Gordonua.com:

اقش قازاقستاننان ەلدەگى جاپپاي نارازىلىقتار كەزىندە نەلىكتەن ۇجىمدىق قاۋىپسىزدىك شارتى ۇيىمىنا جۇگىنۋگە ءماجبۇر بولعانىن ءتۇسىندىرۋدى سۇراپ وتىر. بۇل تۋرالى اقش مەملەكەتتىك حاتشىسى ەنتوني بلينكەن CNN تەلەارناسىنا بەرگەن سۇحباتىندا ايتتى.

«قازاقستان بيلىگى وزدەرى تاپ بولعان قيىندىقتاردى بەيبىت جولمەن جەڭە ءبىلۋى، بەيبىت نارازىلىق بىلدىرۋشىلەردىڭ قۇقىقتارىن قورعاۋدى قامتاماسىز ەتۋى، مەملەكەت ينستيتۋتتارى مەن زاڭ ۇستەمدىگىن قورعاۋى ءتيىس. بىراق، مۇنى    قۇقىقتاردى قۇرمەتتەيتىندەي ەتىپ جاساۋى كەرەك. بىزدە ولاردىڭ نەلىكتەن رەسەي ۇستەمدىك ەتەتىن بۇل ۇيىمعا جۇگىنۋگە ءماجبۇر بولعانى تۋرالى ناقتى سۇراقتار تۋىنداپ وتىر»،- دەدى. سونداي-اق، ول «وسىنىڭ بارلىعىن ءوز داۋىستارىن جەتكىزۋگە تىرىسقانداردىڭ قۇقىقتارىن ساقتاي وتىرىپ، بەيبىت جولمەن شەشۋ وتە ماڭىزدى»، - دەپ اتاپ ءوتتى.

ريا نوۆوستي:

قازاقستاندا ۇقشۇ بىتىمگەرشىلىك كۇشتەرى ەنگىزىلۋىنىڭ ارقاسىندا زاڭسىز قارۋلى توپتارعا قارسى كۇرەستىڭ باعىتىن وزگەرتۋ مۇمكىن بولدى. بۇل تۋرالى اسكەري ساراپشى، «ۇلتتىق قورعانىس» جۋرنالىنىڭ باس رەداكتورى يگور كوروتچەنكو ريا نوۆوستيگە بەرگەن سۇحباتىندا ايتقان.

«قازىرگى ۋاقىتتا قازاقستان جاعدايدى وزگەرتە الدى. بۇل كوبىنە ايماقتا ۇقشۇ بىتىمگەرشىلىك كۇشتەرى بولۋىنىڭ اسكەري-ساياسي فاكتورىنا بايلانىستى», - دەدى كوروتچەنكو.

اسكەري ساراپشى ۇقشۇ بىتىمگەرشىلىك كونتينگەنتىن ەنگىزۋ تۋرالى شەشىم فورس-ماجور جاعدايىندا قابىلدانۋى ءتيىس ەكەنىن اتاپ وتكەن.

«دەگەنمەن، اۋە-دەسانتتىق كۇشتەردىڭ بازاسىندا قۇرىلعان كونتينگەنتتى جەتكىزۋ جانە ورنالاستىرۋ مەرزىمى رەسەي فەدەراتسياسىنىڭ قارۋلى كۇشتەرىنىڭ تاماشا جاعدايدا ەكەنىن جانە تەز جانە توسىن ارەكەتتەرگە، سونىڭ ىشىندە كۇتپەگەن كىرىسپە ارەكەتتەرگە قابىلەتتى ەكەنىن كورسەتەدى»، - دەدى.

Belta.by

قازاقستانداعى وقيعالار شەتەلدىك ينتەرۆەنتسيا ارەكەتى. بۇل تۋرالى بەلارۋس پرەزيدەنتى الەكساندر لۋكاشەنكو ايتتى.

«ءبىزدىڭ باستى وداقتاستارىمىزدىڭ ءبىرى - قازاقستاندا بولىپ جاتقان جاعداي ءبىزدى قاتتى الاڭداتادى. حالىق كۇيزەلىسكە ۇشىرادى. قازاقستان وتقا وراندى، ءىرى قالالار ورتەنىپ جاتىر»، - دەدى بەلارۋس باسشىسى.

ول بەلارۋس پەن قازاقستاندى ۇجىمدىق قاۋىپسىزدىك شارتى دا بايلانىستىراتىنىن اتاپ ءوتتى.

«بىزدە بىرنەشە جىلدان بەرى زاپاستا بولعان، دايىندىقتان وتكەن ءتيىستى اسكەريلەندىرىلگەن بولىمشەلەر بار. بۇل ءبىزدىڭ باۋىرلاس رەسەيمەن بىرگە الماتىعا ورنالاستىرىلعان بىتىمگەرشىلىك كۇشتەر. ءبىزدىڭ جىگىتتەر بۇگىندە رەسەيلىكتەرمەن بىرىگىپ، تاراپتاردىڭ پوزيتسيالارىن جاقىنداستىرۋعا تىرىسۋدا», - دەدى بەلارۋس باسشىسى.

«مەن ۇنەمى ەسكەرتەتىنمىن: پايدا بولعان جارىقشاقتان سۋ اعادى. قاسيەتتى جەر ەشقاشان بوس بولمايدى. قازاقستاندا سولاي بولدى. وسىنى پايدالانىپ، شەتەلدىك قاراقشىلار ءبىرىنشى كەزەكتە گۇلدەنگەن وڭتۇستىككە اسىعا باستادى. جاقىندا كورەسىز. بۇل شەتەلدىك ينتەرۆەنتسيا ارەكەتى بولىپ تابىلادى. ەندى بۇل قاراقشىلاردىڭ ارتىندا كىم تۇرعانىن انىقتاۋ كەرەك»,- دەدى لۋكاشەنكو.

NEXTA Live:

ال، NEXTA Live تەلەگرام كانالى توقاەۆ نازارباەۆقا ادال كۇشتىك قۇرىلىم قىزمەتكەرلەرىنەن قۇتىلىپ جاتىر دەپ جازدى.

«ول ەلدىڭ ۇلتتىق قاۋىپسىزدىك كوميتەتى باسشىسىنىڭ ەكى ورىنباسارى – مارات وسيپوۆ پەن داۋلەت ەرعوجيندى قىزمەتىنەن بوساتتى. بۇعان دەيىن ول قازىر مەملەكەتكە وپاسىزدىق جاسادى دەگەن ايىپپەن قىلمىستىق ءىس قوزعالعان ۇلتتىق قاۋىپسىزدىك كوميتەتىنىڭ باسشىسى كارىم ءماسىموۆتى قىزمەتىنەن بوساتتى»،- دەپ جازدى ولار.

نۇربيكە بەكسۇلتانقىزى

Abai.kz