نۇر-سۇلتان قالاسىندا ەلوردا كۋبوگى ءۇشىن جايدارمان ويىنى ءوتتى. سايىسقا تەك قازاقستاندىق ەمەس، شەتەلدىك كوماندا دا قاتىستى.

جايدارمان ويىندارى بۇگىندە تەك وتاندىق ەمەس، سونداي-اق كورشىلەس مەملەكەتتەردىڭ دە اسىعا كۇتەتىن جوباسىنا اينالدى. ءار ەفيرىن تاعاتسىز كۇتەتىن كورەرمەنگە بۇگىندە بۇل ويىن ساپالى دۇنيە كورسەتۋىن جالعاستىرىپ كەلەدى. كەزەكتى جوبالاردىڭ ءبىرى رەتىندە14 قاراشا كۇنى وتكەن "ەلوردا كۋبوگى-2021" ارنايى جوباسىن اتاپ وتۋگە بولادى. ەلىمىزدىڭ ۇزدىك كوماندالارىنان بولەك، وزبەكستاندىق "بۇحارا" كومانداسى قاتىسىپ، بۇل سايىستىڭ دارەجەسىن حالىقارالىق دەڭگەيگە كوتەرىپ تاستادى. تۇركى تىلدەس كورشىلەرىمىزگە قازاق ساحناسىندا ويناۋ اسا قيىندىق تۋدىرماعانى انىق. كەلگەن كورەرمەن قوناقتارىمىزدى قوشەمەتپەن قارسى الىپ، قوشەمەتپەن شىعارىپ سالدى.

ايتا كەتەيىك، بۇل ويىن نۇر-سۇلتان قالاسى جاستار ساياساتى ماسەلەلەرى باسقارماسى قولداۋىمەن، "قازاقستان كۆن وداعى" رجقب ۇيىمداستىرۋىمەن وتكەن ەدى. قازىلار القاسى ۇزدىك ءۇش كوماندانى انىقتاپ، ولارعا ارنايى جۇلدەلەردى ۇسىندى. ويىن قورىتىندىسى بويىنشا سەمەيدەن كەلگەن "قىزدار ەمەس" كومانداسى ءۇشىنشى ورىن، الماتىلىق "اقپەن بىرگە" كومانداسى ەكىنشى ورىن يەلەندى. ەڭ ۇزدىك دەپ تانىلىپ، باس جۇلدەنى يەلەنگەن — ەلوردالىق "شابىت" قۇراماسى.

كوماندالىق كورسەتكىشتەن بولەك، جەكە شەبەرلىگىمەن كوزگە ءتۇسىپ، "ۇزدىك ويىنشى" دەگەن اتقا لايىق جايدارمانشى دا انىقتالدى. ول الماتىلىق "ارنايى ادىلەت ءۇشىن" كومانداسىنىڭ مۇشەسى شىڭعىسحان ەسىمدى جايدارمانشى. ويىننىڭ بارلىق قىزىقتارى تەلەارنادان جەلتوقسان ايىندا كورسەتىلەدى.

Abai.kz