26 مامىردا نۇر-سۇلتانداعى ەڭبەك مينيسترلىگى الدىنا تاعى دا ون بەس شاقتى كوپ بالالى جانە مۇگەدەك بالاسى بار ايەل جينالدى. ولار بيلىكتەن باسپانا مەن ءار بالاعا 42 500 تەڭگە جاردەماقى بەرۋدى تالاپ ەتتى.

نارازى ايەلدەر الدىمەن ەڭبەك مينيسترلىگى الدىنا جينالىپ، ەڭبەك ءمينيسترىنىڭ شىعۋىن تالاپ ەتتى.

– ءبىز تۇرمىسى ناشار، بالاسى كوپ وتباسىنا تۇرعىن ءۇي قورىنان باسپانا بەرىلۋىن تالاپ ەتەمىز. ءبىزدى "وتباسى بانكىنە" يتەرە بەرۋدىڭ قاجەتى جوق. 2% دا وڭاي ەمەس ءارى 15 ميلليونعا 7-8 بالاسى بار وتباسى قانداي ءۇي الا الادى؟ ودان دا وسى سوماعا 4-5 بولمەلى پاتەر بەرسىن، اي سايىن ءبولىپ تولەيمىز، ونسىز دا پاتەر جالداپ ءجۇرمىز. ەكىنشى تالاپ – ءار بالاعا 42 500 تەڭگە جاردەماقى بەرىلسىن، - دەدى التىن القا يەگەرى گۇلزادا ءابدىرامانوۆا.

ونىڭ ءسوزىن وزگە ايەلدەر دە قوستادى. نارازىلار قازاقستاننىڭ سىرتقى قارىزىنىڭ كوپتىگىن ايتىپ، "سىرتتان قارىز الا بەرگەنشە، وففشورداعى اقشالاردى اكەلسىن" دەپ تە ايقايلادى.

كوپ بالالى انالار بەلسەندىسى قاناعات شۇمەنوۆا "قازاقستان بيلىگى تۇرعىندارعا نەسيە قامىتىن كيگىزىپ، باسىن كوتەرتپەي وتىر، ونى تولەۋگە ۇمتىلعان بورىشكەرلەردە دەنساۋلىق تا جوق، ونى ويلايتىن مۇمكىندىك تە جوق" دەدى.

مينيسترلىك الدىنا توپتاسقان ايەلدەردى پوليتسيا وكىلدەرى باقىلاپ تۇردى. نارازىلار ءبىر ساعاتتان استام ۋاقىت تۇرسا دا مينيستر شىقپادى. مينيسترلىكتە انا مەن بالا ماسەلەسىمەن اينالىساتىن مامان شىقتى. ءوزىن گۇلميرا جاكەنقىزى دەپ تانىستىرعان قىزمەتكەر باسپانا ماسەلەسى ەڭبەك مينيسترلىگى قۇزىرەتىندە ەمەس ەكەنىن ايتتى.

- 42500 تەڭگە جاردەماقى تۋرالى دا ەشنارسە ايتا المايمىن. ەلدە قازىر 18 جاسقا تولماعان 6250 بالا بار. ەگەر اي سايىن ولارعا 42500 تەڭگەدەن تولەسەك، ول 3 تريلليون تەڭگەدەن اسىپ كەتكەن بولار ەدى، - دەدى گۇلميرا جاكەنقىزى.

ونىڭ سوزىنە قاناعاتتانباعان ايەلدەر اقورداعا بارماق بولدى. بىراق ولاردىڭ جولىن ادەتتەگىدەي ارنايى جاساق بوگەدى. اپتاپ ىستىققا قاراماي جينالعان ءبىر توپ ايەل "پرەزيدەنتكە جول اشىلسىن!" دەپ ايقايلادى.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، قازاقستاندا 440 مىڭ كوپ بالالى وتباسى بار. ۇكىمەت ولارعا 11 ءتۇرلى جاردەماقى تولەيدى. 2019 جىلى قابىلدانعان ەرەجەگە ساي، ۇكىمەت كوپ بالالى وتباسىلارعا تابىسىنا، الەۋمەتتىك جاعدايىنا قاراماي اي سايىن جاردەماقى تولەيدى. بىراق ءتورت بالاعا - 42 496 تەڭگە ء(بىر بالاعا 10 500 تەڭگە), بەس بالاعا - 53 127 تەڭگە، التى بالاعا - 63 757 تەڭگە، جەتى جانە ودان كوپ بالاعا 74 388 تەڭگەدەن بەرەدى.

دەرەككوز: Centralasian.org

Abai.kz