مەككە... پايعامبارلار جۇرگەن مۇباراك مەكەن. مويىنسۇنعان مۇسىلماندى ءفاني مەن باقي دۇنيەنىڭ باقىتىنا بولەيتىن قاسيەتتى قۇراننىڭ اياتى ايان بولعان بەرەكەلى دە بەيبىت قالا. قاسيەتتى قاعبا... كۇللى مۇسىلمان ءجۇزىن بۇرىپ، ساجدەگە باس قوياتىن اللانىڭ ءۇيى. تىنىمسىز تاۋاپ ەتىلەتىن، پايعامبارلاردىڭ اتاسى - ءيبراھيمنىڭ (ع.س.) ءىزى قالعان ىزگىلىك باستاۋى. قاعباعا قاراپ تا ساۋاپ جياسىڭ. ءبارى ىزگى نيەتكە بايلانىستى. قاجىلىق... ادامعا ۇل، قۇدايعا قۇل بولعان بارشا مۇسىلماننىڭ ارمانىنا اينالعان قۇلشىلىق. مۇمكىندىگى بولعان پەندەگە پارىز امال. كىرىسپەگە كوپ كىدىرمەيىك. كوزبەن كورىپ، جۇرەكپەن سەزبەي، كوپ سوزبەن جەتكىزۋ استە مۇمكىن ەمەس.

مەككە... پايعامبارلار جۇرگەن مۇباراك مەكەن. مويىنسۇنعان مۇسىلماندى ءفاني مەن باقي دۇنيەنىڭ باقىتىنا بولەيتىن قاسيەتتى قۇراننىڭ اياتى ايان بولعان بەرەكەلى دە بەيبىت قالا. قاسيەتتى قاعبا... كۇللى مۇسىلمان ءجۇزىن بۇرىپ، ساجدەگە باس قوياتىن اللانىڭ ءۇيى. تىنىمسىز تاۋاپ ەتىلەتىن، پايعامبارلاردىڭ اتاسى - ءيبراھيمنىڭ (ع.س.) ءىزى قالعان ىزگىلىك باستاۋى. قاعباعا قاراپ تا ساۋاپ جياسىڭ. ءبارى ىزگى نيەتكە بايلانىستى. قاجىلىق... ادامعا ۇل، قۇدايعا قۇل بولعان بارشا مۇسىلماننىڭ ارمانىنا اينالعان قۇلشىلىق. مۇمكىندىگى بولعان پەندەگە پارىز امال. كىرىسپەگە كوپ كىدىرمەيىك. كوزبەن كورىپ، جۇرەكپەن سەزبەي، كوپ سوزبەن جەتكىزۋ استە مۇمكىن ەمەس.

ءجۇزى باسقا جۇرەگى ءبىر، ءتۇرى باسقا تىلەگى ءبىر الەم مۇسىلماندارى ۇلىق ساپارمەن مەككەگە جينالدى. باي مەن باعلاننىڭ، پاتشا مەن پاقىردىڭ، مينيستر مەن ءمۇساپىردىڭ باسىن قوسقان قاجىلىق باستالدى. ءبارى ءتاڭىردىڭ الدىندا تەڭ. ەكى قۇلاش ماتاعا ورانعان وتانداستارىمىز دا وسىندا. بەيرەسمي دەرەكتەرگە قاراعاندا، بيىل پارىزىن وتەۋشىلەر سانى 5 ميلليوننان اسادى. سول 5 ميلليوننان استام ادامنىڭ 5500-ءى ەلىمىزدەن بارعاندار. ولارعا وتاندىق 20 تۋريستىك كومپانيا قىزمەت ەتۋدە. جىل سايىنعى داستۇرگە ساي، قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي، شەيح ءابساتتار قاجى دەربىسالى حازرەتتىڭ تاپسىرماسىمەن قاجىلىق ميسسياسىنىڭ قۇرامى جاساقتالىپ، بيىل دا ۇلكەن جاۋاپكەرشىلىكپەن يگى ىسكە كىرىستى. قاجىلارعا قىزمەت كورسەتۋ جۇمىسىن جەتىلدىرۋ ءارى وڭتايلاندىرۋ ماقساتىندا قاجىلىق كومپانيا باسشىلارى دا وسى جىلى ميسسياعا مۇشەلىككە ەندى. ەلىمىزدىڭ سىرتقى ىستەر مينيسترلىگى دە ءدىنباسىنىڭ ۇسىنىسىن قابىل الىپ، بىلىكتى ءتورت دارىگەر ءبولدى. اق حالاتتى ابزال جاندار قاجىلارىمىزدىڭ دەنساۋلىعىنا ءجىتى كوڭىل ءبولىپ، قاجەتتى ءدارى-دارمەكتەرمەن قامتاماسىز ەتۋدە.

قازاقستان مۇسىلماندارى ءدىني باسقارماسىنىڭ اپپارات باسشىسى بالعابەك مىرزاەۆ ميسسيا مۇشەلەرىنىڭ كەڭەيتىلگەن ءماجىلىسىن وتكىزدى. ارنايى جۇمىس توبىنىڭ كەزەكتى جيىنىنا قمدب قاجىلىق ءبولىمىنىڭ مەڭگەرۋشىسى، تاجىريبەلى مامان قانات بەكجانوۆ، ۋاعىز-ناسيحات توبىنىڭ يمامدارى، وسى توپتىڭ جەتەكشىسى، ءدىني باسقارمانىڭ ۋاعىز-ناسيحات ءبولىمىنىڭ باس مامانى التىنبەك ۇتىسحان، بىلىكتى دارىگەرلەر، قاجىلىق كومپانيا ديرەكتورلارى، جۋرناليستەر قاتىستى. باسقوسۋدا ءار سالا بويىنشا جۇكتەلگەن مىندەتتەردىڭ ورىندالۋىن قاداعالاۋ، ناسيحات توبىنىڭ جۇمىسىن جەتىلدىرۋ، ۋاعىز تاقىرىبىن پىسىقتاۋ، قاجىلارعا دەر كەزىندە ەم-دوم كورسەتۋ، ولاردىڭ ساۋلىعىن ءجىتى قاداعالاۋ، قاجىلىق ەرەجەلەرىمەن تانىستىرۋ، كۇندەلىكتى اس-اۋقاتپەن قامتاماسىز ەتۋ، ت.ب. ماسەلەلەر تالقىلانىپ، ءتيىستى تاپسىرمالار بەرىلدى.

«دىنگە، حالىققا قىزمەت ەتۋ - اللا الدىنداعى ابىرويلى ءىس. ودان اسقان باقىت جوق. ساۋاپ سابىرلىقپەن، ىجداھاتتىلىقپەن، ىقىلاسپەن كەلەدى. سوندىقتان كەيبىر ۇلكەندى-كىشىلى قيىنشىلىقتار كەزدەسىپ جاتسا، وعان توزىمدىلىك تانىتۋمىز ءتيىس. قۇرمەتتى ارىپتەستەر! قاجىلاردىڭ قاجەتىندە بولۋ - بارىمىزگە ورتاق ءىس. اللا الدىنداعى پەندەلىك پارىزىمىزدى ابىرويمەن اتقارىپ، ءدىنباسى تاپسىرماسىن تىڭعىلىقتى، جاۋاپكەرشىلىكپەن ورىنداپ، ورتاق ءىستى جۇمىلا جۇزەگە اسىرۋعا اتسالىسايىق»، - دەدى بالعابەك مىرزاەۆ.

قازاقستان مۇسىلماندارى ءدىني باسقارماسى بيىل دا ءار قاجىلىق كومپانياعا ۋاعىز-ناسيحات جۇمىستارىن جۇيەلى جۇرگىزۋ ماقساتىندا يمامدار ءبولدى. قاجىلىق ميسسياسى قاراماعىنداعى 100-گە جۋىق يمام-مولدالار جەرلەستەرىمىزدىڭ وزگە ءدىني اعىم وكىلدەرىنىڭ جەتەگىندە كەتپەۋىن قاداعالاپ، ناسيحات جۇمىستارىن جۇرگىزۋدە. ميسسيا مۇشەلەرى يمامداردىڭ ۋاعىزىنا قاتىسىپ، جۇمىسىن قاداعالاپ، ولارعا ءتيىستى نۇسقاۋلار بەرۋدە.

قمدب اپپارات باسشىسى ب.ابدىقايىمۇلى، قاجىلىق ءبولىمىنىڭ مەڭگەرۋشىسى قانات بەكجانوۆ، ۋاعىز-ناسيحات توبىنىڭ جەتەكشىسى التىنبەك ۇتىسحاندار ميسسيا مۇشەلەرىن تولعاندىرعان ساۋالدارعا جاۋاپ قاتتى. قاجىلىق كومپانيالارىنىڭ جەتەكشىلەرى، تاجىريبەلى دارىگەرلەر ميسسيا جۇمىسىن ودان سايىن جەتىلدىرە تۇسۋگە قاتىستى ۇسىنىس-پىكىرلەرىمەن ءبولىستى. سونداي-اق قاجىلارعا قىزمەت كورسەتۋ ساپاسىن ارتتىرۋ ماقساتىندا باس ءمۇفتي تاراپىنان جاسالىپ جاتقان قولداۋعا، ءدىني باسقارما قىزمەتكەرلەرىنە العىس-تىلەكتەرىن، ءىلتيپاتتارىن ءبىلدىردى.

قاسيەتتى جەرگە بارىپ، قاجىلىق پارىزىن وتەۋشى وتانداستارىمىز ەلىمىزدىڭ بىرلىگى مەن ىنتىماعىن تىلەپ، ەكى دۇنيەنىڭ باقىتىن جالبارىنا سۇراۋدا. ءبىز دە ءوز تاراپىمىزدان ساۋابى مول وسىناۋ عيباداتتارىڭىزدىڭ قابىل بولۋىنا تىلەكتەسپىز. پايعامبارىمىز (س.ع.س.): «ۋمرا ۋمراعا دەيىنگى ارالىقتاعى (كىشى) كۇنالاردى شايادى، ال حاج مابرۋردىڭ (شىنايى قاجىلىقتىڭ) سىيلىعى - تەك ءجاننات»، - دەگەن. اللا تاعالا بارشامىزدى قۇلشىلىعى، قاجىلىعى قايىرىمەن قابىل بولعان قۇلدارىنان ەتىپ، قوس دۇنيەدە قۋانىشىمىزدى ارتتىرىپ، جۇزدەرىمىزدى جارىق ەتكەي.

ايتا كەتەرلىك جايت، ەلىمىزدەن جىل سايىن قاجىلىققا بارۋشى جەرلەستەر سانى ارتىپ كەلەدى. مىسالى، بىلتىر پارىزىن وتەۋشىلەر قاتارى 4 مىڭ بولسا، بيىلعى كورسەتكىش - 5500. ولاردىڭ دەنى - قازاقتار. «قاجىلىقتا - قازاقتار». تاقىرىپتى تاڭداۋدىڭ ءمانى وسى ەدى.

قوسىمشا اقپارات ءۇشىن:

تەلەفون: +810966568052911