قاڭتار وقيعاسىنان ساباق الدىق پا؟

قازاق تاريحىنا قارالى كۇن بولىپ ەنگەن قاڭتار وقيعالارىنا دا ءبىرشاما ۋاقىت بولدى. سودان بەرى بۇل وقيعا قازاق قوعامىنداعى ءجيى تالقىلاناتىن  ماسەلەگە اينالدى.

تالقىلاۋلاردى سارالايتىن بولساق، قازىرگى قازاق قوعامىنىڭ بۇل وقيعالاردان ءالى ساباق الماعانىن كورۋگە بولادى. ەگەردە تالقىلاۋلار بۇدان ارى قاراي وسى باعىتتا جالعاسا بەرەتىن بولسا، كەشەگى قاڭتار وقيعالارىنان دا قاتەرلى دە قاسىرەتتى وقيعالارعا ۇرىندىرۋى مۇمكىن ەكەندىگىن ەشكىم ويلاپ تا، ويلانىپ تا جۇرگەن جوق. ەڭ باستىسى وسى قاڭتار وقيعالارىنا سەبەپكەر بولعان نەگىزگى كىنالىلەر مۇلدە ۇمىتىلىپ، بار كىنانى پرەزيدەنت ق.توقاەۆتىڭ باسىنا ءۇيىپ-توگۋگە حالىق بەل شەشە كىرىسكەن سياقتى. العاشقى كۇندەرى ەل ىشىندە بۇلىنشىلىكتى شىعارعان توپ بەلگىلى بولاتىن.

حالىقتىڭ نارازىلىعىن پايدالانىپ، مەملەكەتتىك توڭكەرىس جاساماق بولعان توپتىڭ كىمدەر ەكەنى، ولاردىڭ قانداي كۇشتەرگە ارقا سۇيەگەنى ءبارى ايقىن، ءبارى بەلگىلى بولاتىن. پرەزيدەنت ق.توقاەۆ: «ەلگە 20 مىڭ تەرروريست باسىپ كىردى. مەملەكەتتى قورعاۋىمىز كەرەك»، - دەگەنى جاي ءسوز ەمەس ەدى. شىندىق بولاتىن!

ەلىمىزدە ۋاححابيلىك-سالافيلىك اعىم وكىلدەرىنىڭ ۇيىمداسقان قاتەرلى كۇشكە اينالعانىن كورىپ تە، ءبىلىپ تە جۇردىك. ولاردىڭ كۇندەردىڭ كۇنىندە ەل ىشىندە بۇلىك سالىپ، قاندى قىرعىن جاسايتىنىن ساياساتتان از-كەم حابارى بارلاردىڭ بارلىعى دەرلىك سەزدى، سەزىندى دەسەك، ارتىق ايتقاندىق ەمەس. وسى ماسەلەمەن ۇزاق جىلدار بويىنا اينالىسىپ، زەرتتەگەن مامان رەتىندە كەشەگى قاڭتار وقيعالارىنىڭ باستى قوزعاۋشى كۇشى سول ۋاححابيلىك-سالافيلىك باعىتتاعى ارنايى دايىندالعان توپتار بولعاندىعىنا كۇماندانبايمىن. ال، ولاردىڭ ارتىندا وسى ۋاححابيلىك-سالافيلىك باعىتتاعى كۇشتەرگە ارقا سۇيەپ، مەملەكەت بيلىگىن باسىپ الۋدى كوزدەگەن توپتىڭ بولعاندىعىن ەشكىم جوققا شىعارا المايدى. ال، ولاردىڭ كىمدەر ەكەندىگىن ساۋساقپەن كورسەتۋدىڭ قاجەتى جوق. بارلىعى كەشەگى ەلباسىنىڭ اينالاسىنا توپتاسقان بيلىكتەن دە، بايلىقتان دا ايرىلماۋدى ماقسات ەتكەن توپ ەكەندىگى جاسىرىن ەمەس.

ەڭ باستىسى – پرەزيدەنت ق.توقاەۆقا «ەلگە 20 مىڭ قارۋلى جاساق كىرگىزدىك، ورىنىڭدى بوسات»،- دەپ، شارت (ۋلتيماتۋم) قويعان دا وسى بيلىك پەن بايلىقتى قولىنا شوعىرلاندىرعان توپتىڭ وكىلى بولعاندىعىنا مەنىڭ كۇمانىم جوق. ايتپەسە، پرەزيدەنت ەلگە 20 مىڭ تەرروريستىڭ باسىپ كىرگەنىن قايدان بىلەدى؟ ماسەلە وسىنداي جاعدايدا، پرەزيدەنتتىڭ شەگىنبەي سوڭىنا دەيىن كۇرەسۋگە بەل بايلاعاندىعىن ول كىسىنىڭ مالىمدەمەسىنەن كوردىك. ەلدە توتەنشە جاعداي جاريالاپ، ەسكەرتۋسىز اتۋعا بۇيرىق بەرۋى – سول قاتەرلى ءساتتىڭ تالابى دەسەك ارتىق ايتقاندىق ەمەس. ونىڭ ۇستىنە كۇشتىك قۇرىلىمداردىڭ سول كەزەڭدە پرەزيدەنت جارلىعىنا باعىنباي، بايكوت جاريالاعانىن دا كوردىك. بۇل پرەزيدەنتتى شەت ەلدەن كومەك سۇراۋعا ءماجبۇر ەتتى. وكىنىشكە وراي، وسى وقيعالارعا ءار ءبىر قازاق كۋا بولدى.

مەن ەسىتپەدىم، كورمەدىم دەپ ايتا ەشكىم ايتا المايدى. وسى قاڭتار قىرعىنىن باستاعان نەگىزگى كىنالىلەر بولا تۇرا، ولاردى ىسىرىپ تاستاپ، قوعامنىڭ باستى كىنانى ءبىر پرەزيدەنت ق.توقاەۆتىڭ باسىنا ارتۋى ەشقانداي قيسىنعا سىيمايدى. ەڭ وكىنىشتىسى، حالىقتىڭ اق پەن قارانى اجىراتۋدان قالعان ساۋاتسىزدىعى، تارتىپكە مويىنۇسىنباۋى بولعاندىعىنا ەشكىم كوڭىل بولەتىن ەمەس. باۋىرجان مومىشۇلى اتامىزدىڭ: «تارتىپكە باعىنعان ەل قور بولمايدى، تارتىپكە باعىنباعان جۇرت ەل بولمايدى»، دەگەن اتالى ءسوزىنىڭ وسى جەردە قانشالىقتى ماڭىزى بارلىعىن  ءالى دە بولسا، تۇسىنبەۋىمىز، بولاشاقتا ەل بولىپ قالا الامىز با دەگەن كۇدىكتى ويلاردىڭ تۋىنداۋىنا ءماجبۇر ەتەدى.

ايتپەسە، توتەنشە جاعداي جاريالانعاننان كەيىن كوشەگە شىعۋ – ادامنىڭ ءوز باسىن قاتەرگە تىگۋ ەكەندىگىن ەسى دۇرىس ادام ءتۇسىنۋى كەرەك ەدى. بۇل جەردە حالىقتىڭ قازاق مەملەكەتى قابىلداعان زاڭداردى اياققا تاپتاۋى انىق كورىنىپ تۇر. وسى جەردە ەلىمىزدە ۇزاق جىلدار ءومىر ءسۇرىپ، زەرتتەگەن ءبىر شەتەلدىك ازاماتتىڭ قازاق قوعامىنا بەرگەن باعاسىنا قاراپ، كەشەگى قاڭتار وقيعالارىنداعى بولعان قىرعىن قوعام ساناسىندا قالىپتاسىپ قالعان زاڭعا دەگەن كوزقاراسىمىزبەن ساباقتاس ەكەندىگىنە كوز جەتكىزەسىڭ.

ول كىسىدەن: «سەن امەريكا مەن قازاقستان حالىقتارى اراسىنداعى ايىرماشىلىقتى قىسقاشا سيپاتتاپ بەرشى»، - دەگەن ساۋالعا ول بىلاي دەپ جاۋاپ بەرىپتى: «امەريكاندىق قانشا قىسىم، قيىنشىلىق كورسەم دە، زاڭدى بۇزبادىم»، - دەپ ماقتانادى. ال، قازاقستاندىق بولسا، زاڭدى قايتىپ بۇزعانىمەن، قالاي جازادان قۇتىلعانىن ايتىپ ماقتانادى. مىنە، كەشەگى قاڭتار وقيعالارىنداعى قانشاما ادامنىڭ ءومىرىنىڭ قيىلۋى وسى زاڭعا مويىنۇسىنباۋمەن تىكەلەي بايلانىستى ەكەندىگىن ەشكىم مويىنداعىسى جوق.

ەلدە توتەنشگە جاعداي جاريالاندى ما؟ جاريالاندى. سول جارلىققا باعىنۋ، مويىنۇسىنۋ كەرەك ەدى. باعىنۋدىڭ ورنىنا، كەرىسىنشە، «ءبىز تەرروريست ەمەسپىز»، - دەپ پلاكات جازىپ، الاڭعا قايتا شىقتى. سول قارالى كۇندەرى ادام ءولىمىنىڭ كوپ بولۋىنا الدىمەن حالىقتى ۇگىتتەپ، الاڭعا شىعارعان، زاڭعا، جارلىققا مويىنۇسىنباعان بەلسەندىلەر كىنالى. زاڭدى، جارلىقتى اياققا تاپتاۋ تەك ادام ەمەس، قۇداي الدىندا دا كەشىرىلمەيتىن كۇنا. ويتكەنى، ادامزات قوعامى تۇگىل، بار ون سەگىز مىڭ عالام بەلگىلى زاڭدىلىقتار بويىنشا قوزعالادى. ەگەردە الەمنىڭ زاڭدىلىق جۇيەسى بۇزىلاتىن بولسا، وندا مىنا الەم بىلاي ۇيلەسىمدىلىكتە قوزعالا الماعان بولار ەدى. ول تۇگىل ءار ءبىر ادام اعزاسىنداعى كلەتكالار سول زاڭدىلىقتارعا باعىنىپ ارەكەت جاسايدى. ءبىر ادام اعزاسىندا 100 ملرد كلەتكا بار جانە ولاردىڭ ارقايسىسى وزىنە ءتيىستى قىزمەتىن اتقارادى. ال، ادام بالاسىنا ءبىزدى جاراتقان قۇدىرەت يەسى رۋحتى، وعان قوسا، اقىل مەن سەزىمدى بەرگەندە، ادام مىنا جەردەگى بار جاراتىلىسقا يەلىك ەتىپ، باسشىلىق قىلسىن، دەپ جىبەرگەن بولاتىن. ءار ۇلت پەن ۇلىسقا وزىنە ساي ادەت-عۇرىپ، سالت-داستۇرلەرىن بەرە وتىرىپ، ولاردىڭ گەنەتيكالىق كودىن قالىپتاستىردى. ودان ارى قارايعى قوعامدى باسقارۋ جۇيەسىن بەلگىلى زاڭدىلىقتار نەگىزىندە قاجەتىنە قاراي ويلاستىرىپ، جاساۋ ادامزاتتىڭ وزىنە قالدىردى. سوندىقتان ادام بالاسى بۇل زاڭعا دا قۇدايدىڭ زاڭىنا قالاي مويىنسۇنسا، سولاي مويىنۇسىنۋى قاجەت بولدى.

ال ءبىزدىڭ قوعام ءوزىمىزدى جاراتقان ءتاڭىر تاعالانىڭ دا، ءوزىمىز قالىپتاستىرعان قازاقستان رەسپۋبليكاسىنىڭ زاڭىن دا بەلىنەن باسىپ، اياققا تاپتاۋدى ادەتكە اينالدىرعانبىز. كەشەگى قاڭتار وقيعاسىنداعى ادام ءولىمىنىڭ كوپ بولۋى – سول زاڭدىلىقتاردىڭ ساقتالماۋىنا جىبەرگەن ءتاڭىر تاعالانىڭ جازاسى دەپ تۇسىنگەنىمىز ابزال. سول قاندى قىرعىندا دۇنيەدەن وتكەن بوزداقتاردىڭ ارۋاقتارىنا سالاۋات ايتىپ، الدارىنىڭ جارىق بولۋىن تىلەيىك. ودان باسقا ول ارۋاقتارعا باسقا كومەك جاساي المايمىز. بۇل ايتىلعانداردان شىعاتىن قورىتىندى – قاڭتار وقيعالارىندا ادام شىعىنىنىڭ كوپ بولۋىنا پرەزيدەنت توقاەۆتىڭ: «ەسكەرتۋسىز اتىڭدار»، - دەگەن جارلىعى ەمەس، زاڭعا باعىنباي، كوشەگە شىعىپ، ەرەۋىلدەتكەندەر كىنالى. قانشا اششى، قانشا اۋىر بولسا دا وسىنى مويىنداۋىمىز كەرەك.

كەلەسى پرەزيدەنتكە تاعىلىپ جاتقان ايىپتىڭ ءبىرى – «20 مىڭ تەرروريست قايدا؟ كوشەگە شىققاندار ەشقانداي تەرروريست ەمەس، بەيبىت تۇرعىندار ەدى. پرەزيدەنت سولاردى اتۋعا بۇيرىق بەردى»، - دەپ تاققان ايىبى دا ءبىر جاقتى. ولاي دەيتىنىم – قازىرگى مەنىڭ قولىمدا جيناقتالعان مالىمەتتەر سول ەرەۋىلشىلەر قاتارىندا ۋاححابي-سالافيلەردىڭ بولعانىن دالەلدەيدى. جانە ولار بىرەۋ-ەكەۋ ەمەس، توپتالىپ جۇرگەنىن سول ەرەۋىل كەزىندە تۇسىرىلگەن ۆيدەولاردان كورۋگە بولادى. مىسالى، ۇلتتىق مۋزەيگە باسىپ كىرگەن توپتىڭ بارلىعى ۋاححابي-سالافيلەر بولعاندىعىن سول جەردە بولعان مۋزەي قىزمەتكەرلەرى بايانداپ بەرگەن جوق پا؟ قارۋلارىن قاسىنا قويىپ، ناماز وقىپ جاتقان سودىرلاردىڭ دا ۆيدەوسى ءجۇر. نەمەسە اەروپورتتى باسىپ الۋ ەرەۋىلشىلەرگە نە ءۇشىن قاجەت بولدى؟ مەملەكەتتىك توڭكەرىس جاساۋشىلار ءۇشىن بولماسا، ونداي ارەكەتكە ەرەۋىلشىلەردىڭ بارماسى انىق. كەلۋگە ءتيىستى قارۋلى جاساقتاردىڭ كەلۋىنە كەدەرگى كەلتىرگەن پرەزيدەنت ق.توقاەۆتىڭ ۇقشۇ اسكەرلەرىن شاقىرۋى بولسا كەرەك.

ودان باسقا دا سول ەرەۋىلگە قاتىسقان كۋاگەرلەردىڭ ايتۋىنشا ارالارىندا ساقالدىلاردىڭ بولعانىن جوققا شىعارمايدى. ءبىر الماتىنىڭ وزىندە 2500 تۇرمەدەن جاڭا بوساتىلعان سالافيلەر، جەلتوقساننىڭ باسىنان باستاپ تاۋلىكتىك پاتەرلەردە وسى وقيعانى كۇتىپ جاتقان. الدىمەن 16 جەلتوقساندى كۇتكەن، ودان كەيىن جاڭا جىلدىڭ باسىن كۇتكەن. سولاردىڭ بارلىعى قاڭتار وقيعالارىنا بەلسەنە ارالاسقانىنا كۇمان جوق. ونىڭ ۇستىنە ولاردىڭ كوزگە تۇسپەي، بىردەن جوق بولىپ كەتۋىنىڭ ءوزى كۇدىك تۋدىرادى. بۇعان قوسا رەسەيدىڭ سىرتقى بارلاۋ قىزمەتىنىڭ باسشىسى نارىشكين: «بارلاۋ قىزمەتىندە قازاقستاندا ءبىر سۇمدىقتىڭ دايىندالىپ جاتقانى جايلى اقپاراتتار بولدى ما؟»، دەگەن سۇراققا، ول بىلاي دەپ جاۋاپ بەردى: «ارينە بولدى. ەڭ الدىمەن سيرياداعى دايش سودىرلارى تالقاندالعان سوڭ، ورتالىق ازياعا كەلگەنىن بىلدىك. بۇل بىزگە دە، وزگە ەلدەرگە دە قۇپيا ەمەس اقپارات ەدى. ولاردىڭ كەلۋى كىمنىڭ جاسىرىپ-قولپاشتاۋىمەن ىسكە اسىرعانى دا بەلگىلى بولدى. بۇل ماسەلە بويىنشا ايماقتاعى بارلىق ەلدەر الاڭداۋشىلىق تانىتتى. ءبىز بۇل اقپاراتتارمەن ۇقشۇ قۇرامىنداعى ەلدەرمەن بولىستىك، ارينە قازاقستانمەن دە».

دەمەك، بۇل توڭكەرىس وپەراتسياسى وتە ىجداقاتتىلىقپەن دايىندالىپ، ىسكە اسىرىلعان. وپەراتسيا ساتسىزدىككە ۇشىراعان جاعدايدا «ساقالدىلاردىڭ» امان قالۋ جولدارى دا ءجىتى ويلاستىرعاندىعى بايقالادى. سونىمەن بىرگە، الماتى، تاراز، تالدىقورعان قالالارىندا ۇقك قىزمەتكەرلەرىنىڭ ءوز قىزمەت ورىندارىن تاستاپ، قارۋ-جاراقتارىن سول كۇيىندە قالدىرۋى ءجايدان-جاي ەمەس، ويلاستىرىلعان ءىس-ارەكەت بولعانىن جوققا شىعارا المايدى. ونىڭ ۇستىنە ۇقك مەن ءىىم-ءنىڭ جوعارعى شەندى بىرنەشە قىزمەتكەرلەرىنىڭ وزدەرىنە قول سالۋى دا كوپ نارسەدەن حابار بەرەدى. جالپى باق-تاردىڭ حابارلاۋىنشا، 3600-دان اسا قارۋ قولدى بولسا، سول قارۋ-جاراقتىڭ بارى-جوعى 900 عانا تابىلىپتى. ال، قالعان قارۋ-جاراق قايدا؟ ولار ەلىمىزدە ەرتەڭگى كۇنى قايتالانۋعا ءتيىس كەلەسى بۇلىكتى كۇتىپ جاتىر دەگەن ءسوز.

كەلەسى ماسەلە جازىقسىز جانداردىڭ تۇرمەلەرگە قامالىپ، جاپا شەگۋى دە زاڭدى. حالىقتى قالايدا پرەزيدەنت ق.توقاەۆقا قارسى قويۋدىڭ ويلاستىرىلعان جوسپارى دەپ قاراعان ابزال. ەڭ باستىسى ولاردىڭ قولىندا بۇرىننان بەلسەندىلىك تانىتىپ، شىرىلداپ جۇرگەن پاتريوتتاردىڭ ءتىزىمى بار. سولاردى جيىپ الىپ، قيناپ، قىسىم كورسەتسە، ولار موينىنا الادى دەگەن سەنىمدە بولدى. ولاي بولعان جاعدايدا پوليتسيا ەكى قوياندى ءبىر وقپەن اتاتىن ەدى. ءبىرىنشىسى، پرەزيدەنت ق.توقاەۆقا قارسى حالىقتىڭ نارازىلىعىن كۇشەيتەدى. ەكىنشىسى، ۋاححابي-سالافيلەردىڭ بۇل وقيعاعا ەشقانداي قاتىسى بولماعاندىعىن دالەلدەيدى. ويتكەنى، ۇقك مەن ءىىم قىزمەتكەرلەرى اركەزدە نازارباەۆتار اۋلەتىنە بەرىلە قىزمەت ەتتى. ەسەسىنە بۇل ورگانداردىڭ قىزمەتكەرلەرى جالعاندى جالپاعىنان باستى. اۋلەت وكىلدەرىنىڭ بيلىككە كەلۋى ولاردىڭ مولشىلىقتاعى ءومىرىن ارى قاراي جالعاستىرۋعا مۇمكىندىك بەرەتىن ەدى. سوندىقتان بۇل ورگانداردىڭ قىزمەتى ءۇشىن ءالى ق.توقاەۆ جاۋاپ بەرە المايدى. ەگەردە قاراماعىنداعى كۇشتىك قۇرىلىمدار سەنىمدى بولعاندا ۇقشۇ-نان كومەك سۇرار ما ەدى؟ جوق.

قاڭتار قىرعىنىنىڭ ادامنىڭ جانىن اۋىرتاتىن تاعى ءبىر جەرى جاس سابيلەردىڭ قۇربان بولۋى. ەڭ باستىسى ولاردىڭ شەتەلدىك مەرگەندەردىڭ (سنايپەرلەردىڭ) وعىنان مەرت بولۋى. ولاردىڭ قايدان كەلگەنى بەلگىلى - رەسەيدەن. بىراق، ولار ەلگە رەسەي اسكەرلەرىمەن بىرگە كەلدى مە؟ الدە، توڭكەرىس ۇيىمداستىرۋشىلار وزدەرى اكەلدى مە؟ بۇل انىقتاۋدى قاجەت ەتەتىن ماسەلە. سوندىقتان بار كىنانى پرەزيدەنتتىڭ موينىنا ارتا بەرمەي، ءوزمىز دە جاۋاپكەرشىلىكتى موينىمىزعا الىپ ۇيرەنەيىك. ول سابيلەردى مەرگەندەر ۇيىندە وتىرعاندا اتقان جوق قوي. اتا-اناسىمەن كوشەدە جۇرگەندە اتتى. دەمەك، بۇل جەردە سول حالقىمىزدىڭ قۇقىقتىق جانە ساياسي ماسەلەدە ساۋاتسىزدىعى. كوشەدە وق اتىلىپ، ادام ءولىمى بولىپ جاتقاندا جاس بالامەن ادام كوشەگە شىعادى ما؟

ەندىگى ماسەلە قاڭتار قىرعىنى ەلىمىزدىڭ بولاشاعىنا قالاي اسەر ەتەدى؟ ءوزىنىڭ تاۋەلسىزدىگىن بولاشاقتا ساقتاپ قالۋعا شاماسى جەتەدى مە؟ جوق پا؟ ماسەلە وسىندا. پرەزيدەنتتىڭ سوڭعى كۇندەرى قىتاي مەن رەسەيگە بارعان ساپارلار سىنعا الىنۋدا. ارينە، قازىرگى كۇندەر پرەزيدەنت ءۇشىن وتە اۋىر. ەڭ بولماسا، سوڭىندا تىرەپ تۇرعان، سەنەتىن حالقى جوق. ءدال قازىرگى كۇنى حالىقتىڭ كوپشىلىگى جەپ قويۋعا ءازىر. ونىڭ سەبەپتەرىن جوعارىدا سانامالاپ باياندادىق. ەگەردە پرەزيدەنت سول سىن ساعاتتا مىنەز كورسەتىپ، توتەنشە جاعداي جاريالاماعاندا، توڭكەرىسشىلدەردىڭ ايتقانىن ىستەپ ەلدى تاستاپ كەتكەندە، بيلىك كىمنىڭ قولىنا كوشەر ەدى؟ ويلانىپ كوردىك پە؟ سول ەلباسى اۋلەتىنىڭ قولىنا كوشكەن بولار ەدى. قازىرگى  نارازىلىق الەۋمەتتىك جەلىلەردە وسىلاي جالعاسا بەرەتىن بولسا، ەرتەڭگى كۇنى تاعى دا نارازىلىق شەرۋلەرى تاعى دا بۇرىق ەتە قالۋى مۇمكىن. پرەزيدەنتتى ورنىنان كەتىرەرمىز. بىراق سول كەزدە بيلىك كىمنىڭ قولىنا كوشەدى؟ تاعى سول ۋاححابيلىك-سالافيلىك باعىتتا ارقا سۇيەگەن اۋلەت وكىلدەرىنىڭ قولىنا تيەدى. ولاي دەيتىنىم – قازىرگى تاڭدا قازاقستاندا ولاردان وزگە بىردە-ءبىر ساياسي ۇيىمداسقان كۇش جوق. قازاق حالقىنىڭ قازىرگى كۇنى اتى بار دا، زاتى جوق. رۋحاني تۇتاستىق تۋرالى ايتپاساق تا بولادى. ءدىني تانىم نەگىزىندا قازىرگى قازاق قوعامى توز-توز بولىپ بارا جاتىر. ونى تۇسىنەتىن ادام تاعى جوق. قازاقستان مۇسىلماندار ءدىني باسقارماسى سول ۋاححابي-سالافيلەردىڭ شوتىن شاۋىپ، ارۋاقپەن ارپالىسىپ اۋرە. ولارعا قارسى تاڭىرشىلدەر شەپ قۇرۋدا. ودان باسقا قانشاما ءدىني، ءدىني ەمەس اعىمدار بار. ولاردىڭ ارقايسىسىنىڭ سوڭىنا ەرتكەن قانشاما ازاماتتارى بار. ءبىر يەگوۆا كۋاگەرلەرىنىڭ، وسىدان ونشاقتى جىل بۇرىن، 500 مىڭ ادامى بار دەلىنەتىن. وسىلاردىڭ ءبارىن ەسەپكە الاتىن بولساق، وندا قازىرگى پرەزيدەنتكە قارسى شىعۋ – قالت-قۇلت ەتىپ تۇرعان مىنا مەملەكەتتى كۇيرەتۋ بولىپ تابىلادى. سوندىقتان ءاربىر قازاق ەكپىنىمىزدى باسىپ، اقىلعا سالىپ، مىنا مەملەكەتتىڭ ىرگەسىن قايتسەك بەكىتەمىز دەگەن ماقساتتا بولۋىمىز كەرەك. ولاي بولمايىنشا ءبىز مەملەكەت رەتىندە ۇزاققا بارمايمىز. قازاقستان مەملەكەتىنىڭ ىرگەسىن بەكىتۋ ءۇشىن الدىمەن قازاق حالقىنىڭ ءدىني-رۋحاني-مادەني تۇتاستىعىن قايتادان قالپىنا كەلتىرۋى كەرەك. ول ءۇشىن تۇركى حالىقتارىنىڭ تەمىرقازىعى بولعان، رۋحاني الەم مەن ادامزات رۋحىن قايتا بايلانىستىرىپ، الەمدى اقىرزامان اپاتىنان امان ساقتاپ قالعان قوجا احمەت ءياساۋيدىڭ جولىنا بەت بۇرعانىمىز ابزال. قازاق ءۇشىن باسقا جول جوق.

زىكىريا جانداربەك

Abai.kz