مەملەكەت باسشىسى قاسىم-جومارت توقاەۆ پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جىل سايىنعى ءداستۇرلى جولداۋىن جاريالادى.

الەمدى جايلاعان پاندەميا ەلدى ەسەڭگىرەتىپ تۇرعان ۋاقىتتا قازاقستان حالقىن ناقتى ستراتەگيالىق دامۋعا باستايتىن بۇل جولداۋدا بارلىق سالا تولىقتاي قامتىلدى دەپ ايتا الامىن. اسىرەسە، پرەزيدەنت ەلىمىزدەگى دەموگرافيالىق جاعداي الاڭداتىپ وتىرعانىن ەرەكشە اتاپ ءوتتى. سونىڭ ىشىندەگى «اڭساعان ءسابي» جوباسى بالا سۇيە المياي وتىرعان وتباسىلارعا شىن قۋانىش سىيلارى انىق.

قازاق – بالاجان حالىق. «بالالى ءۇي – بازار، بالاسىز ءۇي – قۋ مازار» دەپ، قاتتى ايتسا دا، تەككە ايتپاعان. وكىنىشتىسى، بۇگىندە قازاقستانداعى ءاربىر التىنشى جۇپ ءسابي سۇيە المايدى. بۇل تۋرالى مەملەكەت باسشىسى قاسىم-جومارت توقاەۆ جولداۋىندا: «الەۋمەتتىك ساۋال قازاقستاندىقتاردىڭ شامامەن 20 پايىزى «بۇل اجىراسۋعا ۇلكەن سەبەپ» سانايتىندىعىن كورسەتتى»، - دەگەن بولاتىن. سوعان وراي، بيىلعى جولداۋدا ايتىلعانداي ەكو باعدارلاماسىمەن بەرىلەتىن كۆوتا سانى 7 ەسە كوبەيەدى.

قر دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆتىڭ مالىمەتىنشە، ەكو باعدارلاماسى ەلىمىزدە 2010 جىلدان باستاپ مەديتسينالىق كومەكتىڭ كەپىلدەندىرىلگەن كولەمىنە قوسىلعان. بۇگىندە ەلىمىزدە 26 ەكو ورتالىق جۇمىس ىستەيدى. ونىڭ 21-ءى جەكەمەنشىك سانالادى. قازىرگى ۋاقىتتا وسى ادىسپەن 22 مىڭنان استام بالا دۇنيەگە كەلدى.

مەنىڭشە، قۇپتارلىق ءىس. سەبەبى، بيىل مەملەكەت ەسەبىنەن تەگىن جاساندى ۇرىقتاندىرۋ جولىمەن ءسابيلى بولاتىن وتباسىلار سانى بىلتىرعىمەن سالىستىرعاندا 7 ەسە كوبەيىپ، شامامەن 3-4 مىڭداي شاڭىراق شاتتىققا بولەنبەكشى. وسىلايشا، ەكۇ كەزەگىندە جىلدار بويى جانارلارىنا جاس تۇنىپ تۇرعان جاندار سانى كۇرت ازايىپ، ەرتەڭگى كۇنگە ءۇمىتى ارتىپ، ىرگەسى نىعايا تۇسەتىن وتباسىلار قاتارى قالىڭداۋعا ءتيىس.

اقنۇر عانيجانقىزى، پسيحولوگ

Abai.kz