سەيسەنبى, 21 قىركۇيەك 2021
3740 8 پىكىر 3 ماۋسىم, 2021 ساعات 12:17

اقىلى جولدار: حالىق نارازى، ۇكىمەت ءۇنسىز

كەشەلى-بەرى جۇك كولىگىنىڭ جۇرگىزۋشىلەرى اقىلى جولدارعا قاتىستى نارازىلىقتارىن بىلدىرۋدە. جۇرگىزۋشىلەر اقىلى جولدى ەنگىزبەس بۇرىن، الدىمەن جولدىڭ ساپاسىنا كوڭىل ءبولىپ، جوندەۋدەن وتكىزسىن دەيدى. ال مينيسترلىك بولسا "جوسپار بويىنشا اقىلى جولدار ەنگىزىلەدى، الايدا جوندەۋ كورمەگەن اقى الىنبايدى" دەپ وتىر. 

ەلىمىزدە اقىلى جولدارعا قاتىستى نارازىلىق مامىر ايىنىڭ 30 كۇنىنەن باستاپ ءوتىپ جاتىر. كەشە شىمكەنت قالاسىنىڭ ماڭىندا جۇرگىزۋشىلەر جول جيەگىنە كولىكتەرىن قويىپ، ۇزىندىعى ءبىر شاقىرىمعا سوزىلعان نارازىلىق اكتسياسىن وتكىزدى. ولار "اقىلى جولداردىڭ باعاسى تىم قىمبات، ال جول ساپاسى تولەنگەن اقىعا ساي ەمەس" دەيدى.

مينيسترلىك اقىلى جولدار الەمدىك تاجىريبەدە كەڭىنەن قولدانىپ وتىرعانىن جەتكىزدى. يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ قازاقستانداعى رەسپۋبليكالىق ماڭىزى بار 25 مىڭ شاقىرىم اۆتوموبيل جولدارىن كۇتىپ ۇستاۋعا جىل سايىن رەسپۋبليكالىق بيۋدجەتتەن 40 ميللياردتان استام تەڭگە جۇمسالاتىنىن ايتتى. "اقىلى جولدى ەنگىزۋ ارقىلى بيۋدجەتكە تۇسەتىن سالماقتى ازايتامىز" دەيدى ول. ءمينيستردىڭ ايتۋىنشا 2025 جىلعا دەيىن ەلىمىزدە 11 مىڭ شاقىرىم اۆتوموبيل جولىن اقىلى ەتۋ جوسپارلانىپ وتىر. بيىل العاشقى 5,8 مىڭ شاقىرىم جول اقىلى نەگىزگە كوشپەك.

مينيسترلىكتىڭ مالىمەتىنشە قازىرگى كەزدە ەلىمىزدە 682 شاقىرىم اقىلى جول بار. وتكەن جىلى نۇر-سۇلتان - ششۋچينسك، نۇر-سۇلتان - تەمىرتاۋ، الماتى - قورعاس، الماتى - قاپشاعاي اقىلى جولدارىنىڭ ۋچاسكەلەرىنەن 5,7 ميلليارد تەڭگە قارجى تۇسكەن، ونىڭ 5,4 ميلليارد تەڭگەسى جولداردى كۇتىپ ۇستاۋعا جۇمسالعان، ال قالعانى بيۋدجەتكە اۋدارىلعان. مينيستر نارازىلىق بىلدىرگەن جۇرگىزۋشىلەردىڭ شاعىمدارى مەن وتىنىشتەرى «نازارعا الىنادى» دەيدى. قازىرگى ۋاقىتتا اقىلى جولداردىڭ ءار شاقىرىمىنا 25 تەڭگەدەن اقى الىنۋدا. نارىزىلىق بىلدىرگەن جۇرگىزۋشىلەر مينيسترلىكتىڭ جاۋابىن "قاناعاتتاندىرارلىق ەمەس" دەپ باعالاپ وتىر.

Abai.kz

8 پىكىر