ناۋرىزدىڭ سوڭىندا باستالعان سۋ تاسقىنىنىڭ سالدارىنان قازاقستاندا 185 تۇرعىن ءۇي، 78 ساياجايدى سۋ باستى. بۇعان قوسا، ەكى الەۋمەتتىك نىسانعا سۋ كىردى. اراسىندا باتىس قازاقستان وبلىسىنداعى مەكتەپ تە بار. توتەنشە جاعداي ءمينيسترى يۋري يلين 6 ءساۋىر كۇنى جۋرناليستەرگە وسىلاي دەپ مالىمدەدى.

ونىڭ مالىمەتىنە قاراعاندا، ەڭ كۇردەلى جاعداي بقو مەن اقتوبە وبلىسىندا قالىپتاسقان. ءبىر اپتا ىشىندە قازاقستان اۋماعىندا قار جامىلعىسى 60 پايىزدان 30 پايىزعا قىسقارعان.

يلين سونىمەن بىرگە سۋدى بۇرۋ جانە تارتىپ شىعارۋ جۇمىستارى اياقتالعانىن حابارلادى. تجم مالىمەتىنشە، ۆەدومستۆو اقتوبە قالاسىنداعى 15 ساياجاي ۋچاسكەسىن باقىلاۋدا ۇستاپ وتىر. بقو اۋماعىنا قۇتقارۋشىلار جىبەرىلگەن. اقمولا جانە قاراعاندى وبلىستارى مەن نۇر-سۇلتاندا دا وسى باعىتتا جۇمىستار جۇرگىزىلىپ جاتىر.

"قازىر سۋ قويمالارى تەز تولىپ جاتىر، سۋ رەسۋرستارى كوميتەتىمەن بىرگە سۋ قويمالارىنىڭ تولىمدىلىعى مەن قار سۋىن وزەندەرگە جىبەرۋ ماسەلەسىن باقىلايمىز. بقو-داعى جاعداي دالاداعى سۋدىڭ كۇرت كەلۋىمەن بايلانىستى جانە قانداي دا ءبىر گيدروتەحنيكالىق جابدىقتاردىڭ قىزمەتىمەن بايلانىستى ەمەس", - دەدى يلين.

مينيستر سونىمەن بىرگە قازىر 285 ەلدى مەكەنگە سۋ باسۋ قاۋپى ءتونىپ تۇرعانىن دا جەتكىزدى.

Abai.kz