گەرمانيادا وتكەن ەنەرگەتيكالىق فورۋمعا قاتىسقان قىرعىزستاننىڭ سىرتقى ىستەر ءمينيسترى رۋسلان قازاقباەۆ Deutsche Welle (DW) باسىلىمىنا سۇقبات بەردى.

قازاقباەۆ ۋكراينادا ءجۇرىپ جاتقان سوعىس، رەسەي مەن قىرعىزستان قارىم-قاتىناسى جايلى سۇراقتارعا جاۋاپ بەردى.

"قازىردىڭ وزىندە ازىق-تۇلىك قىمباتتاپ جاتىر. ەرتەڭگى كۇنى ەنەرگيا باعاسى قالاي بولاتىنىن بىلمەيمىز. ءبىز ەنەرگيانى نەگىزىنەن رەسەيدەن الامىز. ءبىزدىڭ بولجام بويىنشا، ەل ەكونوميكاسى 5 -10% قۇلدىرايدى", - دەدى قازاقباەۆ.

ول سونىمەن بىرگە رەسەي ەكونوميكاسىنىڭ باسەڭدەۋىنەن ول جاقتاعى قىرعىزستاندىق ميگرانتتارعا قيىن ءتۇسۋى مۇمكىن ەكەنىن ايتتى.

كوروناۆيرۋس پاندەمياسىنان زارداپ شەككەن قىرعىزستان ەكونوميكاسىنا رەسەي مەن ۋكراينا اراسىنداعى جانجال جاڭا سوققى بولىپ وتىر. 24 اقپاندا رەسەي ۋكرايناعا سوعىس اشقالى بەرى قىرعىزستاندا ازىق-تۇلىك باعاسى بىردەن قىمباتتاپ كەتتى.

24 ناۋرىزدا قىرعىز ۇكىمەتى داعدارىسقا قارسى شارا جوسپارىن قۇرىپ، بيۋدجەتتەن 126 ملرد سوم ءبولدى.

Abai.kz