بەلگىلى جازۋشى، كينودراماتۋرگ سماعۇل ەلۋباي «اlmaty» تەلەارناسىنا بەرگەن سۇحباتىندا وسىلاي دەدى دەپ حابارلايدى Abai.kz.

ۋكرايناداعى قازىرگى جاعدايعا جانە ەلىمىزدە قاڭتار ايىندا ورىن العان وقيعالارعا قاتىستى ءوز ويىن ورتاعا سالعان قالامگەر بۇل جاعدايلاردان ساباق الۋىمىز كەرەك ەكەنىن باسا ايتتى.

«ۋكراينا قازاقستان ساباق الاتىن توبە كورسەتتى. 25 اقپاندا رەسەي اسكەرى ۋكرايناعا باسىپ كىرگەننەن كەيىن كۇللى ۋكراين حالقى، ولاردىڭ تانىمال باسشىلارى ءبارى ءبىر ادامعا اينالىپ كەتتى. ءبارى ءبىر تۋدىڭ استىنا جينالدى. بۇل – بىزگە ساباق بولاتىن عاجايىپ ۇلگى. تاريحتىڭ ءوزى قازاقستاننىڭ ەرتەڭىندە بولاتىن سىناقتا ءبىر جۇدىرىقتاي قالاي جۇمىلۋ كەرەك ەكەنىن وسى سوعىس كورسەتتى»، - دەدى جازۋشى.

سونداي-اق، ول ەلىمىزدىڭ ۋكراينا مەن رەسەي اراسىنداعى شيەلەنىسكە ارالاسپاعان شەشىمىنىڭ وڭ بولعاندىعىن العا تارتىپ، «ءبىز ابىروي بولعاندا ۋكرايناداعى سوعىسقا ارالاسقان جوقپىز. قاسىم-جومارت توقاەۆ ارالاسۋدان باس تارتتى. سوندىقتان، وعان سۇمدىق قىسىم بولدى دەپ ويلايمىن. سودان كەيىن بىزدە قاڭتار وقيعاسى ورىن الدى. سول قاڭتار وقيعاسىندا ونىڭ نەگىزگى قوزعاۋشى كۇشى قاراپايىم قازاقتىڭ كەدەيلەنگەن جاستارى بولدى»، - دەدى سماعۇل ەلۋباي.

ول وسى ورايدا، جاڭا قازاقستاننىڭ باستى جاۋى – جۇمىسسىزدىق ەكەنىن، ال ونىڭ سوڭى تاپقان-تايانعانى كۇندەلىكتى اس-سۋى مەن پاتەراقىسىنا جەتپەي جۇرگەن جاستاردىڭ كوشەگە شىعۋىنا، سوسىن ونى باسقا كۇشتەردىڭ ءوز مۇددەلەرىنە پايدالانۋىنا اكەلگەنىن ايتتى.

«30 جىلعا سوزىلعان جوقشىلىق، جۇمىسسىزدىق، قازاقتىڭ جاستارىن كوشەگە ايداپ شىقتى. قازىر جاڭا قازاقستاننىڭ جاۋى جۇمىسسىزدىق دەپ بىلەمىن. اعايىندار، ەكى ميلليون جاسىڭ جۇمىسسىز جۇرگەن بولسا، جاڭا قازاقستان بولمايدى. كەز كەلگەن ۋاقىتتا ولار قايتادان كوشەگە شىعادى. سوندىقتان جۇمىسسىزدىقپەن جاپپاي كۇرەس ءجۇرۋى كەرەك»، - دەگەن ول قاڭتار وقيعاسى كەزىندە ەگەر پرەزيدەنت اقوردانى تاستاپ شىققاندا ەلىمىزدە شىن مانىندە مايدان ورىن الىپ، ول كلانداردىڭ قاقتىعىسى مەن ازامات سوعىسىنا الىپ كەلەر ەدى دەدى.

«مەملەكەت باسشىسى شۇعىل شەشىم قابىلداپ، سونىڭ ارقاسىندا كوك تۋىمىز قۇلاماي امان قالدى. قۇداي ءبىزدى ساقتادى. ەندىگى جەردە جۇمىسسىزدىقتى، جەمقورلىقتى جەڭۋىمىز قاجەت. سودان كەيىن جاڭا قازاقستان باستالادى. ونىڭ بارىنە شىدام كەرەك. اكتەردان پرەزيدەنتكە اينالعان زەلەنسكيگە بۇرىن جۇرت كۇلۋشى ەدى. ال مەملەكەتتىڭ باسىنا كۇن تۋعان كەزدە سول زەلەنسكي باتىر بولىپ شىقتى. ويتكەنى، ول دۇرىس باعىتتى ۇستاندى. كيەۆتەن قاشقان جوق. وسى جاعدايدا جۇرتتىڭ ءبارى ونىڭ قاسىنا جينالدى. ءدال قازىر زەلەنسكيدى ساقتاۋ ۋكراينانى ساقتاۋمەن بىردەي بولىپ قالدى. قازاقستان ءدال سونداي جاعدايدا تۇر. الدىمىزدا ءدال سونداي كۇن تۋى دا مۇمكىن. ەندەشە، پرەزيدەنتتى ساقتاۋ – مەملەكەتتى ساقتاۋ. ول كوك تۋدىڭ توڭىرەگىنە توپتاسۋمەن بىردەي. اتا-بابا اماناتى سول كەزدە عانا اقتالادى»، - دەپ تۇيىندەدى سماعۇل ەلۋباي.