جاھاندىق سىناقتارعا لايىقتى جاۋاپ بەرۋ ءۇشىن مەدياعا دەگەن جاۋاپكەرشىلىك كۇن ساناپ ارتىپ كەلەدى. بۇل تۋرالى «Astana Media Week – 2021» مەديا اپتالىعىن اشقان قر اقپارات جانە قوعامدىق دامۋ ءمينيسترى ايدا بالاەۆا ايتتى. بۇل تۋرالى inform.kzكە سىلتەمە جاساپ Abai.kz حابارلايدى. 

«بيىل بەسىنشى رەت ءوتىپ وتىرعان Astana Media Week اپتالىعىنا حوش كەلدىڭىزدەر! جىل سايىن وتەتىن اقپارات اپتالىعى – الەمدىك مەديا ۇزدىكتەرىنىڭ پىكىر الماسىپ، تاجىريبە بولىسەتىن ءداستۇرلى ديالوگ الاڭىنا اينالدى. بۇگىنگى زامان – دامىعان اقپارات ءداۋىرى. سوندىقتان، جاھاندىق سىناقتارعا لايىقتى جاۋاپ بەرۋ ءۇشىن مەدياعا دەگەن جاۋاپكەرشىلىك كۇن ساناپ ارتىپ كەلەدى. سەبەبى بۇگىنگى قوعامنىڭ اقپارات الۋعا دەگەن سۇرانىسى دا، تالعامى دا وزگەردى. بۇل ءوز كەزەگىندە، ۇنەمى ۇزدىكتەر قاتارىنان كورىنىپ، باسەكەگە قابىلەتتى بولۋدى تالاپ ەتەتىنى داۋسىز. بۇل مەديا اپتالىقتىڭ اتاۋى – «فاكتىلەر مەن ەموتسيالار». سوڭعى 1,5 جىلدىڭ ىشىندە ادامزاتقا ەموتسيالىق قىسىم كۇشەيدى. اقپاراتپەن بىرگە بەرىلەتىن قىزبالىق ونى قابىلداۋ اسەرىن بىرنەشە ەرتە كۇشەيتەدى. سونىمەن قاتار فەيكتەر مەن ينفودەميانىڭ قازىرگى الەمىندە مىقتى، تەكسەرىلگەن فاكتى ءجۋرناليستىڭ كاسىبيلىگىنىڭ نەگىزگى بەلگىسى سانالادى. قوعامىمىز بەتپە-بەت كەلگەن قيىندىقتارعا قاراماستان ءبىز شەكسىز مۇمكىندىكتەر داۋىرىندە ءومىر ءسۇرىپ جاتقانىمىزعا نىق سەنىمدىمىن»، - دەدى مينيستر.

سونىمەن قاتار ول پاندەميا كەزىندەگى جۋرناليستيكانىڭ ايرىقشا ميسسياسىن، ونىڭ ەلدەگى تۇراقتىلىقتى ساقتاۋداعى، سەنىمدى ءارى تۇپكىلىكتى اقپاراتپەن قامتاماسىز ەتۋدەگى ءرولىن ەرەكشە اتاپ ءوتتى.

«وسىناۋ ەكى كۇندە ءبىزدى ونلاين جانە وفلاين الاڭدارداعى ءىس-شارالار كۇتىپ تۇر. ءبىز جۇزبە-ءجۇز جانە قاشىقتان اڭگىمەلەسۋ باسىمدىقتارىن بىرىكتىردىك. نيەت تانىتقان بارلىق ادام ءىس-شارالاردىڭ ونلاين-ترانسلياتسيادان كورە الادى. مەديا اپتالىقتىڭ جۇمىسىنا الەمدىك بەدەلدى باق-تىڭ توپ-مەنەدجەرلەرى، مەملەكەتتىك اپپارات وكىلدەرى، اقش، ۇلىبريتانيا، رەسەي، قازاقستان، وزبەكستان، قىرعىزستاننان تانىمال جۋرناليستەر، دوكۋمەنتاليستەر جانە بلوگەرلەر قاتىسادى»، - دەدى ول.

مينيستر «Astana Media Week» الەمدىك مەدياداعى ماقساتى – ورتاق، باعىتى – ءبىر، كاسىبي مامانداردى ءبىر ارناعا توعىستىراتىن بىرەگەي جوبا ەكەندىگىن باسا ايتتى.

«ەڭ باستىسى – وسىنداي ورتاق الاڭداردا ءوزارا جاقىن تانىسىپ، پايدالى كەڭەستەر تىڭداۋعا مۇمكىندىك الۋ – مەديا سالانىڭ ناتيجەلى دامۋىنا تىڭ سەرپىن بەرەدى دەپ سەنەمىن! بارشاڭىزعا جەمىستى دە ناتيجەلى جۇمىس تىلەيمىن!»،- دەدى ايدا بالاەۆا.

Abai.kz