ۋكراينا سوعىسىنا ءبىر ايدان استى. رەسەي الدىڭعى شەپكە مىڭداعان ساربازىن اتتاندىرىپ جاتىر. قولعا تۇسكەن، قازا تاپقان ساربازدار جايلى فوتو جانە ۆيدەو دالەلدەمەلەردى ۋكراينا تاراپى كۇن سايىن شىعارۋدا. رەسەي سوعىسقا تيتۋلدى وزگە ۇلت وكىلدەرىن دە اتتاندىرىپ جاتىر. قولعا تۇسكەن جانە قازا تاپقاندار اراسىندا قازاقتار دا جەتەرلىك. ولاردىڭ باسىم بولىگى استارحان جانە ومبى ايماعىنان. الەۋمەتتىك جەلىدە جاريالانىپ، قازا تاپقانى جايلى ناقتىلانعان ازاماتتاردىڭ تىزىمىنە كوز جۇگىرتسەك: 

استارحان ايماعىنىڭ تۋماسى اينۇر نۇرماقوۆ. 1999 جىلى ومىرگە كەلگەن. ول 12 ناۋرىزدا ۋكراينا جەرىندە قازا تاۋىپتى.

استارحان ايماعىنىڭ تاعى ءبىر تۋماسى رىسبەك نۇرپەيىسوۆ. ۋكراينادا قازا تاپقانى جايلى اقپارات بار. ناقتى قاي كۇنى جانە قاي جەردە قازا تاپقانى تۋرالى دەرەك جوق.

ۋكراينادا قازا تاپقان قازاقتىڭ ءبىرى - تەمىرلان جاساعۇلوۆ. ونىڭ قاي جەردە وققا ۇشقانى ايتىلمايدى.

قازا تاپقان ساعىندىق قۇدايبەرگەنوۆ ومبى وبلىسىنىڭ تۋماسى.

ءالي باتىروۆ استارحان ايماعىنىڭ تۋماسى. ۇلتى قازاق دەگەن اقپارات بار.

ارمان نارىمباەۆ تا استارحان ايماعىنىڭ تۋماسى. ۋكراينا جەرىندە وققا ۇشقانى جايلى اقپارات بار.

ناريمان مولداشەۆ تا ۋكراينا جەرىندە قازا تاپقان قازاق بالاسى دەگەن اقپارات بار. ساراتوۆ ايماعىنىڭ تۋماسى.

مارات حاليتوۆ ورىنبور ايماعىنىڭ تۋماسى. ۋكراينا جەرىندە كوز جۇمعان، ۇلتى قازاق دەگەن اقپارات بار.

جوعارى اسكەري شەندىلەردىڭ ىشىندە ۇلتى قازاق، مايور ازامات الينوۆ تا بار. ول ومبىنىڭ تۋماسى.

رەسەي باستاعان باسقىنشىلىق سوعىستا قازا تاپقان قازاقتاردىڭ سانى 14 ادام دەگەن اقپارات بار. الايدا ودان كوپ بولۋى دا مۇمكىن. جەلى قولدانۋشىلارى «باسقىنشىلىقتى قولداۋشىلار» دەپ ايىپتاپ پىكىر ءبىلدىرىپ جاتىر. الايدا «بۇيرىق قاتتى، جان ءتاتتى» دەگەن پوزيتسيانى ۇستانۋشىلار دا بار.

رەسەي الدىڭعى شەپكە ساقا، باشقۇرت، شەشەن جانە تاتار ۇلتتارىن دا جىبەرۋدە. قولعا تۇسكەندەر اراسىندا اتالمىش ۇلت وكىلدەرى جەتەرلىك. وسىلايشا، كرەمل ءوز اۋماعىنداعى سانى از ۇلتتاردىڭ ەرلەرىن قاساپحاناعا ماقساتتى تۇردە اتتاندىرىپ جاتقانداي.

نۇرگەلدى ابدىعانيۇلى

Abai.kz