الماتىداعى احاڭنىڭ ءۇيى
«اقشامدىقتار» احمەت بايتۇرسىنۇلىنىڭ 140 جىلدىعىنا وراي، احاڭنىڭ مۇراجاي-ۇيىندە بولىپ، الاش قايراتكەرلەرىنىڭ رۋحىنا قۇران باعىشتاپ، اس بەردى
«باسقادان كەم بولماس ءۇشىن ءبىز ءبىلىمدى، باي ءھام كۇشتى بولۋىمىز كەرەك. ءبىلىمدى بولۋعا وقۋ كەرەك. باي بولۋعا كاسىپ كەرەك. كۇشتى بولۋعا بىرلىك كەرەك. وسى كەرەكتەردىڭ جولىندا جۇمىس ىستەۋ كەرەك».
احمەت بايتۇرسىنۇلى
«احمەت بايتۇرسىنۇلى - قازاق حالقىنىڭ ار-وجدانى»
قر پرەزيدەنتى نۇرسۇلتان نازارباەۆتىڭ احمەت بايتۇرسىنۇلىنىڭ 125 جىلدىق مەرەيتويىندا سويلەگەن سوزىنەن.
«اقشامدىقتار» احمەت بايتۇرسىنۇلىنىڭ 140 جىلدىعىنا وراي، احاڭنىڭ مۇراجاي-ۇيىندە بولىپ، الاش قايراتكەرلەرىنىڭ رۋحىنا قۇران باعىشتاپ، اس بەردى
«باسقادان كەم بولماس ءۇشىن ءبىز ءبىلىمدى، باي ءھام كۇشتى بولۋىمىز كەرەك. ءبىلىمدى بولۋعا وقۋ كەرەك. باي بولۋعا كاسىپ كەرەك. كۇشتى بولۋعا بىرلىك كەرەك. وسى كەرەكتەردىڭ جولىندا جۇمىس ىستەۋ كەرەك».
احمەت بايتۇرسىنۇلى
«احمەت بايتۇرسىنۇلى - قازاق حالقىنىڭ ار-وجدانى»
قر پرەزيدەنتى نۇرسۇلتان نازارباەۆتىڭ احمەت بايتۇرسىنۇلىنىڭ 125 جىلدىق مەرەيتويىندا سويلەگەن سوزىنەن.
«بىتەر ءىستىڭ باسىنا، جاقسى كەلەر قاسىنا» دەگەندەي، تۋرا ءبىر جىل بۇرىن «الماتى اقشامى» گازەتىنىڭ رەداكتسياسى شەۆچەنكو-ماسانشى كوشەلەرىنىڭ تۇيىسكەن تۇسىنداعى عيماراتقا كوشىپ كەلگەنىندە، تىلشىلەر قاۋىمى ەرەكشە قۋانعان. ويتكەنى، وسى ماڭايدا قازاق ءباسپاسوزىنىڭ نەگىزىن سالۋشى، ۇلتىمىزدىڭ رۋحاني كوسەمى احمەت بايتۇرسىنۇلىنىڭ مۇراجاي-ءۇيى بار ەدى. عۇمىرىندا ءار شاھاردا تۇرسا دا، يتجەككەن مەن ايداۋدا جۇرسە دە، ءبىر ءوزى ءبىر ينستيتۋتتىڭ اتقارا المايتىن شارۋاسىن بۇتىندەپ كەتكەن احاڭا دەگەن قۇرمەت قاشاندا ايرىقشا . ال، بيىل احمەت بايتۇرسىنۇلىنىڭ تۋعانىنا - 140 جىل تولىپ وتىر. احاڭنىڭ تۋعان كۇنىنىڭ ءوزى قىركۇيەك ايىندا. ونىڭ ۇستىنە، ايگىلى رەفورماتوردىڭ 1912 جىلى جازعان «وقۋ قۇرالى» اتتى قازاقتىڭ تۇڭعىش الىپپەسىنە بيىل عاسىر تولىپ وتىر ەكەن. سوندىقتان، وسىناۋ سايكەستىكتەردىڭ ءوزى تەگىن ەمەستىگىن ەسكەرە وتىرىپ، الاش ارىستارىنىڭ ەڭبەگىنە ەرەكشە ىلتيپاتپەن ۇڭىلەتىن «الماتى اقشامىنىڭ» تىلشىلەر قاۋىمى رەداكتسيا جانىنداعى احمەت بايتۇرسىنۇلىنىڭ مۇراجاي-ۇيىنە ۇجىم بولىپ بارعان ەدى. تىلشىلەر مۇراجايداعى احاڭنىڭ كوزى تىرىسىندە تابانى تيگەن ەدەندى باسىپ تۇرىپ، حح عاسىر باسىنداعى قازاق قوعامىنا، سول كەزدەگى ساياسي احۋالعا، قازاق زيالىسىنىڭ كۇرەسكەرلىك ومىرىنە شولۋ جاساپ، توتاليتارلىق كەزەڭنىڭ تار تىنىسىن سەزىنگەندەي اسەرگە بولەندى. سونداي-اق، مەيرامحانادا الاش قايراتكەرلەرىنىڭ رۋحىنا ارنالىپ مۇراجاي قىزمەتكەرلەرى مەن احاڭنىڭ جيەنى ايمان بايسالوۆا، جيەنشارى مەرۋەرت بەيىسوۆا، ا.بايتۇرسىنۇلى اتىنداعى قوعامدىق قوردىڭ مۇشەسى قايدار بايدىبەكوۆ جانە «الماتى اقشامى» گازەتىنىڭ باس رەداكتورى قالي سارسەنباي باستاعان تىلشىلەر قاۋىمى قاتىسقان اس بەرىلدى. اس داستارحانىندا «كوكتوبە» مەشىتىنىڭ يمامى ساكەن ءابدىرايىمۇلى ىزگى ارۋاقتارعا قۇران باعىشتادى.
جالپى، احمەت بايتۇرسىنۇلىنىڭ الماتى قالاسىندا قىزمەت ىستەپ جۇرگەنىندە تۇرعان ءۇش ءۇيى بولعان. «قازاق حالقىنىڭ ار-وجدانى» اتتى بيىك باعاعا يە بولعان رۋحاني كوسەمنىڭ جازبالارى ارقىلى زەرتتەۋشىلەر وسى ءۇش ءۇيدىڭ ورنىن انىقتاعان. الايدا، احاڭ تۇرعان ەكى ءۇي قالادا جاڭا قۇرىلىستار باستالعاندا بۇزىلعان ەكەن. سونىڭ ىشىندە تەك قازىرگى احمەت بايتۇرسىنۇلىنىڭ مۇراجاي-ءۇيى عانا قالعان. احمەت بايتۇرسىنۇلى بۇل ۇيدە 1934 - 1937 جىلدار ارالىعىندا تۇرعان.
«ەلۋ جىلدا ەل جاڭا» دەگەندەي، 51 جىل بويى «حالىق جاۋى» رەتىندە ناقاق جالا ارقالاپ كەلگەن احمەت بايتۇرسىنۇلىنىڭ اياۋلى ەسىمى 1988 جىلى اقتالدى. 1993 جىلى احاڭنىڭ الماتىداعى تۇرعان ءۇيىن مۇراجايعا اينالدىرۋ ءىسى باستالىپ، بۇرىنعى كوسموناۆتار كوشەسى احاڭنىڭ اتىنا بەرىلدى. كەيىنگى جىلدارى مۇراجايدىڭ قاسىنداعى نيكولسك ساياباعىنا دا احمەت بايتۇرسىنۇلىنىڭ ەسىمى بەرىلدى. مۇراجاي-ءۇيدى قالپىنا كەلتىرۋ جۇمىستارى جۇرگىزىلدى. وسى شاراعا جەتەكشىلىك ەتكەن ا.بايتۇرسىنۇلىنىڭ ءىنىسى ماشەننىڭ ۇلى سامىرات كاكىشەۆ بولاتىن. سامىرات ماشەنۇلىنىڭ 1994 جىلى 5-تامىزدا احمەت بايتۇرسىنۇلى اتىنداعى قوعامدىق قور قۇرعانىن دا ايتا كەتكەن ءلازىم. اتالعان مۇراجاي-ءۇي 1 جارىم قاباتتان، ءتورت بولمە مەن ءبىر بولمەلى جەرتولەدەن تۇرادى. ونىڭ ۇشەۋى - كورمە زالى، ءبىر بولمەسى - احمەتتانۋ ءدارىسحاناسى. جەرتولە - مۇراجاي مەن قوعامدىق قور قىزمەتكەرلەرىنىڭ كەڭسەسى. مۇراجاي-ءۇيدىڭ قورىندا عالىمنىڭ ءومىرى مەن شىعارماشىلىعىنا قاتىستى 500-گە جۋىق دەرەكتى رەسمي قۇجاتتار، 300-دەي مەملەكەتتىك مۇراعاتتان الىنعان تەلنۇسقالىق قۇجاتتار، 12 جەكە سۋرەتى جانە 27 ۇجىمدىق دەرەكتى سۋرەتتەر بار.
احمەت بايتۇرسىنۇلىنىڭ ءوز بالاسى بولماسا دا، اسىراپ العان ءۇش بالاسى بولعان، ولار: قازيحان، اۋمات، شولپان. العاشقى ەكەۋىن ءوز فاميلياسىنا جازباعان. ال، تۋعان ىنىسىنەن العان شولپاندى ءوز اتىنا جازعان. ءبىز شولپاننان تۋعان جيەن نەمەرەسى ايمان اپامىزبەن جانە اپكەسى زيلياشتىڭ ۇلىنان تۋعان جيەنشارى مەرۋەرت اپامىزبەن اڭگىمەلەستىك. اسىلدىڭ سىنىعى ايتقان اڭگىمەلەردىڭ ءبىر پۇشپاعىن وقىرماندارمەن ءبولىسۋدى ءجون ساناپ وتىرمىز.
ايمان بايسالوۆا، احمەت بايتۇرسىنۇلىنىڭ جيەنى:
احاڭ بۇل ءۇيدىڭ جەرتولەسىندە تۇرعان دەسەدى...
- مەنىڭ اكەم - عابيدەن بايسالوۆ 21 جاسىنان باستاپ (1930-جىلدارى) الماتىدا چەكيست بولىپ قىزمەت ەتكەن. شەشەم - شولپان احمەتقىزى بالالار ۇيىندە تاربيەلەنگەن. الماتىعا كەلگەنىندە انامىز جاسىنا ءۇش جاس قوسقىزعان ەكەن. اكەمە ەرتە تۇرمىسقا شىعىپتى. مەنەن ۇلكەن ەرنەست ەسىمدى اعام بولدى. اكەم تەمىر جولدا رايپروفسوجدا ديرەكتور بولدى. شەشەم ەكەۋى تەاترعا كوپ بارادى ەكەن. تەاتردان «ايمان-شولپان» قويىلىمىن كورگەن سوڭ، مەن تۋعاندا اتىمدى ايمان قويىپتى. ءبىزدىڭ وتباسى دا بۇگىندە احاڭنىڭ مۇراجاي-ءۇيى بولىپ تۇرعان ۇيدە تۇرىپتى. احمەت اتامىز قىزمەتتە، اباقتىدا، ءار جاقتا بولدى عوي. سەمەيدە، قارقارالىدا، قىزىلوردادا، ت.ب. قالالاردا ءجۇردى. الماتىعا قىزمەتكە كەلگەنىندە 1934 - 1937 جىلدارى اتامىز وسى ۇيدە تۇرعان ەكەن. 1937 جىلى مەن ءبىر جاستا ەدىم. بۇرىن بايتۇرسىنۇلى كوشەسى - ۇيعىر كوشەسى، سەيفۋللين داڭعىلى - وزبەك كوشەسى، اباي داڭعىلى - ارىچنايا دەپ اتالاتىن. ءۇيدىڭ ەسىگى سول كەزدە ۇيعىر كوشەسى جاعىنان شىعىپ تۇرعان ەكەن. مەن بۇل جايتتەردى بىلمەيمىن. ءتورت جاسقا كەلگەنىمدە، بۇل ۇيدەن كوشىپ كەتتىك. قاپشاعاي ارقىلى سوعىس جىلدارىندا باقاناسقا بارىپ تۇردىق. شەشەم سوندا باس ەسەپشى بولدى. اكەمىز مايدانعا اتتاندى.
احاڭ بۇل ۇيدە ءبادريسافا اجەمىزبەن تۇردى. اتامىزدى ۇستاپ الىپ كەتكەننەن كەيىن ءبادريسافا اجەمىز قىزى شولپاندى الىپ، قوستانايعا كەتكەن ەكەن. توعىز جاستاعى قىزىن بالالار ۇيىنە بەرگەن. ءوزى قوستانايدىڭ جانىنداعى قارتتار ۇيىندە تۇرىپ، 1943 جىلى قايتىس بولدى.
بۇل ءۇي 1998 جىلى تولىعىمەن مۇراجايعا اينالدىرىلدى. قۇرىلىسى شەگەسىز، تازا اعاشتاردى قيىپ سالىنعان، بۇرىننان بار ءۇي ەكەن. ەڭ العاش نيكولسكى شىركەۋىنىڭ پوپى سالدىرعان كورىنەدى. ول قايتىس بولعاننان كەيىن ۇيدە باسقا ادامدار تۇرعان. ءار تەرەزەسى ءبىر بولمەگە ءبولىنىپ، جاتاقحانا سياقتى پايدالانىلعان. بىلەتىندەردىڭ ايتۋىنشا، احاڭ بۇل ءۇيدىڭ استىڭعى قاباتىندا، جەرتولەسىندە تۇرعان ەكەن. باسپالداعى تۋرا سالىنعان. كىشكەنە كەزىمدە سول باسپالداقتان قۇلاعان كەزىمدە تۇسكەن ماڭدايىمداعى تىرتىق ءالى بار. جانىنداعى ايالداما سول ورنىندا ءالى تۇر. سول كەزدىڭ وزىندە ۇيعىر، پاستەر، تالعار، شەۆچەنكو كوشەلەرىمەن ترامۆاي جۇرەتىن. مەن ءتورت جاسىمدا ترامۆايعا وتىرىپ، ءبىر اينالىپ كەلگەندە ءۇيدىڭ قاسىنان كوندۋكتور جەتەلەپ ءتۇسىرىپ كەتەدى ەكەن. گوگول كوشەسىندەگى 14-ۇيدە دە اعامىزبەن تۇرعانبىز. ويتكەنى، شەشەمىز زايارسكىگە جەر اۋدارىلدى. مەنەن ءبىر جاس كىشكەنتاي 1937 جىلعى ءىنىم، 1939 جىلعى ايدا ەسىمدى ءسىڭلىم بولدى. بارلىعى قايتىس بولدى.
مەنى شەشەمىز شولپاننىڭ ءىنىسى سامىرات اسىراعان ەدى. ول سوعىستا بولىپ، 1946 جىلى سۆەتا ەسىمدى بەلورۋس قىزىنا ۇيلەنىپ كەلدى. ولار دا قاشىپ ءجۇرىپ، شۋ جاقتا جۇمىس ىستەدى. التى ايلىق قىزى بار ەدى، ونى جان-جاعىنا جاستىق قويىپ باعاتىنمىن. كەيىننەن سامىرات اعامىز الماتىدا قۇرىلىس سالاسىندا ىستەدى. اكەمىز شەۆچەنكو كوشەسىنىڭ بويىنداعى ەكى قاباتتى عيماراتتا ىستەگەن ەدى. كەيىن ونى بۇزىپ تاستادى. ءوزىم دە اباي داڭعىلى مەن ماسانشى كوشەلەرىنىڭ قيىلىسىنداعى تەمىر جول عيماراتىنداعى زەرتحانادا 20 جىلعا جۋىق جۇمىس ىستەدىم.
مەنىڭ شەشەم مەن مىرجاقىپ دۋلاتوۆتىڭ قىزى گۇلنار اپايدىڭ وسى ءۇيدىڭ الدىنداعى باسپالداقتا تۇرىپ تۇسكەن سۋرەتى ساقتالىپتى. شەشەمىز قالا اكىمى بولعان ز.نۇرقادىلوۆقا وسى ءۇيدى مۇراجايعا اينالدىرۋ تۋرالى حات جازعان بولاتىن. شولپان احمەتقىزى 1994 جىلى قايتىس بولدى. قازىرگى احمەت بايتۇرسىنۇلى مۇراجاي-ءۇيىنىڭ ديرەكتورى رايحان يماحانبەتوۆا شىمكەنتتە جۋرناليست بولىپ ىستەيتىن. العاشقىدا بۇل ءۇيدىڭ جەرتولەسىندە رايحان ەكەۋمىز عانا تۇردىق. رايحان احمەتتانۋشى-عالىم رەتىندە كانديداتتىق، كەيىننەن دوكتورلىق ديسسەرتاتسيا قورعادى. بۇل ۇيگە قىزىعۋشىلىق تانىتىپ، تارتىپ الماقشى بولعاندار دا بولدى. الايدا، وعان مۇمكىندىك بەرمەدىك. قازىر جەكە مەنشىككە قارايدى. كوممۋنالدىق تولەمدەرى مەن جەر تەلىمىنە اقشا تولەيمىز. مەملەكەت ەسەبىنەن ي.تاسماعامبەتوۆتىڭ اكىم كەزىندە كۇردەلى جوندەۋ جۇرگىزىلدى.
احمەت بايتۇرسىنۇلى ۇستاعان جادىگەرلەردى مۇراجايعا اكەلگەنىمىزبەن، ونىڭ بارلىعىن تاركىلەپ الدى. ۇيدەن ءوزىم الىپ كەلگەن اتاقتى پەنسنەسى (كوزىلدىرىگى) الدەبىر ۇلكەن شەنەۋنىكتىڭ قولىندا ەكەن. ودان باسقا قارا پيانينوسى، دومبىراسى بولاتىن. ۇستاعان تاياعى بار ەدى، سىنىپ قالعان. ول دا قازىر قولىمىزدا ەمەس.
مەرۋەرت بەيىسوۆا، احمەت بايتۇرسىنۇلىنىڭ جيەنشارى:
احاڭنىڭ 90 جىلدىق مەرەيتويىندا تۇركيادا كوشە اشىلىپتى
- اكەمىز باكىبايدىڭ شەشەسى زيلياش احمەت اتامىزدىڭ تۋعان قارىنداسى بولىپ كەلەدى. اجەمىز 1962 جىلى قايتىس بولدى. ومىردەن وتكەنىنشە قولىمىزدا تۇردى. اكەمىز شەشەسىنىڭ باسىنداعى قۇلپىتاسقا «زيلياش بايتۇرسىنقىزى» دەپ جازدىردى. ءبىز وعان دەيىن اجەمىزدىڭ تەگى بەيىسوۆا دەپ ويلايتىنبىز.
جالپى، ايمان ەكەۋمىز بۇكىل حالقىمىز سياقتى 1988 جىلى ۇكىمەتتىڭ رەپرەسسيا قۇرباندارىن اقتاۋ جونىندەگى قاۋلىسى شىققانعا دەيىن الاش ارىستارى تۋرالى ەشتەڭە بىلگەن جوق ەدىك. وتباسىمىزدا دا اتامىز تۋرالى، ونىڭ تۋعان-تۋىستارىنىڭ قۋدالانعاندىعى جونىندە ەشتەڭە ايتىلمايتىن. اكە-شەشەمىز 1930-جىلدارى قازاق تىلىندە وقىتاتىن جالعىز مەكتەپ-ينتەرناتتا تانىسىپ، باس قوسىپ، وتاۋ كوتەرگەن ەكەن. 1939 جىلى اعام، 1941 جىلى مەن تۋىپپىن. انامىز ءمينا - قازاق راديوسىنىڭ تۇڭعىش ديكتورى بولدى. ينتەرناتتا ۇزدىك بولىپ، ولەڭدى بار مانەرىمەن وقيدى ەكەن. سودان كوزگە تۇسكەن انامىزدى 15 جاسىندا پيونەرلەر ديكتورى ەتىپ، راديوعا جۇمىسقا كىرگىزەدى. ءبىز مۇنى ۇلكەن ماقتانىشپەن ايتامىز. اكەمىز ۇشقىشتار مەكتەبىن ءبىتىرىپ، ۇشقىش بولعان ەدى. 1942 جىلى جارالانۋىنا بايلانىستى نكۆد-عا جۇمىسقا كىردى. اكەمىز احمەت اتامىزدىڭ باسىنان كەشكەن جايتتەرىنەن حابارى جوق بولدى ما، بىلسە دە ۇندەمەدى مە، ول جاعى بىزگە بەيمالىم. بايتۇرسىن اۋلەتىنىڭ ءوزى اشارشىلىق كەزىندە جارتىسىنان ايرىلىپ قالعان عوي. ماسەلەن، 1959 جىلى اكەمىزدىڭ اشتىق جىلدارى بوسىپ كەتكەن اپكەسى تابىلدى. ول جاعالبايلى ەلىندە تۇرمىسقا شىعىپ، سوندا تۇرىپ قالعان ەكەن. سول كىسى كەيىن «باكىباي بەيىسوۆ اتتى ءىنىم بار ەدى» دەپ راديوعا بىرنەشە حات جازعان ەكەن. راديوداعى ارىپتەستەرى «ءمينا اپاي، مىنا حات سىزگە ارنالعان سياقتى» دەپ، حاتتى شەشەمىزگە تابىستاپتى. وسىلايشا، اكەمىزدىڭ تۋعان اپكەسىمەن قاۋىشتىق. ورىنبور وبلىسى جاقتا تۇراتىن اپكەمىزگە اجەمىز دە بارىپ، قايتىس بولعانىنشا ارالاسىپ جۇردىك.
ءبىزدىڭ ۇيدە ءتۇرلى ونەر ادامدارى قوناقتا كوپ بولۋشى ەدى. اقىن سىرباي ماۋلەنوۆتىڭ ايەلى گۇلجامال - احمەت اتامىزدىڭ ۇلكەن تۋعان اعاسى قاليدىڭ قىزى. سىراعاڭمەن بىرگە عافۋ قايىربەكوۆ، ءىلياس وماروۆ، ارتىستەر دە كوپ ارالاساتىن. سول كىسىلەر ۇيگە كەلگەندە احمەت اتامىزدىڭ اندەرى ايتىلاتىن. كەيىننەن بىلگەنىمىزدەي، اتامىز ءوزى ءان شىعارىپ قانا قويماي، مۋزىكا زەرتتەۋشىسى ا.زاتاەەۆيچكە تالاي اندەردىڭ نوتاعا تۇسۋىنە كومەك كورسەتكەن ەكەن. ءوزىم قالاداعى مۋزىكا مەكتەبىندە وقىپ جۇرگەندىكتەن، بۇل جايتتەر مەنىڭ جادىمدا جاقسى ساقتالدىپ قالدى.
بىردە انام اكەمنەن: «احاڭ دەگەن كىم؟» دەپ سۇرادى. سويتسەك، 1962 جىلى تۇركيادا احمەت بايتۇرسىنۇلىنىڭ اتىندا كوشە اشىلعان ەكەن. وسى ءجايتتى «شالقار» راديوسىندا حابارلاعان كورىنەدى. سول كەزدە ۇيدە وتىرعان بىرەۋلەر «بيىل احاڭنىڭ 90 جىلدىق يۋبيلەيى عوي» دەستى. مەن ورىس تىلىندە سويلەيتىنمىن. شەشەمنەن «چتو تاكوە يۋبيلەي؟» دەپ سۇرادىم. ول كەزدە يۋبيلەيدى اتاپ وتەتىن زامان ەمەس. شەشەمىز ونىڭ مەرەيتويلىق كەزەڭ ەكەنىن ءتۇسىندىردى.
مىنە، سول قيىن-قىستاۋ كەزدە احاڭنىڭ تۋعان جيەنى بىلمەيتىن الاش كوسەمدەرى مەن قايراتكەرلەرىن بۇگىندە جالپاق جۇرت مويىنداپ، ۇلكەن ءىس-شارالاردى ۇيىمداستىرىپ، شەت ەلدەرگە دە تانىتىپ جاتىر. احاڭنىڭ عىلىمي زەرتتەۋلەرى مەن ەڭبەكتەرى بۇگىندە قىتايدا، ەۋروپا ەلدەرىندە مويىندالدى. رەفورماتور، عالىم، لينگۆيست، پەداگوگ، تۇركولوگ، اقىن، جازۋشى، اۋدارماشى، سازگەر، ەتنوگراف، ساياسي قايراتكەر سىندى قىرلارىنىڭ بارلىعىن احاڭ 63 جىلدىق عۇمىرىندا قالاي اتقارىپ ۇلگەرگەنىنە جانە وتە بيىك دەڭگەيدە ورىنداعانىنا كەيدە تاڭعالاسىڭ! كارەلياداعى قۋعىن-سۇرگىن جىلدارى، رەپرەسسيا قۇربانى بولماعان جاعدايدا احمەت بايتۇرسىنۇلى ۇلتىنا بۇدان دا ۇلكەن ەڭبەك سىڭىرەر مە ەدى دەگەن ۇلى وكىنىش ءبىزدى عانا ەمەس، بۇكىل قازاق حالقىنىڭ دا وزەگىن ورتەيتىن شىعار دەپ بىلەمىن.
دۋمان اناش
«الماتى اقشامى»، №112-113, 15-قىركۇيەك، 2012 جىل
