«تاتارستان رەسپۋبليكاسى اگلومەراتسيالارىنىڭ الەۋمەتتىك-ەكونوميكالىق دامۋى ماسەلەلەرى مەن پەرسپەكتيۆالارى» ستراتەگيالىق سەسسياسىندا رەسەي ەسەپ پالاتاسىنىڭ باسشىسى الەكسەي كۋدرين ورتالىعى تاتارستان بولاتىن ەدىل اگلومەراتسياسىن قۇرۋ تۋرالى ويىن جەتكىزدى.

ول تاتارستان حالقى 4 ميلليون ادامدى قۇرايتىنىن ايتىپ، «تاتارستان ءوزىنىڭ تيىمدىلىگى، قۋاتتىلىعى مەن العا ۇمتىلۋىنا قاراماستان ءالى دە ساياسي سالماعى از. ءبىزدىڭ باعالاۋىمىزشا، بۇل 8, 9 جانە 12 ميلليون ادامدى بىرىكتىرەتىن ايماق بولۋى مۇمكىن دەپ سانايمىز. بۇل قازىردىڭ وزىندە ءتيىستى ءومىر ءسۇرۋ ساپاسى بار، حالىقارالىق دەڭگەيدەگى ورتالىق بولا الادى. ەدىل اگلومەراتسياسى بولسىن، مەگا-اگلومەراتسيا نەمەسە مەتروپوليا بولسىن، تاتارستاننىڭ مۇددەسىنە قايشى كەلمەيدى»،- دەدى كۋدرين.

ەسەپ پالاتاسىنىڭ باسشىسى ەدىل ايماعىنىڭ گەوگرافيالىق تۇرعىدان جاقسى ورنالاسقانىن اتاپ ءوتتى. اگلومەراتسيانى دامىتۋ كادرلار تاپشىلىعى ماسەلەسىن، ونىڭ ىشىندە تاتارستاننىڭ دا ماسەلەسىن شەشۋگە مۇمكىندىك بەرەدى.

وعان تاتارستان پرەزيدەنتى رۋستام ميننيحانوۆ «ايتىلعان ويدىڭ جالپى جامان ەمەس ەكەنىن» ايتىپ، اگلومەراتسيا قۇرامىنان «نيجني نوۆگورود، سامارا، اسىرەسە، باشقۇرتستان، ۋليانوۆسك، چۋۆاشيا، ۋدمۋرتيا » جەرلەرىن كورگىسى كەلەتىنىن جەتكىزدى.

اتالعان ايماقتار بۇرىننان ەدىل ۇلتجاندىلارى كوتەرىپ جۇرگەن ۇلتتىق رەسپۋبليكالاردى بىرىكتىرۋ ارقىلى قۇرعىسى كەلەتىن ەدىل-ورالدىڭ باستاماسىنا سايكەس كەلەدى.

سونىمەن قاتار، ميننيحانوۆ اتاپ وتكەن بارلىق ايماقتاردا تاتار حالقىنىڭ ايتارلىقتاي ۇلەسى بار. باشقۇرتستاندا 2010 جىلعى ساناق بويىنشا 1 ميلليون 9,2 مىڭ تاتار (حالىقتىڭ 24,78%) ءومىر سۇرەدى. ۋليانوۆسك (149,9 مىڭ نەمەسە 11,59%) جانە سامارا (126,1 مىڭ نەمەسە 3,92%) وبلىستارى، ۋدمۋرتيا (98,8 مىڭ نەمەسە 6,50%), نيجني نوۆگورود وبلىسى (44,1 مىڭ نەمەسە 1,33%) جانە چۋۆاشيا (34,2 مىڭ نەمەسە 2,73%). وسىلايشا، 2 ملن 12,5 مىڭ تاتاردى بىرىكتىرگەن كەزدە تاتارستاننىڭ وزىندە اگلومەراتسياعا كىرگەن باسقا وڭىرلەردە 1 ملن 462,3 مىڭ تاتار قوسىلادى.

كۋدرين ءسوز بارىسىندا: «بۇل اگلومەراتسيالاردىڭ ىشىندەگى ەڭ مىقتى ورتالىق – سىزدەر بولاسىزدار. رەسەيدە قازىر ماسكەۋ عانا حالىقارالىق دەڭگەيدەگى ورتالىق، ءتىپتى پەتەربۋرگتىڭ ءوزى 5 ملن حالقىمەن جەتە المايدى»، - دەپتى.

«تاتار ۇلتجاندىلارى مۇنداي ۇلكەن تاتارستاندى كوپتەن بەرى ارمانداپ كەلەدى. تالقىلاۋ بارىسىندا كۋدرين «اگلومەراتسيالار حالىقارالىق دەڭگەيدە بولادى»، - دەدى. ياعني بۇل - جاڭا مەملەكەتتىڭ ىرگەتاسى قالانىپ كەلە جاتقانىنان حابار بەرەدى»،- دەپ جازدى Readovka تەلەگرام ارناسى.

ايجان تەمىرحان

Abai.kz