جۇما, 29 ناۋرىز 2024
ساڭلاق 9633 16 پىكىر 21 شىلدە, 2021 ساعات 13:10

الەم حالقى تىكەلەي كورەدى، قازاقستان اقپارات كۇتەدى

الەم حالقى اسىعا كۇتكەن وليمپيادا ويىندارى دا كەلىپ جەتتى. پاندەميانىڭ سالدارىنان ءبىر جىل كەيىنگە شەگەرىلىپ، 23 شىلدەدە تۇساۋى كەسىلەتىن سپورت سايىسى ەرەكشە بولماق. ۆيرۋس جۇعۋ قاۋپىن ەسكەرە وتىرىپ، كورەرمەن قاتىسۋى شەكتەلگەن. سوندىقتان دا ءدۇبىرلى دودانى تەك قانا تەلەارنالار ارقىلى كورەتىن بولامىز. كورەمىز دەپپىن-اۋ، كورەدى. قازاقستان حالقى وليمپيادا ويىندارىن كورۋ باقىتىنان ايىرىلدى. كورشىلەس ەلدەر ترانسلياتسياسىن ساتىپ السا، ءبىزدىڭ مەملەكەت ونداي كەلىسىم جاساسپاپتى. سەبەپ، "تىم قىمبات" ەكەن. بۇل ارينە قوعامنىڭ تۇسىنىسپەۋشىلىگىن تۋىنداتىپ وتىر. قوعام بەلسەندىلەرى مەن قاراپايىم حالىق ءوز ويىن ناقتى بىلدىرۋدە. 

مۇحتار تايجان: ۇلتتىق كەڭەس جۇمىسىنا اتسالىسۋعا دايىنمىن

وليمپيادا ويىندارىنىڭ كورسەتىلۋىنە قاتىستى بەلگىلى قوعام قايراتكەرى مۇحتار تايجان: ء"بىز ءوزىمىزدىڭ ۇلتتىق تەلەارنالارىمىزدان وليمپيادا ويىندارىن تاماشالاي المايتىنىمىزدى قاتتى رەنىشپەن قابىل الدىم. ولاي بولاتىن بولسا قازاقستاننىڭ وليمپياداعا باراتىن كومانداسىن پرەزيدەنتكە سونشا داقپىرتپەن تانىستىرامىز، ەگەر ولارعا جانكۇيەر بولا الماساق؟ قالايشا ءبىز ءوزىمىزدىڭ بالۋاندار مەن بوكسشىلارىمىزدىڭ، گيمناستشىلارىمىز بەن تەننيسشىلەرىمىزدىڭ جەڭىستەرىن كورە المايمىز؟ ۇلتتىق ماقتانىش دەگەن وسى ەمەس پە؟!

قازاقستان بىرنەشە ملرد دوللارعا ەكسپو وتكىزەدى، سونشا اقشاعا لرت سالادى، الەمدىك دىندەر ءسامميتىن وتكىزەدى، ەۋرازيا جۋرناليستەرىنىڭ ءسامميتىن جاسايدى، سيريا ءۇشىن استانا كەلىسسوزىن جۇرگىزەدى، بىراق ءوز حالقىنا وليمپيادا ويىندارىن كورسەتە المايدى! بۇل قالاي بولعانى؟ قالجىڭداپ وتىرسىزدار ما؟ بار بولعانى 5 ملن دوللار عوي بۇعان كەرەگى! بىزدە كەز كەلگەن وردەن تاسۋشى-فەرمەر جىل سايىن بۇدان كوپ سۋبسيديا الادى!

مەن ءبىزدىڭ ۇلتتىق وليمپيادا كوميتەتىنىڭ باسشىلىعى بۇل ماسەلەگە جاۋاپكەرشىلىكپەن قاراپ، حالىق ءۇشىن وڭ شەشىم تابادى دەپ ويلايمىن. ويتكەنى تيمۋر قۇلىباەۆ پەن دانيار ابۋلعازين ميللياردتاعان، بىرنەشە ميلليونداعان دوللارلارىمەن فوربس قازاقستان ءتىزىمىنىڭ بىرنەشە جىلدان بەرى كوشىن باستاپ تۇر عوي. بۇل بايلىقتى ولار تەك ادال دا اۋىر ەڭبەگىمەن عانا ەمەس، قازاقستان مەملەكەتىنىڭ كومەگى، ونىڭ جەر بايلىعى ارقاسىندا جينادى ەمەس پە؟

مىنە ەندى ءوز مەملەكەتىڭە كومەكتەسەتىن ۋاقىت تۋدى ناعىز. ەگەر ۇلتتىق مەملەكەتتىك تەلەارنالاردا بار بولعانى 5 ملن دوللار تابىلماي جاتسا وسى ەكى باتىر پاتريوتيزم مەن ەلگە دەگەن العىسىن ءبىلدىرىپ، وليمپيادا ويىندارىنىڭ ترانسلياتسياسىن قامتاماسىز ەتەدى دەپ سەنەمىن!

ال ەگەر سىزدەر بۇل مىندەتتى ورىنداي الماساڭىزدار ۇلتتىق وليمپيادا كوميتەتىندە نەسىنە وتىرسىزدار؟ ۇلتتىق وليمپيادا كوميتەتىنە جەتەكشىلىك ەتۋ دەگەن تەك الەمدىك سپورت ەليتاسى جانىندا ءسان ءۇشىن ءجۇرۋ ەمەس، ول سونىمەن بىرگە حالىق الدىنداعى ۇلكەن جاۋاپكەرشىلىك! ءبىزدىڭ كورشىلەرىمىز وزبەكستان، قىرعىزستان، ۋكراينا، بەلارۋس، مىسالى، وليمپيادا ويىندارىن كورسەتۋگە ليتسەنزيا الىپ العان. بۇل جەردە گابون، كحدر، زامبياع كونگو، اۋعانستان، كۋبا مەن گوندۋراس تۋرالى ايتپاي-اق قويايىن، ولار دا ءوز حالقىنا وليمپيادا ويىندارىن كورسەتەدى.

ال، مۇناي مەن گازعا باي، قارىشتاپ دامىپ جاتقان قازاقستاندا مۇنداي مۇمكىندىك جوق! ەگەر وسى قاراپايىم عانا شارۋا شەشىمىن تاپپاسا، ناعىز ۇيات سوندا بولادى! وندا وليمپيادا كوميتەتىنىڭ باسشىلىعىن اۋىستىرۋ تۋرالى ماسەلە كوتەرۋ كەرەك! بىراق ءبىز سىزدەر ءۇشىن كىشكەنتاي عانا وسى ماسەلە وڭاي شەشىلەدى دەپ ۇمىتتەنەمىز! " دەيدى.

رۋسلان مەدەلبەك: "بىزدە كوممەنتاتورلار دايارلايتىن مەكتەپ اشقانمەن، ءدارىس بەرەتىن مامان جوق!" - 27.06.2014: اقپاراتتىق-تانىمدىق سايت - ەl.kz

ال بەلگىلى سپورت ءجۋرناليسى، بۇگىندە توكيو تورىنەن وليمپيادا ويىندارى جايلى اقپارات تاراتۋعا اتتانعان رۋسلان مەدەلبەك بولسا: "قازاقستان ارنالارى توكيو وليمپياداسىن كورسەتپەيتىن سياقتى. كورسەتپەيدى ەمەس "كورسەتپەيتىن سياقتى". قازاقستان تەلەارناسىنىڭ تۇسىنىكسىز، جانكۇيەرلەرگە بۇل جاعىمسىز حاباردى "قىمسىنا" ەستىرتكەن پرەسس-رەليزىنەن قازىرشە سونى اڭعاردىق. كورەرمەن 2018 جىلى ازيا ويىندارىن كورسەتە الماعاندا قاتتى رەنجىگەن. ول كەزدە دە اقشا جوق دەگەن ەدى. بۇل جولى "وزبەكستاننىڭ كانالدارى كورسەتىپ جاتىر ەكەن" دەگەن سىن ويناماي قالادى. ەگەر ويىندار كورسەتىلمەسە وليمپيادا اياقتالعانشا تەلەارنا باسشىلىعى، مادەنيەت جانە سپورت مينيسترلىگى سىننىڭ استىنا كومىلمەك. ءيا، وليمپيادا كورسەتۋ قۇقىعى تىم قىمبات شىعار. سەبەبى ويىندار كورەرمەنسىز وتەدى، شىعىنى شاش ەتەكتەن. سوندىقتان ءبىر جىرتىقتى ەكىنشىمەن جاماۋعا تىرىسادى. مۇنى تەلەارنا باسشىلىعى دا تۇسىنسە كەرەك. حالىققا وليمپيادا كورسەتۋ قۇقىعى قىمبات پا، ارزان با قىزىقتىرمايدى. سالىعىنىڭ اقشاسى مەمپروپاگانداعا كەتىپ جاتقاندا ءتورت جىلدا ءبىر بولاتىن ۇلكەن دودانىڭ ترانسلياتسياسىن تالاپ ەتۋگە تولىق حاقىلى. وليمپياداعا ءالى بەس كۇن بار، پرەسس-رەليزدەگى ء"الى" دەگەن سوزگە ءۇمىت ارتۋعا تۋرا كەلەدى. جانكۇيەرگە وليمپيادا كورۋ باقىتى بۇيىرسىن. قازىر باسقاسى ماڭىزدى ەمەس" دەگەن ويدا.

جىلدىق بيۋدجەتى بىرنەشە ملرد تەڭگە بولاتىن تەلەارنالار دا وليمپيادا ويىندارىن كورسەتپەيدى. الايدا كورسەتۋگە قاتىستى كەلىسسوزدەر جاساپ جاتقاندارىن مالىمدەدى. "قازاقستان" ۇلتتىق تەلەارناسى ءباسپاسوز قىزمەتكەرى كەلەسىدەي حابارلاما تاراتتى: "XXXII جازعى وليمپيادا ويىندارىنىڭ ترانسلياتسياسىنا قاتىستى كورەرمەندەر مەن ارىپتەستەرىمىزدەن كەلىپ ءتۇسىپ جاتقان ساۋالدارعا بايلانىستى كەلەسىنى حابارلايمىز.

توكيو وليمپياداسىنىڭ تىكەلەي ترانسلياتسيالار قۇقىعى "Dentsu Inc." كومپانياسىنا تيەسىلى. "قازاقستان" تەلەراديوكورپوراتسياسى مەن "حابار" اگەنتتىگى" اق "Qazaqstan", "Qazsport", "حابار" تەلەارنالارى ارقىلى جازعى وليمپيادانى ەل اۋماعىندا كورسەتۋ بويىنشا كەلىسسوزدەردى 2019 جىلى باستاعان بولاتىن. تاراپتار ازىرگە ورتاق كەلىسىمگە كەلە العان جوق. ەكىجاقتى كەلىسىمنىڭ ۇزاققا سوزىلۋ سەبەبى، قۇقىق يەسىنىڭ ليتسەنزيا باعاسىن 2016 جانە 2018 جىلدارداعى وليمپيادا ويىندارىمەن سالىستىرعاندا 123 پايىزعا قىمباتقا ۇسىنۋى.

قازىرگى كەزدە "Qazaqstan", "Qazsport", "حابار" تەلەارنالارى قازاقستاندىق سپورتشىلاردى قولداۋ جانە وتاندىق كورەرمەندەرگە وليمپيادادان جەدەل اقپارات ۇسىنۋ بويىنشا جان-جاقتى ازىرلىك جۇمىستارىن جۇرگىزۋدە. تەلەارنالاردىڭ ۇلتتىق وليمپيادا كوميتەتى مەن شەتەلدىك ءىرى اقپارات اگەنتتىكتەرىنەن فوتو،-ۆيدەوماتەريالدار الۋ مۇمكىندىگى قاراستىرىلعان.

XXXII جازعى وليمپيادا ويىندارى توكيودا 23 شىلدە مەن 8 تامىز ارالىعىندا وتەدى. قازاقستان قۇراماسىنىڭ قورجىنىندا سپورتتىڭ 27 تۇرىنەن 97 ليتسەنزيا بار". 

قازاقستان حالقىندا كوك ەكراننىڭ ارتىندا سپورتشىلارىمىزعا جانكۇيەر بولىپ، ۇيدە وتىرىپ، تاقىم قىسۋ مۇمكىندىگى جوق. الەم حالقى تىكەلەي ەفيردەن كورەتىن ويىنداردى، ءبىزدىڭ ەلدىڭ ازاماتتارى سايتتاعى اقپاراتتار ارقىلى وقۋعا ءماجبۇر.

اسحات قاسەنعالي

Abai.kz

16 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1582
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3616