رەسەيدەگى ماسكەۋ مەموريالدىق مەشىتىنىڭ يمامى ءشامىل الياۋتدينوۆ تەلەجۇرگىزۋشى دينارا ساتجانمەن وتكىزگەن Instagram-داعى تىكەلەي ەفير كەزىندە ۆاكتسينانى ناجىسكە تەڭەپ جۇرگەن «ۋاعىزشىلار» تۋرالى پىكىر ءبىلدىردى. بۇ تۋرالى inform.kzكە سىلتەمە جاساپ Abai.kz حابارلادى. 

«ءبىزدىڭ زامان – ينتەرنەتتىڭ زامانى بولىپ تۇر. ال ينتەرنەت ساۋاتى جوق ادامدارعا ءۇن قاتۋ مۇمكىندىگىن بەرىپ وتىر. وتكەندە رەسەيدىڭ ەڭبەك ءوتىلى 15-20 جىلدان اسقان ءدىني عالىمدارى كايردە حالىقارالىق كونفەرەنتسياعا قاتىسىپ قايتتىق. سول كەزدە اراب عالىمدارى دا ايتىپ وتىر. قازىر ينتەرنەتتە ساۋاتسىز ۋاعىزشىلار قاپتاپ ءجۇر. ولاردىڭ قۇدايدى تانۋ ءىلىمى تەرەڭ بولماسا دا، تىلدەرى شەشەن. بىرنەشە حاديس پەن اياتتى جاتتاپ الىپ، سونىڭ كومەگىمەن ەلدى اۋزىنا قاراتادى. مىسالعا ۆاكتسينانى الساق، وعان قارسى نەمەسە قولدايتىن ۇستانىمدى تاڭداپ الادى دا، ءدىني تەوريادان ءۇزىندىنى قيىپ الىپ، سونى ءتۇرلى جولمەن تاراتىپ، اينالدىرادى. وسىنىڭ كومەگىمەن وقىرماندارىن كوبەيتىپ، توبىردىڭ كوڭىل كۇيىنە وينايدى. ال رەسمي ءدىن وكىلدەرى ءويتىپ توبىردىڭ، حالىقتىڭ كوڭىل-كۇيىنە ويناي المايدى. ولاردىڭ باستى مىندەتى – اعارتۋ»، - دەدى ماسكەۋلىك يمام.

ءدىني قىزمەتكەر ينتەرنەت ارقىلى يسلام قۇندىلىقتارىن بۇرمالاپ تۇسىندىرۋشىلەردىڭ كوبەيۋىنە ناعىز ءدىني ءبىلىم يەلەرىنىڭ الەۋمەتتىك جەلىگە شىعۋعا ۋاقىتى بولمايتىنى دا اسەر ەتىپ وتىرعانىن ايتتى.

«ەڭ بەدەلدى، ەڭ ساۋاتتى ءدىني قىزمەتكەرلەر ينتەرنەتتە تانىمال ەمەس. ولار كىتاپ شىعارىپ، ءدارىس وقۋى مۇمكىن. بىراق ينەترەنتتە تانىمال ەمەس. بۇل وتە ۇلكەن پروبلەما. ينتەرنەت وتە كوپ ۋاقىت پەن كۇشتى، بەلگىلى ءبىر قابىلەتتەردى قاجەت ەتەدى. ءبىز قازىر سونداي ءبىر كەزەڭدى باستان وتكەرىپ جاتىرمىز. مەديتسينا ىلىمىندە، قۇدايدى تانۋ ىلىمىندە وسى ينتەرنەتتەگى كورگەنسىزدىكتى جەڭە الامىز با، جوق پا دەگەن ماسەە تۋىنداپ تۇر»، - دەيدى يمام.

سونداي-اق، ول ۆاكتسينانى ناجىسكە تەڭەۋ قۇراننىڭ ەشبىر اياتى مەن سۇرەسىنە دە قايشى ەكەنىن ايتتى.

«قولدان وسىرگەن شەيحتەر» ادامداردىڭ ەموتسياسىنا ويناپ، ءتۇرلى تىيىمداردى ويلاپ تاۋىپ جاتىر. ونىڭ قۋاتىن ەلەستەتە دە المايسىز. بۇل ناعىز اقپاراتتىق بومبا. ۆاكتسينا –دەگەن ءناجىس دەپ تىيىم ايتا سالادى. ونى ءىلىپ اكەتىپ تاراتادى. ءبىر ءساتتىڭ ىشىندە قارالىم 100 مىڭ، ميلليون بوپ وسەدى. ال مازمۇنىندا قۇراننان العان ءبىر دە ءبىر ارگۋمەنت جوق. باستان-اياق ويدان شىعارىلعان. مۇنداي جاناما، جالعان تىيىمدارمەن كەز كەلگەن دۇنيەگە تىيىم سالىپ تاستاۋعا بولادى. ۆاكتسينانى ناجىسكە تەڭەۋ – قۇراننىڭ دا، سۇننەتتىڭ دە قاعيداتتارىمەن الىپ قاراعاندا، اقىماقتىق. كىم ويدان شىعارسا دا، ءدال ۋاقىتتىندا ويلاپ شىعارعان. اۋزىڭنان شىققان ءسوزدى ادامدار كورىپ، قىزۋ تالقىلاپ جاتسا، ادەمى شىعار. بىراق بۇل وتىرىك»، - دەدى ءشامىل الياۋتدينوۆ.

Abai.kz