بۇعان دەيىن بەلسەندىلەر مەن تاۋەلسىز دارىگەرلەر ابىشەۆتىڭ اۋىر سىرقاتقا ۇشىراعانىن حابارلاپ، ونى دەرەۋ بوساتۋ قاجەتتىگىن ايتقان.

2018 جىلى "تەرروريزمدى ناسيحاتتاۋ" جانە "ۇلتتىق الاۋىزدىقتى قوزدىرۋ" باپتارى بويىنشا جەتى جىلعا سوتتالعان (2020 جىلى ناۋرىز ايىندا جازاسى قىسقارعان) ابىشەۆ سوتقا جازعان وتىنىشىندە 4 جىل 1 اي 7 كۇن تۇرمەدە وتىرعانىن، وسى ۋاقىت ارالىعىندا بەس ماراپات، ەكىنشى دارەجەدەگى وڭ مىنەزدەمە العانىن، ايىپپۇلى جوق ەكەنىن اتاپ كورسەتكەن. ول سونىمەن بىرگە ءوزى سوتتالعان ءىس بويىنشا ارانداتۋشىلاردى انىقتاۋعا كومەكتەسكەنىن دا جازعان. بەس بالانىڭ اكەسى ابىشەۆ ايەلىنىڭ ونكولوگيالىق اۋرۋمەن اۋىراتىنىن، وزىنەن جۇرەك يشەمياسى، ستەنوكارديا، قان قىسىمى سياقتى اۋىر اۋرۋ تۇرلەرى انىقتالعانىن جازعان.

الايدا ادۆوكاتى مەن بەلسەندىلەر Facebook جەلىسىندە سوتتىڭ وتىنىشتە جازىلعان جايتتاردىڭ ەشقايسىسىن ەسكەرمەگەنىن جازدى. ادۆوكات گۇلنارا جۋاسباەۆانىڭ ايتۋىنشا، سوت وسى جولى دا ابىشەۆتىڭ "ەكسترەميستىك باپ بويىنشا سوتتالعانىن، بۇل باپ بويىنشا شارتتى جازا قاراستىرىلماعانىن اتاپ وتكەن". زاڭ بويىنشا، قىلمىستى اشۋعا كومەكتەسكەن سوتتالۋشىعا شارتتى جازا سەكىلدى جەڭىلدىك قاراستىرىلعان. گۇلنارا جۋاسباەۆانىڭ سوزىنشە، الايدا سوت "ابىشەۆ قىلمىستى اشۋعا كومەكتەسكەنىن دالەلدەي المادى" دەپ تانىعان.

– ابىشەۆ كودەكستەن (قىلمىستىق-پروتسەسسۋالدىق كودەكس – رەد.) تىكەلەي ءۇزىندى كەلتىرىپ، تەرگەۋ ورگاندارى انىقتاي الماعان ءۇش ادامدى انىقتاعانىن، ولاردىڭ بارلىق انكەتالىق دەرەكتەرىن تەرگەۋ ورگاندارىنىڭ قولىنا بەرگەنىن ايتتى. سول بويىنشا بارلىق ينستانتسياعا دا جۇگىنگەنبىز. شاعىمدارىمىزدى دا كورسەتتىك. بىراق سوت كەنجەبەكتىڭ ايتقاندارىن ەسكەرگەن جوق، – دەدى ادۆوكات گۇلنارا جۋاسباەۆا.

زارەچنىيداعى لا-155/14 مەكەمەسىندە وتىرعان كەنجەبەك ابىشەۆ جاقىندا "تۇرمەدەگى زاڭسىزدىقتارعا" قارسىلىق ءبىلدىرىپ، اشتىق جاريالاپ، ارتىنشا اۋرۋحاناعا تۇسكەن. ونىڭ مەديتسينالىق كارتاسىن تالداپ شىققان "امان-ساۋلىق" قوعامدىق قورىنىڭ پرەزيدەنتى باقىت تۇمەنوۆا باستاعان تاۋەلسىز دارىگەرلەر وعان مۇگەدەكتىك مارتەبەسىن بەرۋ قاجەتتىگىن ايتىپ، دەنساۋلىعىنا الاڭداۋشىلىق بىلدىرگەن ەدى.

گۇلنارا جۋاسباەۆانىڭ ايتۋىنشا، سەيسەنبى كۇنى سوت ابىشەۆتىڭ دەنساۋلىعىنا بايلانىستى مەديك-ساراپشىلار بەرگەن مەديتسينالىق قۇجاتتاردى تۇرمە اكىمشىلىگىنە اكتىلەۋ ءۇشىن بەرۋگە كەڭەس بەرگەن. ول قۇجاتتار ادۆوكاتتىڭ قولىنا وتكەن اپتادا تۇسكەن.

Abai.kz