ءبىزدىڭ قوعامدىق سانادا الەمدىك ساياساتتاعى وقيعالار قازاقستانعا ايتارلىقتاي اسەر ەتپەيدى، الدەكىمدەر ءوزارا جاعا جىرتىسىپ جاتسا، ودان قازاققا كەلىپ جاتقان زيان جوق سىندى تۇسىنىك كەڭ تاراعان. كەيدە وسى سىرتقى ساياساتتى قويشى، ىشتەگى شارۋانى ايتپايسىڭ با دەپ وزىمە دۇرسە قوياتىندار تابىلادى. بۇل قاتە ۇستانىم. شىندىعىندا رەسەي مەن ۋكراينا اراسىنداعى قاقتىعىس بولسىن، سيرياداعى سوعىس ارەكەتتەرى بولسىن، باسقا شيەلەنىستى جاعدايلاردىڭ ءبىزدىڭ ەلگە تەرىس ىقپالى قازىر دە جەتىپ ارتىلادى. وسىنداي قاۋىپتەردىڭ اراسىندا اۋعانىستاننىڭ ءجونى بولەك. بۇگىندە اتالعان ەلدە ەكسترەميستتەر بيلىك ءۇشىن جاپپاي شابۋىلعا كوشۋدە. باستى ماسەلەلەردىڭ ءبىرى – بۇنداعى تاليبان، ءال-قايدا، باسقا دا ءدىندى تۇرپايى ۇعىنعان راديكالدار اۋعانىستاندى باعىندىرۋمەن شەكتەلە مە؟ الگىندەي بولماسا ءبىرىنشى كەزەكتە ولار نىساناعا وڭتۇستىكتەگى وزدەرىنە وداقتاس پاكىستاندى، ءيا باتىستاعى ازۋلى دا ءدىني ۇستانىمى بولەك شيتتىك يراندى نە شىعىستاعى الپاۋىت قىتايدى ەمەس، ورتالىق ازيانى نىساناعا الۋى مۇمكىن. بۇعان سيريا مەن يراقتاعى سوعىستا ابدەن ماشىقتانعان مىڭداعان تەگى وزبەك، تاجىك، شەشەن، قىرعىز، قازاق سودىرلاردىڭ باسىم بولىگى ولاردىڭ قاراماعىنا كەلىپ قۇيىلعانىن قوسىڭىز. ماسەلەنىڭ ەكىنشى ۇشى – داعدارىستان كوز اشپاي، ءوزارا كيكىلجىڭدەرگە بوي الدىرعان ورتالىق ازيا رەسپۋبليكالارى تونگەن قاۋىپ-قاتەرگە توتەپ بەرۋگە قاۋقارلى ما؟ ونىڭ ۇستىنە اۋعانىستانداعى دۇلەي كۇشتى سوڭعى 20 جىل بويىندا تۇساۋدا ۇستاپ كەلگەن ناتو كەتۋگە شاق تۇرسا. ءتىپتى وداقتاستار ساناتىنداعى رەسەي مەن قىتاي اراشا تۇسكەن كۇندە ونداي قولعابىستىڭ قۇنى قانداي بولماق؟ اسىرەسە ونىسى ۇلكەن ساياساتتا ادەتتە تاۋەلسىزدىكتىڭ شەكتەلۋىمەن ولشەنەتىنىن ەسكەرسە. ال ەندى وزدىكىنشە حاليفات قۇرماق بولعان سول راديكالدار كەزىندە جەر-جەردەگى ساقالدى جاقتاستارىنا سۇيەنىپ سيريا، ليبيا، يراق، اۋعانىستاندى نە ىستەدى؟ تاس-تالقان ەتىپ قانعا باتىردى. ەندەشە وسىنداي قاتەرلى شابۋىلدارعا تەك سىرتتا عانا ەمەس، ىشتە دە تويتارىس بەرۋگە دايىن بولعان ءجون.

راسۋل جۇمالى

Abai.kz