اۋعانستان بيلىگىن كۇشپەن تارتىپ العان تاليبان قوزعالىسى ايەلدەر قۇقىعىنا قاتىستى بىرقاتار شەشىمدەر قابىلداپ جاتىر. ونىڭ باسىم بولىگى ايەلدەرگە ءتۇرلى تىيىمدار سالۋدان تۇرادى. ايەلدەر ەندى بيلىكتە بولمايدى. اۋعانستان ۇكىمەتىندە بۇعان دەيىن 30 پايىز ايەلدەر بولعان ەدى. 

تاليبان جاڭا زاڭ قابىلدادى. ول «نەگىزدەر» دەپ اتالىپ، قوعامداعى قاتىناستاردى رەتتەپ وتىراتىن قۇقىقتىق قۇجات بولماق. قۇجات جۇمىس ىستەۋ، سويلەۋ، ءدىني جورالعىلاردى ورىنداۋ سىندى ءتۇرلى سالالاردى قامتيدى.

The Guardian-نىڭ جازۋى بويىنشا، تالىبتەر بيلىكتى العان ساتتە ايەل قۇقىعىنا كوڭىل بولەمىز دەگەن ۋادەسىندە تۇرماعان. 1990 جىلدارى بيلىكتى باسىپ العانداعى ادەتىن قازىر قايتا ىسكە اسىرا باستاعان.

سوڭعى كۇندەرى تالىبتەر ايەلدەر مەن قىزدارعا قاتىستى وننان استام ەرەجەلەردى بەكىتتى. ەرەجەلەر بويىنشا قىزدار ازىرگە مەكتەپكە ورالىپ، وقۋلارىن جالعاستىرا المايدى. ال ۇلدار وتكەن اپتادا وقۋعا كىرىسكەن بولاتىن. ال ستۋدەنتتەر ءبولىنىپ، سەگرەگاتسيانى ساقتاپ ءبىلىم الاتىن بولادى. ونىڭ ۇستىنە ولار يسلامدىق درەسس-كودتى ساقتاۋى ءتيىس.

وتكەن جۇمادا تالىبتەر ايەلدەر ءىسى بويىنشا مينيسترلىكتى جاۋىپ، ونىڭ ورنىنا يسلام نەگىزىن ۇستانۋ بويىنشا ورگان قۇردى. بۇل وزگەرىسكە كابۋلدا ونداعان ايەل قارسى شىعىپ، «ايەل بەلسەندى ەمەس قوعام - ءولى قوعام» دەپ ۇرانداتقان بولاتىن. الايدا تالىبتەر نارازى ايەلدەر توبىن گاز شاشىپ، تاياقپەن ۇرىپ، تاراتىپ جىبەردى.

كابۋل باسشىسىنىڭ مىندەتىن ۋاقىتشا اتقارۋشى حامدۋللا ناموني العاشقى پرەسس-كونفەرەنتسياسىن بەردى. ول تاليبان بيلىككە كەلگەنگە دەيىن قالا اكىمدىگىندەگى قىزمەتكەرلەردىڭ ۇشتەن ءبىر بولىگى ايەلدەر بولعانىن ايتتى. ول ەندى اكىمدىكتە قىزمەت ەتكەن ايەلدەر ۇيدە وتىرىپ، نۇسقاۋلىق كۇتۋ كەرەكتىگىن مالىمدەدى. ول ازىرگە قوعامدىق دارەتحانالاردا قىزمەت ەتەتىن، ينجەنەرلىك بولىمدە جۇمىس ىستەيتىن ايەلدەرگە عانا رۇقساتتىڭ بارىن جەتكىزدى.

ناموني سونىمەن قاتار، تالىبتەر كابۋلدەگى بىرقاتار شەكتەۋلەردى الىپ جاتقانىن دا ەسكەرتتى. بۇعان دەيىن مينيسترلىك پەن پرەزيدەنت سارايى الدىنا قورشاۋلار قويىلعان بولاتىن، ەندى ولاردى الىپ تاستاۋدا.

تالىبتەر ايەل كاسىپكەرلەرگە دە كاسىپتەرىن كۇيەۋلەرىنە نە اعا-ىنىلەرىنە وتكىزۋدى بۇيىرعان. اۋعانستاندا تالىبتەردىڭ بيلىگى ورناعانعا دەيىن 1000-نان استام ايەل كاسىپپەن اينالىسقان بولاتىن. بۇعان دەيىن تاليبان قوزعالىسى ايەلدەرگە كاسىبي سپورتپەن اينالىسۋعا تىيىم سالعان-دى.

Abai.kz