قاسىرەتتى قاڭتار وقيعالارى  بويىنشا قۇقىق قورعاۋ ورگاندارى 2 729 قىلمىستىق ءىستى تەرگەپ جاتىر. ولاردىڭ 107-نە ايىپتاۋ ۇكىمى شىعارىلسا، 86 ءايىپتالۋشىنىڭ ءىسى سوتقا جىبەرىلدى، 52-ءسى سوتتالدى،- دەپ حابارلادى ءىىم تەرگەۋ دەپارتامەنتىنىڭ باستىعى سانجار ءادىلوۆ.

ءىىم ستاتيستيكاسى بويىنشا ءادىلوۆ كەلەسى مالىمەتتەردى ۇسىنعان:

2 729 قىلمىستىق ءىس بويىنشا 255 ادام قاماۋدا جاتىر. جاسالعان ارەكەتتىڭ اۋىرلىعىنا قاراي 140 ادامعا بۇلتارتپاۋ شاراسى تاڭدالدى: 62 كۇدىكتى ءۇي قاماعىندا، 33-ءى كەپىلدىكتە، 45 كۇدىكتىدەن  ەشقايدا شىقپاۋ تۋرالى قولحات الىندى.

"قىلمىستىق ىستەردىڭ نەگىزگى بولىگى ۇرلىق – 1844 ءىس، قارۋدىڭ زاڭسىز اينالىمى – 343 ءىس، مۇلىكتى قاساقانا ءبۇلدىرۋ نەمەسە جويۋ – 144 ءىس تەرگەلۋدە. ىشكى ىستەر ورگاندارىنىڭ تەرگەۋشىلەرى 107 كۇدىكتىگە قاتىستى قاڭتارداعى وقيعالار بويىنشا قىلمىستىق ءىس ايىپتاۋ اكتىسىمەن اياقتالدى. بۇل ىستەردىڭ نەگىزگى بولىگىن ۇرلىق – 65, قارۋدى زاڭسىز ساقتاۋ فاكتىلەرى – 11, ولاردى ۇرلاۋ – 7 جانە باسقالار قۇرايدى. سوتقا 86 ايىپتالۋشى بەرىلگەن. بۇگىنگى تاڭدا ەل سوتتارى جاساعان قىلمىسىنىڭ اۋىرلىعى مەن جەكە باسىن ەسكەرە وتىرىپ، 52 ادامدى سوتتادى، ونىڭ 39 – ى – باس بوستاندىعىن شەكتەۋگە، 13 – ءى-باس بوستاندىعىنان ايىرۋعا، ال ەكى ادامعا قاتىستى تاراپتاردىڭ تاتۋلاسۋىنا بايلانىستى توقتاتىلدى", - دەدى ءادىلوۆ.

سونىمەن قاتار، ءىىم تەرگەۋ دەپارتامەنتىنىڭ باستىعى پوليتسيا ۇرلانعان قارۋدى ىزدەۋدى جالعاستىرىپ جاتقانىن اتاپ ءوتتى. ونىڭ مالىمەتىنشە، پوليتسەيلەر 1 006 قارۋ مەن 20 307 وق-ءدارىنى تاركىلەگەن.

Abai.kz