بۇگىن استانادا قازاقستان مەملەكەتتىك ستاتيستيكاسىنىڭ 105 جىلدىق مەرەيتويىنا وراي «ۇلتتىق ستاتيستيكالىق جۇيەلەردى تسيفرلىق ترانسفورماتسيالاۋ» اتتى حالىقارالىق فورۋمنىڭ اشىلۋى ءوتتى. فورۋمعا قىتاي، سينگاپۋر، گرۋزيا، ۆەنگريا، يندونەزيا، سەربيا جانە تمد ەلدەرىنىڭ ستاتيستيكا قىزمەتتەرىنىڭ باسشىلارى مەن وكىلدەرى قاتارىنان 150-دەن استام قاتىسۋشى جينالدى. سونداي-اق ءىس-شاراعا حالىقارالىق ۇيىمداردىڭ – بۇۇ، بۇۇ ەەك، ەىدۇ، دۇنيەجۇزىلىك بانك، ازيا دامۋ بانكى، يۋنيدو، يۋنفپا وكىلدەرىمەن قاتار مەملەكەتتىك ورگانداردىڭ، عىلىمي جانە ساراپتامالىق قاۋىمداستىقتىڭ وكىلدەرى قاتىسىپ جاتىر.

فورۋم ستاتيستيكانى تسيفرلاندىرۋدىڭ زاماناۋي ۇردىستەرىنە، دەرەكتەردىڭ ساپاسى مەن قۇندىلىعىنا، سونداي-اق مەملەكەتتىك باسقارۋ جۇيەسىنە «ۇلكەن دەرەكتەر» مەن جاساندى ينتەللەكت تەحنولوگيالارىن ەنگىزۋ ماسەلەلەرىنە ارنالادى.

سۋرەت: gov.kz سايتىنان الىندى.

فورۋمنىڭ پلەنارلىق وتىرىسىن اشا وتىرىپ، قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى اسەت ەرعاليەۆ ەلىمىزدىڭ تاۋەلسىزدىك جىلدارىندا ستاتيستيكا سالاسى جوسپارلى ەكونوميكانىڭ ەسەپ جۇيەسىنەن بۇۇ، ەىدۇ، حۆق جانە باسقا دا ۇيىمداردىڭ حالىقارالىق ستاندارتتارىنا تولىق سايكەس كەلەتىن زاماناۋي جۇيەگە دەيىنگى اۋقىمدى دامۋ جولىنان وتكەنىن اتاپ ءوتتى.

«ستاتيستيكا – اشىقتىق پەن سەنىمنىڭ كەپىلى. مەرەيتوي – بۇل تەك قورىتىندى شىعارۋ عانا ەمەس، جاڭا بەلەستەردى ايقىنداۋ مۇمكىندىگى. حالىقارالىق ىنتىماقتاستىقتىڭ ارقاسىندا قازاقستاندىق ستاتيستيكا الداعى ۋاقىتتا دا جاھاندىق مىندەتتەردى شەشۋگە ەلەۋلى ۇلەس قوسا بەرەتىنىنە سەنىمدىمىن»، – دەدى اگەنتتىك توراعاسى.

سۋرەت: gov.kz سايتىنان الىندى.

تمد مەملەكەتارالىق ستاتيستيكا كوميتەتىنىڭ توراعاسى كونستانتين لايكام الەمدىك ستاتيستيكا قاۋىمداستىعى اقپاراتتىق ورتانىڭ دامۋى مەن قوعامدىق ومىردەگى وزگەرىستەرگە بايلانىستى كۇردەلى سىن-قاتەرلەرمەن بەتپە-بەت كەلىپ وتىرعانى جايلى ايتتى.

«تمد ستاتيستيكا كوميتەتىنىڭ اتىنان قازاقستاندىق ارىپتەستەرىمىزدى مەرەيتويمەن شىن جۇرەكتەن قۇتتىقتايمىن جانە فورۋمدى جوعارى دەڭگەيدە ۇيىمداستىرعاندارى مەن جىلى قابىلداۋلارى ءۇشىن ريزاشىلىعىمدى بىلدىرەمىن. قازاقستاندىق ستاتيستيكتەر مول تاجىريبە جيناقتادى، جانە ونىڭ تمد ەلدەرى ءۇشىن پايدالى بولارىنا سەنىمدىمىن. تەك بىرلەسكەن كۇش-جىگەر ارقىلى ءبىز جاھاندىق سىن-قاتەرلەرگە ءتيىمدى جاۋاپ بەرىپ، ستاتيستيكانى حالقىمىزدىڭ يگىلىگى ءۇشىن پايدالانا الامىز»، - دەدى ءوز قۇتتىقتاۋ سوزىندە

سۋرەت: gov.kz سايتىنان الىندى.

فورۋم باعدارلاماسىنا ۇلتتىق ستاتيستيكا جۇيەلەرىنىڭ تسيفرلىق ترانسفورماتسياسى، دەرەكتەر ساپاسىن ارتتىرۋ، ۇلكەن دەرەكتەر مەن جاساندى ينتەللەكتىنى پايدالانۋ، سونداي-اق ستاتيستيكا پايدالانۋشىلارىمەن ءتيىمدى كوممۋنيكاتسيا ماسەلەلەرىنە ارنالعان سەسسيالار ەنگىزىلگەن.

قر سجرا ۇلتتىق ستاتيستيكا بيۋروسىنىڭ باسشىسى ماقسات تۇرلىباەۆ فورۋمدا بيۋرونىڭ تسيفرلىق ترانسفورماتسيا جونىندەگى كوزقاراسىن تانىستىردى.

سۋرەت: gov.kz سايتىنان الىندى.

«ءبىزدىڭ ماقساتىمىز – دەرەكتەردى جيناۋ، وڭدەۋ جانە تالداۋدى بىرىڭعاي پلاتفورمادا بىرىكتىرەتىن تسيفرلىق ەكوجۇيە قالىپتاستىرۋ. بۇل ستاتيستيكانىڭ دالدىگىن ارتتىرۋعا، وزگەرىستەرگە جەدەل دەن قويۋعا جانە قوعام ءۇشىن اشىقتىقتى قامتاماسىز ەتۋگە مۇمكىندىك بەرەدى»، – دەدى م. تۇرلىباەۆ.

فورۋمدى قر سجرا ۇلتتىق ستاتيستيكا بيۋروسى مەن تمد مەملەكەتارالىق ستاتيستيكالىق كوميتەتى بىرلەسىپ ۇيىمداستىردى.

Abai.kz