جەر قۇقىعى جونىندەگى بەلگىلى زاڭگەر, ساراپشى باقىتجان بازاربەك الماتىنىڭ بۇرىنعى اكىمى، بۇرىنعى Nur Otan, قازىرگى Amanat پارتياسى توراعاسىنىڭ ەكس-ءبىرىنشى ورىنباسارى باۋىرجان بايبەكتى جانە وليگارح قايرات بورانباەۆتى الماتىداعى جەر داۋىنا قاتىسى بار دەپ ەسەپتەيدى.

«مەن 2021 جىلدىڭ شىلدەسىندە ورتالىق ستاديونعا ىرگەلەس جاتقان جەرلەردىڭ كىمنىڭ «مەنشىگىنە كەتكەنى» تۋرالى بىرنەشە جازبا جاريالادىم. سول كەزدە الماتى قالاسىنىڭ اكىمى بولعان باۋىرجان بايبەك 2017 جىلعى 20 جەلتوقساندا جەر ۋچاسكەسىن الىپ قويۋ تۋرالى №4/392-2894  كۇماندى قاۋلىنى قابىلدادى. اتالعان قاۋلى ءبىر بەنەفيتسياردىڭ مۇددەسىن كوزدەدى، مەن ونىڭ اتىن اتاماعان ەدىم»، - دەپ جازدى بازاربەك الەۋمەتتىك جەلىدەگى پاراقشاسىندا.

ساراپشى جەر ۋچاسكەسى الماتىنىڭ ءدال ورتاسىنداعى ساتپاەۆ كوشەسىندە، «ايا» ويىن-ساۋىق كەشەنى مەن «قايرات» ورتالىق ستاديونىنىڭ قاسىندا ورنالاسقانىن اتاپ ءوتتى.

«وسىدان ءبىر جىل بۇرىن، جەر كوميسسياسىنىڭ ماتەريالدارىن، جوسپارلاۋ جوباسىنىڭ بەكىتىلگەن كوشىرمەسىن جانە قاۋلىسىن ەگجەي-تەگجەيلى زەرتتەي كەلە مىناداي سۇراققا تاپ بولدىم:

ەگەر جەر كودەكسىنىڭ 84-بابىندا ۋچاسكەنى الىپ قويۋ ءۇشىن مۇنداي قۇقىقتىق نەگىزدەر كوزدەلمەسە، الماتىنىڭ اكىمى رەتىندە باۋىرجان بايبەك مەملەكەتتىك قاجەتتىلىك رەتىندە كورسەتىپ، بىراق، قايرات بورانباەۆقا تيەسىلى كومپانيانىڭ مۇددەسىن كوزدەپ، جەكە تۇلعاعا تيەسىلى جەر ۋچاسكەسىن ماجبۇرلەپ يەلىكتەن شىعارۋ تۋرالى قاۋلى شىعارۋعا قۇقىعى بار ما؟

ساراپشىنىڭ تۇسىندىرۋىنشە، قاۋلىدا جەر ۋچاسكەلەرىن الىپ قويۋدىڭ سەبەبى: «ورتالىق ستاديوننىڭ ينفراقۇرىلىمىن قايتا قۇرۋ جانە جاڭارتۋ ءۇشىن» دەپ كورسەتىلگەن.

بىرىنشىدەن، مۇنداي نەگىز (ونىڭ ىشىندە ەرەكشە جاعدايلار) جەر كودەكسىنىڭ 84-بابى 2-تارماعىنىڭ رەداكتسياسىندا جوق. وسىدان ءبىر جىل بۇرىن اكىم بايبەك قول قويعان بۇل قاۋلىدان لوببيلىك بەلگىلەر بايقادىم، جەردى الىپ قويۋ مەملەكەت مۇقتاجى ءۇشىن جۇرگىزىلمەگەن دەگەن تۇجىرىمعا كەلدىم. جەردى الىپ قويۋ مەملەكەت مۇقتاجدىعى ءۇشىن ەمەس، قانداي دا ءبىر جەكە نە زاڭدى تۇلعانىڭ (قايرات بورانباەۆ) مۇددەسى ءۇشىن، ياعني «شەنەۋنىكتەردەن وسى جەردى الىپ بەر» دەگەن ءوتىنىشىن  ورىنداي سالعانداي»، - دەدى ول.

ول مەملەكەتتىك مۇلىك تۋرالى زاڭنىڭ 62-بابىنىڭ 3-تارماعىندا «كوممەرتسيالىق ماقساتتاردى جانە مەملەكەتتىك ەمەس مۇددەلەردى قاناعاتتاندىرۋ ماقساتتارىن كوزدەيتىن كەز كەلگەن يەلىكتەن شىعارۋدى مەملەكەت مۇقتاجى ءۇشىن جەر ۋچاسكەسىن ماجبۇرلەپ يەلىكتەن شىعارۋ دەپ تانۋعا بولمايتىندىعى» ناقتى تۇسىندىرىلگەنىن ايتادى.

«ەكىنشىدەن، «ورتالىق ستاديون» مكك 2014 جىلى جەكەشەلەندىرۋدىڭ 2014-2016 جىلدارعا ارنالعان كەشەندى جوسپارىنا سايكەس جەكەشەلەندىرۋگە جانە جەكە مەنشىككە بەرۋگە جاتادى. دەمەك، مەملەكەتتىك مۇلىكتى الىپ قويۋ جەكە سۋبەكتىنىڭ، ياعني جەكە ينۆەستور قايرات بورانباەۆتىڭ مۇددەسى ءۇشىن جۇزەگە اسىرىلدى دەپ بولجاۋعا بولادى»، - دەپ ناقتىلادى زاڭگەر.

ناتيجەسىندە، ادال كاسىبىن دوڭگەلەتىپ وتىرعاندار مەملەكەت مۇددەسى ءۇشىن دەگەن جەلەۋمەن تارتىپ الىنعان جەر ۋچاسكەسىنەن ايىرىلىپ، وتەۋ رەتىندە بەرىلگەن تيىن-تەبەندى قاناعات ەتىپ قالا بەرگەن.

«ءبىز جەر ۋچاسكەلەرىن يەلىكتەن شىعارۋدىڭ بارلىق فاكتىلەرى بويىنشا تاۋەلسىز تەرگەۋدى جالعاستىرامىز جانە قوعامداعى دارەجەسىنە، لاۋازىمىنا جانە بەدەلىنە قاراماستان بارلىق جوعارى لاۋازىمدى تۇلعالارعا قاتىستى ماتەريالداردى جاريا ەتەمىز. بارلىعى ەندى باستالدى»، - دەدى باقىتجان بازاربەك.

ەسكە سالا كەتەيىك، 15 ناۋرىزدا الماتىدا بورانباەۆتى قارجى مونيتورينگى اگەنتتىگىنىڭ ورتالىق اپپاراتىنىڭ قىزمەتكەرلەرى ۇستاعان بولاتىن. 16 ناۋرىزدا بورانباەۆ نۇر-سۇلتانعا جەتكىزىلدى.

قايرات بورانباەۆ – ەكس-پرەزيدەنت  نازارباەۆتار اۋلەتىنىڭ قۇداسى. داريعا نازارباەۆانىڭ بۇرىنعى كەلىنى ءاليما بورانباەۆانىڭ اكەسى.

ايجان تەمىرحان

Abai.kz