مارعۇلاندى كىمدەر سوتقا بەرگەنىنە قاراپ-اق، بۇل ادىلەتسىزدىك بولعانىن بىلەسىڭ…

«ءبىز ۇلتتىق مۇددەنى اسپەن دە، تاسپەن دە قورعاۋعا دايىن بولۋىمىز قاجەتتىگىن تاعى دا باسا ايتقىم كەلەدى»
قر پرەزيدەنتى ق.توقاەۆ

بيىل تاۋەلسىزدىگىمىزدىڭ 30 جىلدىق مەرەكەسى!

الاش كوسەمى ءاليحان بوكەيحاننىڭ 155 جىلدىعى!

تاۋەلسىزدىك قارلىعاشى - جەلتوقسان كوتەرىلىسىنىڭ 35 جىلدىعى!

تۋرا بۇگىن، 12 جەلتوقسان - 1917 جىلى الاش وردا اۆتونوميادىق ۇكىمەتىنىڭ قۇرىلعانىنا 104 جىل!

كەشە عانا قاراعاندى قالاسىنداعى وكتيابر اۋدانى ءاليحان اۋدانى بولىپ وزگەرتىلگەنى تۋرالى شەشىم شىقتى!

«الاش اقىرى وكتيابردى جەڭدى! وكتيابر اتى ءوشىپ، ءاليحان اۋدانىنا اينالدى!»، - دەپ قۋانا جازدىق!

ال سول قاراعاندىنىڭ تۋماسى، ءاليحان باستاعان الاش ارىستارىن ۇلىقتاۋدى ناسيحاتتاپ جۇرگەن بەلگىلى قوعام قايراتكەرى مارعۇلان بورانباي سەپاراتيزمگە قارسى شىعىپ، تاۋەلسىزدىگىمىزدى، ۇلتتىق مۇددەمىزدى قورعاعانى ءۇشىن تۇرمەدە وتىر…

قاراعاندىداعى اۋداننان وكتيابردىڭ اتى وشكەنمەن، سول اۋداندا تۋىپ-وسكەن مارعۇلانعا وكتيابر بولشەۆيكتەرىنىڭ تىرناعى ءالى باتىپ وتىر…

تاۋەلسىز مەملەكەتىمىزدىڭ قازىرگى كونستيتۋتسيالىق قۇرىلىسىنا قارسى سولشىل كوممۋنيستەرگە اشىق باتىل قارسى شىعىپ، قر پرەزيدەنتى ق.توقاەۆ ايتقانداي: «تاۋەلسىزدىكتى اسپەن دە، تاسپەن دە قورعاپ»، ۇلتتىق مۇددەمىز ءۇشىن، ءتىلىمىز ءۇشىن كۇرەسىپ جۇرگەن مارعۇلانعا جاۋلارى جالا جاۋىپ، اباقتىعا جاپتى. «جالا جاپتى» دەپ جالاڭ ايتا سالىپ وتىرعان جوقپىز، تومەندەگى باس پروكۋرورعا جازعان حاتىمىزدا بۇنى مارعۇلاننىڭ ادۆوكاتى ا.بايداروۆ ايقىن دالەلدەپ كورسەتىپ بەرگەن.

ءيا، ءبىز، «اق جول» پارتياسى باسشىلارى، ءماجىلىس دەپۋتاتتارى ازات پەرۋاشەۆ، قازىبەك يسا، بەرىك دۇيسەمبينوۆتەر مارعۇلان بورانبايدىڭ ادۆوكاتى ا.بايداروۆتىڭ جازعان ارىزىنا بايلانىستى قازاقستان رەسپۋبليكاسىنىڭ باس پروكۋرورى ع.د. نۇرداۋلەتوۆكە ەكى رەت حات جولدادىق. الدىمەن بيىلعى كوكتەمنىڭ باسىندا جازعان حاتىمىزبەن تارىستىرايىق.

قازاقستان رەسپۋبليكاسىنىڭ
باس پروكۋرورى
ع.د. نۇرداۋلەتوۆكە

قۇرمەتتى عيزات داۋرەنبەكۇلى!

«اق جول» قازاقستاننىڭ دەموكراتيالىق پارتياسىنا قر قك 174-بابىنىڭ 2-بولىگى، 179-بابىنىڭ 2-بولىگىمەن قاراستىرىلعان قۇقىق بۇزۋشىلىق ءۇشىن ايىپ تاعىلىپ وتىرعان مارعۇلان بورانباەۆتىڭ ادۆوكاتى ا. ە. بايداروۆتىڭ قورعاۋىنداعى ادامعا قاتىستى تەرگەۋ بارىسىندا ورىن العان بۇزۋشىلىقتار جونىندە ارىز حاتى كەلىپ ءتۇستى.

ارىز حاتتا، م.بورانباەۆقا قاتىستى قوزعالعان قىلمىستىق ءىستى تەرگەۋ الماتى قالالىق پوليتسيا دەپارتامەنتى تاراپىنان زاڭسىز جۇرگىزىلۋى جونىندە باياندالىپ وتىر.

اتاپ ايتقاندا، تەرگەۋ رەتتىلىگى بۇزىلعان، ياعني قر قىلمىستىق كودەكسىنىڭ 179-بابىمەن تەرگەۋ، قر قىلمىستىق-پروتسەستىك كودەكسىنىڭ 187-بابىنىڭ 1-بولىگىنىڭ تالاپتارىنا سايكەس، ۇلتتىق قاۋىپسىزدىك كوميتەتى ورگاندارىمەن جۇرگىزىلۋ ءتيىس بولاتىن. ەكىنشىدەن، پوليتسيانىڭ تەرگەۋشىلەرى تاراپىنان، ءىس بىرجاقتى تۇردە تەرگەلىپ، قورعاۋ تاراپىنىڭ زاڭدى، نەگىزدى ۋاجدەرى نازارعا الىنباۋدا. وسىنىڭ نەگىزىندە، ارىز حات يەسى، الماتى قالاسىنىڭ پوليتسيا دەپارتامەنتىنىڭ بۇنداي ساناتتى ىستەردى تەرگەۋگە ۋاكىلەتتىگى جانە قۇزىرەتى جوق ەكەندىگىن العا تارتا وتىرىپ، بۇل بەلگىلەر تەرگەۋدىڭ وبەكتيۆتىلىگى مەن بەيتاراپتىعىنا كۇمان كەلتىرەدى.

سونىمەن قاتار، قر قپك 272-بابىنىڭ 4-بولىگىمەن كوزدەلگەن، سوت ساراپتاماسىنىڭ تاعايىندالعانى تۋرالى قاۋلىمەن كۇدىكتىنى، ايىپتالۋشىنى، ونىڭ قورعاۋشىسىن، جابىرلەنۋشىنى، ونىڭ وكىلىن، سونداي-اق ساراپتاماعا ۇشىرايتىن كۋانى، ونىڭ ىشىندە قورعالۋعا قۇقىعى بار كۋانى ونىڭ زاڭدى وكىلىن تانىستىرادى جانە ولارعا وسى كودەكستىڭ 274-بابىندا كوزدەلگەن قۇقىقتارىن تۇسىندىرەتىنى تۋرالى پروتسەستىك زاڭ تالاپتارى ساقتالماعان. م. بورانباەۆ ءوز قورعاۋشىسىمەن بىرگە اتالعان سوت ساراپتامالارىنىڭ تەك قورىتىندىلارىمەن تانىستىرىلعان.

ناتيجەسىندە، قورعاۋ تاراپىنان، 2019 جىلعى 4 ساۋىردەگى №893 سوت ساراپتاماسىنىڭ قورىتىندىسى بويىنشا، قر قپك 286-بابى تارتىبىندە ساراپشىلاردى جاۋاپتاۋ، قايتالاما ساراپتاما تاعايىنداۋ تۋرالى وتىنىشتەرى قاناعاتتاندىرىلماعان.

ال، 2019 جىلعى 16 تامىزداعى №1601 ساراپتاما قورىتىندىسىمەن م. بورانباەۆ قورعاۋشىسىمەن، تەك 2020 جىلدىڭ قازان ايىندا عانا تانىستىرىلعان.

ساراپتاما قورىتىندىلارىنىڭ ناتيجەسىندە م. بورانباەۆتىڭ جازعان پوستتارى كونتەكستتەن ءبولىنىپ الىنعان، كەي جەرلەردە بورانباەۆ تاراپىنان جازىلماعان پىكىرلەردى سول جازدى دەپ اشىق تۇردە بۇرمالانعان (فالسيفيكاتسيالانعان) كوممەنتاريلەردەن تۇراتىندىعى جونىندە باياندالادى.

سونداي-اق، ساراپشىلار تۇجىرىم جاساعاندا، م. بورانباەۆقا تيەسىلى ەمەس باسقا تۇلعالاردىڭ كوممەنتاريلەرىن نەگىزگە العان.

مارعۇلان بورانباەۆ – قازاقستان رەسپۋبليكاسىنىڭ اۋماقتىق تۇتاستىعىنا كۇمان قويۋشى، ەلىمىزدىڭ باسقا مەملەكەتتىڭ قۇرامىندا بولۋ يدەياسىن اشىق ۇستاناتىن، مەملەكەتتىك ءتىلدىڭ قولدانىلۋ اياسىن كەڭەيتۋگە جانە ەلدى مەكەندەر مەن كوشەلەردى قايتا اتاۋعا قارسى، باتىس الەمىمەن قارسى تۇرۋ لوگيكاسىن كۇشتەپ تاڭاتىن دۇشپاندىق كۇشتەرگە قارسى جاريالانىمدارمەن، ۇلتتىق مۇددەلەردى قولداۋشى رەتىندە تانىمال ازامات. سونداي-اق، ول، تىكەلەي نەمەسە جاناما تۇردە قازىرگى كونستيتۋتسيالىق قۇرىلىسقا قارسى باعىتتالعان سولشىل ماركسيستىك يدەولوگياعا قارسى پىكىرلەرىمەن دە بەلگىلى.

اتاپ ءوتۋ قاجەت، ەلباسى ن. نازارباەۆ ءوزىنىڭ «بولاشاققا باعدار: رۋحاني جاڭعىرۋ» اتتى ماقالاسىندا، ەلدى قۇردىمعا باستايتىن پوپۋليستىك يدەولوگيالاردىڭ ىشىندە، وتكەن عاسىردىڭ باستى ءۇش يدەولوگياسى – كوممۋنيزم، فاشيزم جانە ليبەراليزمدى اتاپ وتكەن بولاتىن.

سول سياقتى، پرەزيدەنت ق. توقاەۆتىڭ «تاۋەلسىزدىك بارىنەن قىمبات» اتتى ماقالاسىندا «توتاليتارلىق كەزەڭدە ۇلتتىق قۇندىلىقتارىمىزدان، تىلىمىزدەن، ءدىلىمىز بەن دىنىمىزدەن ايىرىلىپ قالا جازدادىق. ۇلت پەن ەل رەتىندە ساقتالىپ قالۋ ءۇشىن، بۇگىنگى جانە بولاشاق ۇرپاق جاڭا سىن-قاتەرلەرگە دايىن بولۋى كەرەك» دەلىنگەن.

سول ماقالادا، اۋماقتىق تۇتاستىعىمىزعا كۇمان كەلتىرىپ، تاتۋ كورشىلىك قاتىناستارعا سىنا قاققىسى كەلەتىندەرگە، رەسمي جانە قوعامدىق دەڭگەيدە تويتارىس بەرە وتىرىپ، ۇلتتىق مۇددەنى اسپەن دە، تاسپەن دە قورعاۋعا دايىن بولۋىمىز قاجەتتىگى باسا ايتىلعان.

ال، م. بورانباي بولسا، ول ءوز تۇسىنىگى بويىنشا ەلىمىزدىڭ ۇلتتىق، ۇلتشىلدىق مۇددەلەرىن قورعاۋ ماقساتىندا جاريالىمدارىن بۇقاراعا ۇسىنعان تۇلعا. سول ۇستانىمدارىن اشىق جاريالاعانى ءۇشىن، بۇگىن جاۋاپكەرشىلىككە تارتىلىپ قاماۋدا وتىر.

سوندىقتان دا، قۇرمەتتى عيزات داۋرەنبەكۇلى، ءسىزدى وسى ەل نازارىن اۋدارىپ وتىرعان شۋلى ءىستىڭ مەملەكەتتىك مۇددە تۇرعىسىنان ءادىل شەشىلۋىنە ىقپال ەتەدى دەپ سەنەمىز.

قۇرمەتپەن،
«اق جول» قدپ فراكتسياسىنىڭ دەپۋتاتتارى:
ا. پەرۋاشەۆ،
ق. يسا،
ب. دۇيسەمبينوۆ.

باس پروكۋراتۋراعا جازعان حاتىمىزعا سەگىز ايدان بەرى سەلت ەتكەن جاۋاپ بولماعاسىن جاقىندا تاعى حات جازدىق.

قازاقستان رەسپۋبليكاسىنىڭ
باس پروكۋراتۋراسىنا

بيىلعى 4 ناۋرىزدا قازاقستان رەسپۋبليكاسى باس پروكۋرورىنىڭ اتىنا پارلامەنت ءماجىلىسىنىڭ دەپۋتاتتارى ا. پەرۋاشەۆتىڭ، ق. يسانىڭ، ب. دۇيسەمبينوۆتىڭ قولىمەن، قر قك 174-بابىنىڭ 2-بولىگى، 179-بابىنىڭ 2-بولىگىمەن قاراستىرىلعان قۇقىق بۇزۋشىلىق ءۇشىن ايىپ تاعىلىپ وتىرعان مارعۇلان بورانباەۆتىڭ قورعاۋشىسى ا. ە. بايداروۆتىڭ، قورعاۋىنداعى ادامعا قاتىستى تەرگەۋ بارىسىندا ورىن العان بۇزۋشىلىقتار جونىندەگى ارىزى بويىنشا №05 حات جولدانعان بولاتىن.

الايدا، سول حات جولداعاننان سەگىز اي وتسە دە، بىزگە ءالى جاۋاپ كەلگەن جوق.

وسىعان بايلانىستى، قازاقستان رەسپۋبليكاسىنىڭ اكىمشىلىك راسىمدىك-پروتسەستىك كودەكسىنىڭ تالاپتارىنا ساي نەگە جاۋاپ بەرىلمەگەندىگىن تەكسەرۋدى سۇرايمىز.

ەگەر، جاۋاپ دايىندالىپ، ول بەلگىسىز ءبىر سەبەپتەرمەن بىزگە جەتپەي قالعان جاعدايدا، نۇر-سۇلتان قالاسى، ماڭگىلىك ەل كوشەسى، 30 مەكەنجايىندا ورنالاسقان «اق جول» قدپ ورتالىق اپپاراتىنا قايتا جولداۋدى وتىنەمىز.

قوسىمشا: 2020 ج. 4 ناۋرىزداعى №05 حاتتىڭ كوشىرمەسى 2 بەتتە.

فراكتسيا باسشىسى،

ءماجىلىس دەپۋتاتى ا. پەرۋاشەۆ

مەملەكەتتىك ورگانداردىڭ جازىلعان حاتقا بەلگىلى ءبىر مەرزىم ىشىندە جاۋاپ بەرۋىن تالاپ ەتەتىن زاڭ تالاپتارىنىڭ نەگە بۇزىلعانىنا زاڭدىلىقتاردى قاداعالايتىن باستى ورگان - باس پروكۋراتۋرانىڭ ءوزى ەندى نازار اۋداراتىن بولار دەپ ۇمىتتەنەمىز.

مارعۇلاننىڭ ۇستىنەن ارىز جازعانداردىڭ كىم ەكەندىكتەرىنە قاراپ-اق، ونىڭ ادىلەتسىز تۇتقىندا جاتقانىن بىلۋگە بولادى!

وزگە ەلدەردە تاۋەلسىزدىكتى قورعاعان مارعۇلانداي مارعاسقالارىن قۋدالامايدى، قۇرمەتتەيدى. ال بىزدە ءبارى كەرىسىنشە.

قايتا تاۋەلسىزدىك قارلىعاشى - جەلتوقسان كوتەرىلىسىنىڭ 35 جىلدىعىندا جەلتوقسان قاھارماندارىن جازالاۋعا قاتىسقانىن ءالى كۇنگە ماقتانىشپەن ايتىپ جۇرگەندەردىڭ سول كەزدەگى قارەكەتتەرىنە، تاۋەلسىزدىكتىڭ 30 جىلدىعىندا ءاربىر ءىسى بۇرىنعى وتارشىل ستااليندىك كوممۋنيزمدى ناسيحاتتاۋعا ارنالعانداردىڭ زاڭسىز ارەكەتتەرىنە زاڭدىق باعا بەرەتىن كەز كەلدى!!!

ءتورت كۇننەن سوڭ تاۋەلسىزدىگىمىزدىڭ 30 جىلدىق مەرەكەسىن تويلايمىز! ال تاۋەلسىزدىكتى قورعاعان مارعۇلان بورانباي جازىقسىز، جالعان جالامەن تاس قاماۋدا وتىر!؟.

بىزدىكى ەشقانداي ىقپال جاساۋ ەمەس، باس پروكۋرورعا جازعانىمىزدا ايقىن كورسەتكەنىمىزدەي، تەرگەۋ بارىسىنداعى ورەسكەل زاڭ بۇزۋشىلىقتاردى جويىپ، ادىلدىكتى تالاپ ەتۋ!

بىزگە تاۋەلسىزدىكتەن ارتىق قۇندىلىق جوق!

الاشقا اللا جار بولسىن!

ءتاۋ ەتەر تاۋەلسىزدىگىمىز ماڭگىلىك بولعاي!

قازىبەك يسا

Abai.kz