قر پارلامەنتى ءماجىلىس دەپۋتاتى قازىبەك يسا دەنساۋلىق ساقتاۋ ۆيتسە-ءمينيسترى ءارى قر باس مەملەكەتتىك سانيتاريالىق دارىگەرى ەرلان قياسوۆتى قازاق تىلىندە سويلەمەگەنى ءۇشىن سىناپ تاستادى دەپ حابارلايدى Dalanews.kz.

ءوز كەزەگىندە ءتىل جاناشىرى، ءماجىلىس دەپۋتاتى قازىبەك يسا ەرلان قياسوۆقا بىلايشا رەنىشىن جەتكىزدى.

– ءۇش دەپۋتات قازاقشا سۇراق قويدى، ءسىز ورىسشا جاۋاپ بەرىپ جاتىرسىز. جالپى جيىن بويى 15-20 شاقتى ادام ءسوز الدى، سوندا ەكى-اق ادام قازاقشا سويلەدى. ولار – ماقسات بەردىقۇلوۆ (ۆەتەريناريا بويىنشا ۇلتتىق رەفەرەنتتىك ورتالىق ديرەكتورى) پەن قۋانىش اسىلحانۇلى ء(بىلىم جانە عىلىم ۆيتسە-ءمينيسترى). ەلوردادا جۇرگەندە قازاقشا سويلەيتىن ادام كورسەڭ، شەتەلدە قازاق كورگەندەي قۋاناسىڭ. وسى ەكى باۋىرىم ءۇشىن قۋانىپ وتىرمىن. بىراق ەرلان اڭساعانۇلى (قياسوۆ) ءۇشىن قۋارىپ وتىرمىن، – دەدى قازىبەك يسا.

دەپۋتات قياسوۆتان ءوز سۇراعىنا جاۋاپ الا الماي جۇرگەنىن دە ەسكە سالدى.

ايتا كەتەيىك، ماجىلىستە «قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى» دەپ اتالاتىن زاڭ جوباسىن تالقىلاۋعا دوڭگەلەك ۇستەل وتىرىسى بولدى. وعان ءماجىلىس كوميتەتىنىڭ دەپۋتاتتارى، جۇمىس توبىنىڭ مۇشەلەرى، دەنساۋلىق ساقتاۋ ۆيتسە-ءمينيسترى ءارى قر باس مەملەكەتتىك سانيتاريالىق دارىگەرى ەرلان قياسوۆ، قر اۋىل شارۋاشىلىعى ۆيتسە-ءمينيسترى رۇستەم قۇرمانوۆ، قر ءبىلىم جانە عىلىم ۆيتسە-ءمينيسترى قۋانىش ەرعاليەۆ قاتىستى.

سونداي-اق بەينەكونفەرەنتسبايلانىس قۇرالدارى ارقىلى بيولوگيالىق، مەديتسينالىق تەحنولوگيالار، بيولوگيالىق قاۋىپسىزدىك، ەكولوگيا، عىلىمي زەرتتەۋلەر سالاسىنداعى قىزمەتتى جۇزەگە اسىراتىن ۇلتتىق ورتالىقتار مەن ينستيتۋتتاردىڭ باسشىلارى، مۇددەلى مينيسترلىكتەر مەن ۆەدومستۆولاردىڭ وكىلدەرى قاتىسقانىن ايتا كەتۋىمىز كەرەك. عىلىمي مەكەمە باسشىلارىنىڭ باياندامالارى مەن دەنساۋلىق ساقتاۋ مينيسترلىگى وكىلىنىڭ جاۋاپتارى ورىس تىلىندە بولعانى راس.

Abai.kz