قازاقستان رەزەرۆتىك اسكەري جۇيەنى ەنگىزبەك. زاپاستاعى اسكەري قىزمەتتى ەنگىزۋ بەيبىت ۋاقىتتا اسكەر سانىن ۇلعايتپاي، وقىتىلعان جانە دايىندالعان اسكەري قىزمەتشىلەردىڭ قوسىمشا سانىن الۋعا مۇمكىندىك بەرەدى.

قر قورعانىس مينيسترلىگى ۇيىمداستىرۋ-جۇمىلدىرۋ جۇمىستارى دەپارتامەنتىنىڭ وكىلى پودپولكوۆنيك بەرىك سۇلەيمەنوۆ رەزەرتۆتىك قىزمەت ءتۇرىنىڭ ەرەكشەلىكتەرىنە توقتالدى.

"شەتەل ەلدەرىنىڭ تاجىريبەسىن تالداۋ، زاپاستاعى قىزمەت قارۋلى كۇشتەردىڭ سانىن كوبەيتپەي-اق ونىڭ جاۋىنگەرلىك ۇتقىرلىعىن ارتتىرۋعا مۇمكىندىك بەرەتىنىن كورسەتەدى. سونداي-اق، رەزەرۆتەگى قىزمەتتى ەنگىزۋ اسكەرلەردىڭ كەپىلدىك بەرىلگەن جاساقتالۋىن قامتاماسىز ەتۋ ءۇشىن قاجەت. 

ءوز كەزەگىندە، زاپاستاعى قىزمەتتى ەنگىزۋ اسكەري بولىمدەردىڭ شىعۋ ۋاقىتىن ايتارلىقتاي قىسقارتادى، جۇمىسسىز ازاماتتاردى، سونداي-اق جۇمىسپەن قامتىلعان ازاماتتاردى قوسىمشا تابىس الۋعا مۇمكىندىك بەرەدى", - دەدى ول.

ول زاڭ قابىلدانعاننان كەيىن رەزەرۆتەگىلەرمەن وقۋ-جاتتىعۋ جيىنىن وتكىزۋ مەرزىمى تۋرالى دا ايتا كەتتى. "زاڭ قابىلدانعاننان كەيىن 3 جىل مەرزىمگە زاپاستاعى اسكەري قىزمەتشىلەرمەن كەلىسىمشارت جاسالادى. رەزەرۆتەر جىل سايىن 60 كۇن بويى وقىتىلاتىن بولادى. ونىڭ ىشىندە 30 كۇن اسكەري دايىندىقتان جانە اي سايىن ەكى-ءۇش كۇندىك جاۋىنگەرلىك دايىندىقتان وتەدى", — دەدى سۇلەيمەنوۆ.

ونىڭ ايتۋىنشا، رەزەرۆشىلەردى ۇستاۋ شىعىندارى رەسپۋبليكالىق بيۋدجەت ەسەبىنەن ۇسىنىلىپ وتىر. "ارينە، بۇل قولدانىستاعى زاڭناماعا ءتيىستى وزگەرتۋلەر مەن تولىقتىرۋلار ەنگىزىلگەننەن كەيىن قامتاماسىز ەتىلەدى. قازاقستان رەسپۋبليكاسىندا 2022 جىلدىڭ 1 قاڭتارىنان باستاپ قازاقستان رەسپۋبليكاسى پرەزيدەنتىنىڭ جولداۋىنا سايكەس رەزەرۆتەگىلەرگە ەڭ تومەنگى جالاقىنى اي سايىن تولەۋ جوسپارلانۋدا. ول كورسەتكىش 2022 جىلدىڭ قاڭتارىنان باستاپ 60 مىڭ تەڭگە بولماق.

سونداي-اق اسكەري دايىندىق كەزەڭىندە نەگىزگى جۇمىسى بار زاپاستاعى اسكەري قىزمەتشىلەرگە زاپاستاعى قىزمەتكەردىڭ ورتاشا ايلىق جالاقىسى كولەمىندە تولەماقى بەرىلەدى", - دەدى بەرىك سۇلەيمەنوۆ.

پودپولكوۆنيك زاپاستاعى ساربازداردىڭ باسقا قالالارعا قىزمەت وتكەرۋ ءۇشىن جىبەرىلۋ-جىبەرىلمەيتىنىنە دە تۇسىنىك بەردى. "زاپاستاعى قىزمەتتىڭ ءوزى اۋماقتىق، ياعني زاپاستاعى ءوزىنىڭ تۇرعىلىقتى جەرى بويىنشا اسكەري قىزمەت بولعاندىقتان، باسقا قالالارعا اسكەري قىزمەتكە جىبەرىلمەيدى. ويتكەنى بۇل زاپاستاعى ساربازدىڭ اسكەري بولىمگە تەزىرەك كەلۋىنە مۇمكىندىك بەرەدى", - دەدى ۇيىمداستىرۋ-جۇمىلدىرۋ جۇمىستارى ءبولىمىنىڭ وكىلى.

سۇلەيمەنوۆ اسكەري بورىشىن وتەۋگە جاتاتىن ازاماتتاردىڭ زاپاستاعى اسكەري بورىشىن وتەۋدىڭ قانداي ارتىقشىلىقتارى بار ەكەنىن اتاپ ءوتتى. "زاپاستاعى اسكەري قىزمەت يدەياسىنىڭ قارۋلى كۇشتەر ءۇشىن دە، ازاماتتاردىڭ وزدەرى ءۇشىن دە ارتىقشىلىعى بار. ازاماتتار ءۇشىن زاپاستاعى اسكەري بورىشىن وتەۋ كەزىندە ولار جۇمىس ورنىمەن قاتار، اتقاراتىن لاۋازىمى دا ساقتالادى. اسكەري دايىندىق كەزەڭى، سونداي-اق ەكى-ءۇش كۇندىك جاۋىنگەرلىك دايارلىق ساباقتارى وتكىزىلگەن كەزدە ولار نىساندى كيىممەن، تاماقپەن، سونداي-اق وقۋ-جاتتىعۋ جيىندارى وتەتىن جەرلەردە تۇرۋمەن قامتاماسىز ەتىلەدى.

وسى كەزەڭدە ولارعا مەديتسينالىق كومەك كورسەتىلەدى جانە بۇل كەزەڭ ولاردىڭ ەڭبەك وتىلىنە قوسىلادى. ال جوعارىدا ايتقانىمداي، تولەمدەر زاپاستاعى قىزمەت وتكەرۋ ءۇشىن كەلىسىم-شارت جاساسقان كەزەڭگە قاراستىرىلعان", - دەپ قورىتىندىلادى ۇيىمداستىرۋ-جۇمىلدىرۋ جۇمىستارى باسقارماسىنىڭ وكىلى پودپولكوۆنيك سۇلەيمەنوۆ. قازاقستان 2023 جىلدان باستاپ رەزەرۆتىك اسكەري جۇيەنى ىسكە قوسۋعا ىنتالى.

Abai.kz