وزبەكستانمەن شەكاراداعى باعىس جانە حيەبون اۋىلدارى رەسمي تۇردە تۇركىستان وبلىسىنا قوسىلدى. ۇكىمەت قاۋلىسى پرەمەر - ءمينيستردىڭ سايتىندا جاريالاندى.

«وسى قاۋلىعا قوسىمشاعا سايكەس باعىس جانە حيەبون ەلدى مەكەندەرىنىڭ جالپى الاڭى 795,62 گەكتار جەرىن تۇركىستان وبلىسىنىڭ شەكاراسىنا قوسۋ ارقىلى تۇركىستان وبلىسىنىڭ شەكاراسى وزگەرتىلسىن», - دەلىنگەن ۇكىمەت قاۋلىسىندا.

اۋدانى 750 گەكتار باعىس اۋىلى اقجار اۋىلدىق وكرۋگىنە، اۋدانى 45,62 گەكتار حيەبون اۋىلى تۇركىستان وبلىسى سارىاعاش اۋدانى قۇركەلەس اۋىلدىق وكرۋگىنىڭ شەكاراسىنا قوسىلادى.

قازاقستان مەن وزبەكستان شەكاراسىنىڭ ۋچاسكەلەرى تۋرالى شارتقا ەكى ەلدىڭ تۇڭعىش پرەزيدەنتتەرى 2002 جىلى قول قويعان. ەندى وسىعان دەيىن وزبەكستانعا تيەسىلى بولعان بەس ەلدى مەكەنى بار باعىس كەنتى مەن ارناساي بوگەتى شارت بويىنشا قازاقستانعا بەرىلدى.

شەكارا ماڭىنداعى باعىس اۋىلى وڭتۇستىك قازاقستان وبلىسىنىڭ سارىاعاش قالاسىنان 40 شاقىرىم جەردە ورنالاسقان. 2009 جىلعى ساناق بويىنشا، اۋىلدا 1143 ادام (563 ەر ادام جانە 580 ايەل ادام) تۇرعان.

وندا 19 جىل رەسمي تىركەۋسىز تۇرعان ۇيلەر دە بار. ەلدى مەكەن رەسمي تۇردە قازاقستان كارتاسىنا ەنگىزىلمەگەن. بۇل ماسەلەنى تۇرعىندار دا بىرنەشە رەت اكىمدىككە بارىپ كوتەرگەن.

الايدا وبلىس اكىمدىگى باعىس اۋىلىنىڭ پروبلەمالارىن شەشۋدە ەكى ەلدىڭ سىرتقى ىستەر مينيسترلىگى شەشۋى ءتيىس "زاڭدى اسپەكتىلەر" بار دەپ ەسەپتەگەن.

ۇكىمەتكە باعىس جانە حيەبون اۋىلدارىنىڭ جاعدايىن انىقتاۋدى ەل پرەزيدەنتى قاسىم-جومارت توقاەۆ تاپسىرعان. 16 ناۋرىزدا پرەمەر-ءمينيستردىڭ ورىنباسارى ەرالى توعجانوۆ باستاعان جۇمىس توبى اۋىل تۇرعىندارىمەن كەزدەستى. سول كەزدە تۇرعىندار مەنشىك پەن جەر تەلىمدەرىن راسىمدەۋ مۇمكىندىگى جوق ەكەنىن ايتىپ ماسەلە كوتەرگەن بولاتىن. تۇرعىنداردىڭ ايتۋىنشا، اۋىل شارۋاشىلىعى مەن مال شارۋاشىلىعى ءۇشىن جەر مەن سۋارمالى سۋدىڭ جەتىسپەۋشىلىگى دە وتكىر ماسەلە بولىپ وتىر. سونىمەن قاتار، اۋىلداردا گاز جوق.

كەزدەسۋ قورىتىندىسى بويىنشا پرەمەر-ءمينيستردىڭ ورىنباسارى وبلىس اكىمدىگىنە تۇرعىنداردىڭ پروبلەمالىق ماسەلەلەرىن شەشۋ بويىنشا بارلىق شارانى قابىلداۋدى تاپسىردى.

ناتيجەسىندە ەلدى مەكەندەرگە رەسمي مارتەبە بەرىلدى، ولاردىڭ شەكارالارى بەكىتىلدى، جەر ۋچاسكەلەرى مەن مۇلىكتەرىن تۇگەندەۋ اياقتالدى. شىلدەدە ءوڭىردىڭ التى اۋىلى تابيعي گازبەن قامتاماسىز ەتىلمەك، ال كەلەسى جىلى باعىس اۋىلىندا 300 ورىندىق مەكتەپ سالىنادى.

سونىمەن قاتار، قازاقستان ءسىم وكىلدەرى باعىس اۋىلى اۋدانىنداعى مەملەكەتتىك شەكارا ۋچاسكەسىن دەماركاتسيالاۋ 2004 جىلى جۇرگىزىلگەنىن حابارلادى. قازاقستان-وزبەكستان مەملەكەتتىك شەكاراسىن دەماركاتسيالاۋ تۋرالى شارت جاساسۋ ارقىلى وزبەكستانمەن شەكارانى دەماركاتسيالاۋدى اياقتاۋ ءبىر-ەكى جىل ىشىندە جوسپارلانىپ وتىر. بۇل رەتتە، مينيسترلىكتىڭ پايىمداۋىنشا، بۇل شارتتىڭ بولماۋى باعىستاعى جەر ۋچاسكەلەرىن راسىمدەۋ جونىندەگى جۇمىستاردى جۇرگىزۋگە قۇقىقتىق جاعىنان كەدەرگى ەمەس.

Abai.kz