27-قازان كۇنى پەنجىم اۋىلىندا بولعان وقيعاعا قاتىستى قازاقستان حالقى اسسامبلەياسى دا ۇندەۋ جاسادى. ۇندەۋدى قازاقستان حالقى اسسامبلەياسىنىڭ رەسمي وكىلى بەكباەۆا مايا تولەگەنقىزى جاساعان. 

"قۇرمەتتى قازاقستاندىقتار!

كەشە كۇندىزگى ۋاقىتتا الماتى وبلىسى پانفيلوۆ اۋدانى پەنجىم اۋىلىنىڭ جەرگىلىكتى مەكتەبىندە ەكى جوعارى سىنىپ تۇلەكتەرىنىڭ اراسىندا كەلىسپەۋشىلىك تۋىنداپ، وقۋشىلار اراسىندا توبەلەسكە ۇلاستى. وكىنىشكە وراي، توبەلەس بارىسىندا وقۋشىلاردىڭ ءبىرى زارداپ شەكتى، وعان قاجەتتى كومەك كورسەتىلدى. ول قازىر اۋرۋحانادا دارىگەرلەردىڭ باقىلاۋىندا.

كەشكە اۋىلدا جەرگىلىكتى تۇرعىندار جينالىپ، مەكتەپ اۋماعىندا بولعان توپتىق توبەلەس سالدارىنان اتالمىش جاعدايدىڭ ورىن الۋىنا بايلانىستى نارازىلىقتارىن ءبىلدىردى. سونىمەن قاتار كەيبىر جاسوسپىرىمدەر مەن جاستار ەموتسيانىڭ جانە ارانداتۋشىلاردىڭ اسەرىنەن بىرنەشە جەكە ۇيلەر مەن كولىكتەردىڭ اينەكتەرىن سىندىرعان.

اۋىل تۇرعىندارى اراسىندا، ەتنوسارالىق نەگىزدە قانداي دا ءبىر جانجالدىڭ، اسىرەسە قاقتىعىستاردىڭ جوق ەكەندىگىن جانە وعان جول بەرىلمەيتىندىگىن ەرەكشە اتاپ وتكىم كەلەدى.

جەرگىلىكتى تۇرعىندار - قازاقتار دا، ۇيعىرلار دا كوپ جىلدار بويى بىرگە تۇرىپ كەلەدى، ءبىر ءبىرىنىڭ دوستارى مەن كورشىلەرى بولىپ تابىلادى، ولاردىڭ بارلىعى شىن جۇرەكتەن بەيبىتشىلىك پەن تىنىشتىقتى قالايدى.

جەرگىلىكتى اتقارۋشى جانە قۇقىق قورعاۋ ورگاندارىنىڭ وكىلدەرى، قازاقستان حالقى اسسامبلەياسى توراعاسىنىڭ قوعامدىق ورىنباسارى زاكىرجان كۇزيەۆ، قحا حاتشىلىعى جانە وبلىستىق ىشكى ساياسات باسقارماسىنىڭ ەتنوسارالىق قاتىناستار ماسەلەلەرى جونىندەگى ءبولىمىنىڭ باسشىسى م.باتىربەكوۆ جانە "قوعامدىق كەلىسىم" كمم ديرەكتورى قوعامدىق ءتارتىپتى قامتاماسىز ەتۋدە. ولارمەن بىرگە اقساقالدار، جيگيت-بەشي، ازاماتتىق قوعام وكىلدەرى جۇمىس ىستەيدى.

قازىرگى ۋاقىتتا پەنجىم اۋىلىنداعى جاعداي تۇراقتى", - دەيدى مايا بەكباەۆا.

پەنجىم اۋىلىنداعى مەكتەپ وقۋشىلارى اراسىنداعى توبەلەستە 16 جاستاعى بالا اۋىر جاراقات الىپ، اۋرۋحاناعا تۇسكەن ەدى. ارتىنشا اۋىل ازاماتتارى اراسىندا كيكىلجىڭ بولىپ، جانجال تۋىنداعان. بيلىك وقيعانىڭ ەتنيكالىق سيپاتى جوق دەگەن ۇستانىمدا.

Abai.kz