«Ranking.kz» سايتى بۇگىن قازاقستانداعى «بەبي-بۋم»، ياعني بالا تۋ كورسەتكىشىنىڭ وسكەنى تۋرالى دەرەكتەردى جاريالاپتى. قاراڭىز: بيىلعى جىلدىڭ العاشقى توقسانىنداعى مالىمەت بويىنشا، ەلىمىزدە 100,5 مىڭ بالا تۋىلعان. بۇل سوڭعى 2-3 جىلداعى ەڭ جوعارعى كورسەتكىش ەكەن.

مىسالى، 2020 جىلى ءدال وسى ۋاقىتتا قازاقستانداعى جاڭا تۋعان نارەستەلەر سانى 92,7 مىڭ بولعان. ال 2019 جىلى بۇل كورسەتكىش ءتىپتى، 91,7 مىڭ بالا دەپ ەسەپتەلىپتى. بالا تۋ ءوسىمى 2020 جىلدىڭ ءۇشىنشى توقسانىنان باستالعان ەكەن. جالپى بىلتىر ەلىمىزدە 425 مىڭ بالا دۇنيەگە كەلگەن.

ەندى ەكىنشى اقپاراتتى قاراڭىز:

«Protenge.kz» Instagram پاراقشاسى Unicef دەرەكتەرىنە سۇيەنە وتىرىپ، قازاقستاندا 1 ميلليون بالا كەدەيشىلىك تاۋقىمەتىن تارتىپ جاتقانىن جازىپتى.

Unicef-ءتىڭ دەرەگىنشە، قازاقستاندا 6 ميلليونعا جۋىق بالا بار ەكەن. سونىڭ ءاربىر التىنشىسى كەدەي! ياعني، قازاقستاندا 1 ميلليونعا جۋىق بالا كەدەي!

الايدا قازاقستان بيلىگى بۇل ستاتيستيكانى مويىندامايدى. ۇكىمەتتىڭ «تۇراقتى دامۋ» تۋرالى ەسەبى بويىنشا، قازاقستان كەدەيلىكتى جەڭگەن. رەسمي تۇردە بار بولعانى 814 مىڭ (814 320) ادامنىڭ كەدەيلىك قامىتىن كيگەنىن مويىندايدى.

ەڭبەك مينيسترلىگىنىڭ ەسەپتەۋىنشە، تابىسى قازاقستان ۇكىمەتى بەلگىلەپ بەرگەن كۇنكورىس دەڭگەيىنەن 70%-عا تومەن بولسا - ول ادامدى كەدەي دەگەن كاتەگورياعا جاتقىزادى. ال بىزدە جان باسىنا شاققاندا ەڭ تومەنگى كۇنكورىس دەڭگەيى - 34 300 تەڭگە دەپ بەلگىلەنگەن. ياعني، وتباسىنداعى ءاربىر ادامعا شاققاندا تابىس كولەمى جاعا،ى 34 300 تەڭگەدەن از بولسا (24 مىڭ تەڭگە), ول ادام - رەسمي كەدەي.

ال ۇلتتىق ستاتيستيكا بيۋروسىنىڭ 2021 جىلعى ەسەبىنشە، قازاقستان حالقى تاپقان تابىسىنىڭ 41,8%-ىن تاماققا جۇمسايدى ەكەن. بۇل بۇۇ كلاسسيفيكاتسياسى بويىنشا تومەن كورسەتكىش. ال جاڭاعى Unicef دەرەگىنشە، قازاقستاندا 1 ملن-عا جۋىق بالا كەدەيلىكتە ءومىر ءسۇرىپ جاتىر.

Abai.kz