سەيسەنبى, 19 قازان 2021
46 - ءسوز 4551 8 پىكىر 8 شىلدە, 2021 ساعات 13:42

مينيستر تسويدى قىزمەتىنەن الۋ كەرەك

قر پرەزيدەنتى قاسىم-جومارت كەمەلۇلى توقاەۆ مىرزاعا ۇندەۋ!

قۇرمەتتى پرەزيدەنت مىرزا، زاڭگەر رەتىندە ايتار داتىمدى نازارعا الۋدى تالاپ ەتەمىن! حالىقتىڭ قۇقىعىن تىكەلەي، ورەسكەل بۇزىپ، ۇياتتان بەزىپ، ادام قۇقىقتارىن ناداندار سەكىلدى تاپتايتىن ۇكىمەتتى توقتاتىڭىز، بولماسا توقتاتۋ ءۇشىن ءوزىم ارەكەتكە كوشەمىن.

اسىرەسە، ماجبۇرلەپ ۆاكتسينانى سالدىرۋعا ەشكىمنىڭ قۇقىعى جوق. ونداي وكىلەتتىك ءتىپتى، سوتقا بەرىلمەگەن، ەشكىمنىڭ جەكە ومىرىنە، دەنساۋلىعىنا قول سۇعۋعا جول جوق. اركىمنىڭ ءوز تاڭداۋى بار. ءبىزدىڭ كونستيتۋتسيامىزعا، ازاماتتىق كودەكسكە قارسى شىعۋ - قىلمىس جاساعانمەن تەڭ، فەودال داۋىردە ءومىر ءسۇرىپ جاتقان جوقپىز جوق.

«ۆاكتسينا يممۋنيتەتتى قالىپتاستىرادى» دەگەن انگىمە بوس اپساناعا اينالىپ بارا جاتىر، حالىقتى ازاپتاۋعا، قيناۋعا، ەركىنەن تىس ماجبۇرلەپ، قايداعى ءبىر تسوي شىعارعان قاۋلىنى ورىنداتۋعا قۇقىق ءسىز تۇرماق، سوتتا جوق. حالىققا سانالى تۇردە قارىم-قاتىناس جاساپ، وزدەرى سانالى تۇردە ۆاكتسينا الۋعا تاڭداۋ جاساپ، ارەكەت ەتۋ تۋرالى قانشا رەت جازدىم، ءبىر قۇلاق اسپايسىزدار. ءبىز زايىرلى مەملەكەتتە تۇرعاندىقتان حالىقتىڭ كوزقاراسىمەن ساناسۋ، حالىقتىڭ ءۋاجىن تىڭداۋعا مىندەتتىسىزدەر. كىمدەر ءۇشىن قىزمەت ەتۋ كەرەگىن ۇكىمەت ۇمىتىپ قالماعان شىعار. حالىق ۇكىمەتكە باعىنىشتى ەمەس. ۆاكتسينا تەك جەمقورلىقتى ۇدەتىپ، حالىقتى جابىرلەپ، بويىنداعى اۋرۋىن قوزدىرىپ، مۇشكىل حالدە ولۋگە دەيىن اپاراتىن جول سەكىلدى. قازىر ۆاكتسينادان كەيىن نە ءبىر رەاكتسيا بەرگەن ادامداردىڭ ۆيدەوسىن كورىپ، حالىقتىڭ ۇرەيى ۇشقانىن بىلەسىز بە؟ ەشكىم ونىڭ زيانىنا، نە بولماسا ناتيجەسىنە 10 جىل زەرتتەۋ جاساپ كورگەن جوق، تەك كوڭىل الداۋ سەكىلدى.

تسوي ءالى تالاي حالىقتىڭ كوز جاسىنا جاۋاپ بەرەدى. تسوي، بەكشين قياسوۆتاردى، بىلىققا باتقان مينيسترلىكتى ءبىرتانوۆتىڭ جانىنا ايداۋ كەرەك. بيۋدجەت قاراجاتىنىڭ وپىرىپ، ءتۇبى تەسىلگەنشە ۇندەمەي قالاي قاراپ وتىراسىز. وتكەن جىلعى مەديتسينانىڭ سالعىرتىعى سىزگە نەگە ساباق بولمادى؟

ءسىز ماعان پرەزيدەنت رەتىندە ايتىڭىز، تسوي حالىق ءۇشىن نە ىستەي الدى؟ وتكەن جىلى حالىق ءوجج اپاراتتى وزدەرى قامتاماسىز ەتتى، قالاداعى دەزينفەكتسيا كوزبوياۋشىلىق بولادى، حالىققا سالىنعان ءمودۋلدى اۋرۋحانامىز قۇلادى. ءوزى ۆاكتسينانى مىندەت ساناپ، مەن ايعايدى سالىپ قۇقىقتى تالاپ ەتكەن سوڭ قر زاڭىنا ۆاكتسينانى تىركەپ بارىپ، ءبىر جىلدان سوڭ سالعىزدى.

تسوي اسا اقىماق ەمەس، ونىڭ ءبىر ساۋاتتىلىعى حالىقتى ماجبۇرلەپ ۆاكتسينا سالدىرۋ ءۇشىن، سىزدەرگە جۇگىندى. مەنىڭشە، بۇل ويى ەرتەڭگى كۇنى ادام شىعىنى بولاتىن بولسا، جاۋاپكەرشىلىككتەن سىتىلىپ، حالىقتى، ۇكىمەت پەن پرەزيدەنتكە تىرەپ قويۋ. سەبەبى حالىق سىزگە قارسى كەلمەيتىنىن بىلەدى. سول ايلاسىنا كونگەن ۇكىمەتكە نە دەۋگە بولادى؟ سويتە تۇرا حالىقتىڭ سەنىمىن، ادامداردىڭ تاعدىرىن سولارعا سەنىپ وتىرعانىڭىزعا تاڭىم بار.

اۋرۋ ارقاشاندا بولعان، وعان قارسى كۇرەسۋ ءۇشىن ءبىز جىلىندا ءبىر رەت حالىقتى مەدتەكسەرىستەن وتكىزىپ، سالاۋاتتى ءومىر سۇرۋگە جول نۇسقاۋ كەرەكپىز. ۇكىمەتتە ءبارى كەرىسىنشە، قيناپ سالدىرادى، دەنساۋلىعى ناشارلاعانىن كۇتىپ وتىرادى. حالىق ىزاسىمەن ويناۋعا، ال قۇقىعىنا بالتا شابۋعا جول بەرمەۋىڭىزدى تالاپ ەتەمىن. ۋاقىت ەمشى ءبارىن ءوز ساتىمەن كورسىن.

ءبىز ۇكىمەتكە، تسويعا تاجىربيە جاسايتىن قويان ەمەسپىز. بۇل كۇندە ەشكىم ءوز ومىرىنە نەمقۇراي قاراپ وتىرعان جوق، سەبەبى شىمكەنتىك يمۋننولوگ مەديتسينانىڭ بىلىعىن اشتى. ياعني، كورونوۆيرۋس پەن پنەۆمونيانى شاتاستىرىپ ەمدەپ، دۇرىس ەمەس ەم-شارالارىنىڭ كەسىرىنەن اۋرۋ اسقىنعان. قازىرگى بيزنەس كەيبىر ولگەن ادامداردى دا اۋىرماعان كوۆيدپەن بايلانىستىرۋ، جوسپاردى ورىنداۋ دارىگەرلەرگە باستى ماقسات سەكىلدى. سەبەبى ولگەنىڭ سۇراۋى جوق دەپ وتىرا بەرەدى. مۇنداي سۇمدىققا تەك ساناسىز ۇكىمەت جول بەرمەسە، اقىلدى ۇكىمەت بەرگەن تيىنىڭ ناتيجەسىن سۇراپ، ءىس-ارەكەتىنە باقىلاۋ جۇرگىزەر ەدى.

تسوي جاقسى مينيستر بولسا بەكشينمەن قوسا قانشا حالىقتى ەمدەگەنىن ايتار ەدى ءسوزىمنىڭ ءتۇيىنىن حالىق ءوز كوزىمەن بارلىق جاعدايعا باعا بەرىپ، ءوز ەركىمەن ۆاكتسينا الۋعا كەلسىن. حالىققا ايىپپۇل سالامىز دەپ، قورقىتىپ، ىزاسىن تۋدىرۋعا، زاڭسىز قاۋلىمەن ادامداردى مىندەتتەۋگە قۇقىقتارىڭىز جوق. ۇكىمەتتىڭ قيسىق ارەكەتىن توقتاتىڭىز جانە تسوي، بەكشين مىرزالاردىڭ مەديتسينانى باسقارۋداعى بىلىكسىزدىگى ءۇشىن قىزمەتىنەن الىپ تاستاۋدى سۇرايمىن!

كاميشا ەسمۇحامەتقىزى

Abai.kz

8 پىكىر