا كەتەيىك، بۇعان دەيىن قوعام بەلسەندىسى جانبولات ماماي باۋىرجان بايبەكتى ايىپتاپ ۆيدەوروليك جاريالاعان بولاتىن. ارتىنشا ب.بايبەك بلوگەر تاڭىربەرگەن بەردوڭعاروۆقا بەرگەن سۇحباتىندا مامايدىڭ تاققان ءاربىر ايىبىنا جاۋاپ بەرىپ، ونى سوتقا بەرەتىنىن ايتقان ەدى.

«بۇل – پرەتسەدەنت. بۇعان دەيىن ماماي Nur Otan-عا قاتىستى تالاي جالا جاپتى. بىراق، باۋىرجان بايبەك وعان شۇيلىككەن دە جوق، نازار دا اۋدارعان جوق. بىراق، ماسەلە جەكە باسىنا كەلگەندە ول ءوز ابىرويىن قورعاپ وتىر. ءبىز ساياسي مادەنيەتتى ەل قۇرامىز دەسەك، ءاربىر سوزىمىزگە، ىسىمىزگە جاۋاپ بەرۋىمىز كەرەك»، - دەدى دەپۋتات.

ەلنۇر بەيسەنباەۆ جانبولات مامايمەن بىرنەشە جىل بۇرىن ءبىر باعىتتا جۇمىس ىستەسكەنىن، تالاي ءىس-شارانى بىرگە وتكىزگەنىن ايتىپ، قازىر جولدارى ەكىگە ايىرىلعانىن ايتتى. ال، ءسوز سوڭىندا ول جانبولات مامايدى اشىق دەباتقا شاقىردى.

Abai.kz