پتر تەستىلەرى مەن ۆاكتسيناتسيا پاسپورتتارىن قولدان جاساعانى ءۇشىن 110 قىلمىستىق ءىس قوزعالدى، – دەپ حابارلايدى Polisia.kz.

5 تامىزدا ىشكى ىستەر مينيسترلىگىندە مەملەكەت باسشىسىنىڭ كوروناۆيرۋستىق ينفەكتسيانىڭ تارالۋىنا جول بەرمەۋ جونىندەگى تاپسىرمالارىن ورىنداۋ بويىنشا جۇمىس كەڭەسى ءوتتى. ءىس-شاراعا ۇقك، بپ، سجقكا، قما، دسم، اقدم باسشىلىعى، سونداي-اق قر ءىىم جانىنداعى ۆەدومستۆوارالىق ارنايى توپتىڭ مۇشەلەرى قاتىستى.

– جالعان مەديتسينالىق قۇجاتتاردى ۇسىنۋدىڭ تۇتاس سحەمالارى انىقتالدى. كەيبىر تۋروپەراتورلار جالعان ۆاكتسيناتسيا پاسپورتتارىن شىعارۋمەن جانە ساتۋمەن اينالىسقان. سونىمەن قاتار، ولاردى تەمىرجول ۆوكزالدارىندا، اۋەجايلاردا جانە مەملەكەتتىك شەكارانىڭ وتكىزۋ پۋنكتتەرىندە ىسكە اسىرۋ فاكتىلەرىنىڭ جولى كەسىلدى، – دەپ حابارلادى ىشكى ىستەر ءمينيسترى ەرلان تۇرعىمباەۆ.

ۆەدومستۆو باسشىسى ەل پرەزيدەنتى ءىىم جانىنان ۆەدومستۆوارالىق ارنايى توپ قۇرۋدى تاپسىرعانىن اتاپ ءوتتى. توپ جالعان ۆاكتسيناتسيا پاسپورتتارىن جانە پتر-تەستىلەۋ ناتيجەلەرىن قولدان جاساۋ جانە ساتۋ فاكتىلەرىنىڭ جولىن كەسۋ جونىندەگى جۇمىستى ۇيلەستىرەتىن بولادى. وسىعان بايلانىستى، اقپاراتتى جيناۋ جانە وڭدەۋ، سونداي-اق انىقتالعان فاكتىلەرگە دەن قويۋ شارالارى بويىنشا ءوزارا ءىس-قيمىل ءتارتىبى ايقىندالعان.

جىل باسىنان بەرى 110 قىلمىستىق ءىس تىركەلگەن، ونىڭ ىشىندە 60-ى جالعان پتر-انىقتاما جانە 50-ءى ۆاكتسيناتسيا پاسپورتىن جاساۋ بويىنشا. پتر-انىقتامالاردى قولدان جاساعانى جانە جالعان ۆاكتسيناتسيا پاسپورتىن جاساعانى ءۇشىن 28 ادام اشكەرەلەندى، ونىڭ ىشىندە مەديتسينا قىزمەتكەرلەرى – 20 (التى دارىگەر، 14 مەديتسينا قىزمەتكەرى), دەلدالدار – 8.

سونداي-اق الەۋمەتتىك جەلىلەرگە مونيتورينگ جۇرگىزۋ كەزىندە جالعان ۆاكتسيناتسيا پاسپورتتارىن جانە پتر-انىقتامالاردى ساتۋ تۋرالى 70 حابارلاندىرۋ انىقتالدى، ولاردىڭ 37-ءى بۇعاتتالدى. وسى ساناتتاعى ىستەر بويىنشا تەرگەۋ-سوت پراكتيكاسى قالىپتاستىرىلدى، زاڭدى كۇشىنە ەنگەن سوت اكتىلەرى بار. ءتورت قىلمىستىق ءىس بويىنشا ايىپتاۋ ۇكىمى شىعارىلدى. 43 قىلمىستىق ءىس بويىنشا تەرگەۋ ارەكەتتەرى جانە ساراپتامالىق زەرتتەۋلەر جۇرگىزىلۋدە. ولار اياقتالعاننان كەيىن كۇدىكتىلەردىڭ ءىس-ارەكەتتەرىن قۇقىقتىق باعالاي وتىرىپ، ءىس جۇرگىزۋ شەشىمدەرى قابىلدانادى. وسىعان ۇقساس بارلىق قىلمىستىق ىستەردىڭ تەرگەلۋى باقىلاۋدا. كەڭەس بارىسىندا ىشكى ىستەر مينيسترلىگى باسقا مەملەكەتتىك ورگاندارعا ۇسىنىستار بەردى.

Abai.kz