ازىرگە قازاقستاندا باتىس كومپانيالارى ازىرلەگەن كوروناۆيرۋسقا قارسى "كوميرناتي" (Pfizer) ۆاكتسيناسىنىڭ ءبىرىنشى دوزاسى 1560 ادامعا سالىندى.

Informburo سايتىنىڭ جازۋىنشا، ەكپە العانداردىڭ كوبى الماتىدا تۇرادى. بۇعان دەيىن قالادا 1152 ادامعا Pfizer سالىنعانى حابارلانعان.

قازاقستاندا تىركەلگەن التىنشى ەكپە – Pfizer ۆاكتسيناسىنىڭ العاشقى پارتياسى الماتىعا 10 قاراشادا جەتكىزىلگەن بولاتىن. 12 قاراشادان بەرى سالىنا باستادى.

Pfizer نەگىزىنەن:

• 12-17 جاستاعى جاوسپىرىمدەرگە;
• 16-37 اپتا ارالىعىندا جۇكتى ايەلدەرگە;
• بوسانعانىنا كەمىندە 42 كۇن بولعان بالا ەمىزىپ جۇرگەن ايەلدەرگە سالىنادى.

ۆاكتسينا ءبىلىم مەكەمەلەرى مەن ەكپە پۋنكتەرىندە سالىنىپ جاتىر. بۇعان دەيىن دەنساۋلىق ساقتاۋ مينيسترلىگى بالالارعا اتا-اناسى نەمەسە قامقورشىسىنىڭ رۇقساتىمەن عانا ەكپە سالىناتىنىن حابارلاعان.

ءبىر كۇن بۇرىن الەۋمەتتىك جەلىدە كەيبىر اتا-انالار Pfizer سالۋعا ساناۋلى عانا اتا-انا رۇقسات بەرگەنىن، "مۇنداي قارقىنمەن كوۆيدتى جەڭە المايمىز" دەپ الاڭداعان.

16 قاراشادا دەنساۋلىق ساقتاۋ ءمينيسترى الەكسەي تسوي Pfizer ۆاكتسيناسىن اقىلى تۇردە سالۋ مۇمكىندىگىن قاراستىراتىن قاۋلى ازىرلەنىپ جاتقانىن حابارلادى. ونىڭ ايتۋىنشا، پرەمەر-مينيستر اسقار مامين ۇسىنىستى قولداعان. ازىرگە ۆاكتسينا قۇنى بەلگىسىز.

بۇرىن قازاق ۇكىمەتى رەسەيلىك "سپۋتنيك V" ەكپەسىنىڭ ەكى دوزاسىن ەلگە الىپ كەلۋگە 26 دوللار جۇمسالدى دەپ ايتقان.

Abai.kz