8 قاراشادا نۇر-سۇلتانداعى حالىققا قىزمەت كورسەتۋ ورتالىعى ماڭىنا 100-دەن استام جۇرگىزۋشى جينالىپ، رەسەي ءنومىرىن تاققان كولىكتەرگە قىسىم جاساماۋعا شاقىردى.

جۇرگىزۋشىلەر سوزىنشە، رەسەي ءنومىرلى كولىكتەردى كەيىنگى كۇندەرى جول پوليتسيا ءجيى توقتاتىپ، تەكسەرۋدى كۇشەيتكەن. جۇرگىزۋشىسىنە ايىپپۇل سالىپ، كولىكتىڭ ءوزىن ايىپپۇل تۇراعىنا الىپ كەتكەن جاعدايلار كوبەيە باستاعان.

وسىدان 6 اي بۇرىن رەسەيدەن 4 ميلليون تەڭگەگە كولىك ساتىپ العان ول ءدال سونداي كولىك قازاقستاندا 8 ميلليون تۇراتىنىن ايتادى. ويتكەنى قازاقستاندا كولىكتى مەملەكەتتىك تىركەۋگە قويۋ وتە قىمبات. ءوزى ءمىنىپ جۇرگەن كولىكتى تىركەۋ ءۇشىن 3-4 ميلليون تەڭگە تولەۋگە ءتيىس.

نارازىلىققا جينالعاندار "ارمەنيادان اكەپ، تىركەلمەي جۇرگەن كولىكتەرگە ۋاقىتشا سارى ءنومىر بەرىپ، بيلىك جەڭىلدىك جاسادى، بىزگە دە ءسويتسىن نەمەسە مەملەكەتتىك تىركەۋدى قاراپايىم حالىقتىڭ قالتاسى كوتەرەتىندەي ەتىپ ارزانداتسىن" دەگەن تالاپتار قويدى.

قازاقستاندا شەتەل نومىرىمەن جۇرگەن كولىكتەرگە بايلانىستى ماسەلە بۇرىن دا كوتەرىلگەن. ارمەنيادان كولىك اكەلىپ، قازاقستانعا تىركەمەي جۇرگەندەرگە 2019 جىلى جاپپاي تەكسەرۋ باستالعاندا جۇرگىزۋشىلەر وسىعان ۇقساس تالاپ ايتىپ، قازاقستاننىڭ ءار وڭىرىندە نارازىلىققا شىققان. سودان كەيىن بيلىك ولارعا "راقىمشىلىق" جاساپ، ارمەنيا، قىرعىزستان، رەسەيدەن اكەلگەن كولىكتەردى 2020 جىلدىڭ 1 اقپانىنان باستاپ ۋاقىتشا تىركەۋگە قويىپ، ارناۋلى سارى ءنومىر بەرگەن.

Abai.kz