قازاقستان ەنەرگەتيكا مينيسترلىگى اتوم ەنەرگەتيكاسى جانە ونەركاسىپ دەپارتامەنتىنىڭ ديرەكتورى جاسلان قاسەنوۆ 23 اقپاندا ازاتتىق ساۋالىنا وسىلاي جاۋاپ بەردى.

ونىڭ ايتۋىنشا، "قۋاتى 1000–1200 مەگاۆاتت بولاتىن ەنەرگيا بلوگىنىڭ" قۇرىلىسىنا وسىنشا قاراجات جۇمسالادى. قاسەنوۆ شىعىننىڭ ناقتى كولەمى اەس سالۋشى انىقتالعان سوڭ ءمالىم بولاتىنىن ايتتى.

قاسەنوۆتىڭ مالىمدەۋىنشە، اتوم ەلەكتر ستانتسياسىن سالۋى مۇمكىن التى كومپانيا قاراستىرىلىپ جاتىر: NuScale (اقش), GE-Hitachi (اقش — جاپونيا), KHNP (كورەيا), CNNC (قىتاي), EDF (فرانتسيا) جانە "روساتوم" (رەسەي).

ىسكە قوسىلعان اەس قۇرىلىس شىعىنىن 20 جىلدا وتەيدى، دەپ بولجايدى ەنەرگەتيكا مينيسترلىگى.

23 اقپانداعى بريفينگتە اەس قۇرىلىسىنا ىڭعايلى ەكى ورىن قاراستىرىلىپ جاتقانى ايتىلدى. ولار: بالقاش پەن كۋرچاتوۆ قالالارى.

قازاقستاندا اتوم ەلەكتر ستانتسياسىن سالۋ-سالماۋ ماسەلەسى 90-جىلداردان بەرى تالقىلانىپ ءجۇر. 2019 جىلعى ساۋىردە رەسەي پرەزيدەنتى ۆلاديمير پۋتين ماسكەۋدە قازاقستان پرەزيدەنتى قاسىم-جومارت توقاەۆقا اتوم ەلەكتر ستانتسياسىن سالۋعا كومەكتەسە الاتىنىن ايتتى.

2021 جىلعى جەلتوقساندا "سامۇرىق قازىنا" ۇلتتىق كومپانياسى "روساتوممەن" كەلىسسوز ءجۇرىپ جاتقانىن راستادى.

Abai.kz