جۋىردا روزا رىمباەۆا باستاعان ءبىر توپ انشىلەر مەن ارتىستەر ەكس-پرەزيدەنت نازارباەۆتىڭ قاماۋدا وتىرعان بۇرىنعى قۇداسى، قازاقستانداعى ەڭ اۋقاتتىلاردى تىزىمدەيتىن Forbes قازاقستان رەيتينگىسىنىڭ العاشقى وندىعىنا، قازاقستانداعى ەڭ ىقپالدى ەلۋلىكتىڭ العاشقى بەستىگىنە كىرەتىن وليگارح قايرات بورانباەۆقا اراشا سۇراپ، پرەزيدەنت توقاەۆقا ءۇشبۋحات جازىپتى. حاتتىڭ ءماتىنىن جۋرناليست ەرجان ءابدىرامان الەۋمەتتىك جەلىدە بولىسكەن.

بورانباەۆقا اراشا سۇراپ، تەرگەۋدىڭ ءادىل جۇرگىزىلۋىن تالاپ ەتكەندەردىڭ جالپى سانى 70-تەن اسادى ەكەن. ولار: «قاماۋداعى كاسىپكەر قايرات بورانباەۆ – قازاق ونەرىنىڭ شىن جاناشىرى. كوبىمىزگە كومەگى تيگنەن»، - دەيدى. ءبىز اتالعان حاتتى ءۇتىر-نۇكتەسىنە دەيىن وزگەرتپەي، وقىرمان تالقىسىنا ۇسىنعاندى ءجون كوردىك.

مادەنيەت قايراتكەرلەرىنەن اشىق حات

قۇرمەتتى پرەزيدەنت قاسىم-جومارت كەمەلۇلى!

كۇنى كەشە عانا ءسىزدىڭ مەملەكەتتىڭ بولاشاعى ءۇشىن جاڭا رەفورمالاردى قولعا الىپ، حالىققا جاساعان ۇندەۋىڭىزدى بارشا ەل بولىپ تىڭداپ، كوپتەگەن يگى ىستەرگە قانىق بولدىق. ەلىمىز بەن جەرىمىز .ءشىن، مەملەكەتىمىزدىڭ بولاشاعى ءۇشىن جاساپ جاتقان ەڭبەگىڭىزگە ريزاشىلىعىمىزدى بىلدىرەمىز.

وسىناۋ قيىن قىستاۋ ساتتەردە مەملەكەتىمىزدىڭ اياعىنان تىك تۇرىپ كەتۋىنە جانە بولاشاقتىڭ جارقىن بولۋىنا ۇكىمەت تاراپىنان اجسالىنىپ جاتقان ءىس-شارالاردىڭ باستالۋى، سونىمەن قاتار قۇقىق قورعاۋ وكىلدەرىنىڭ كوپتەگەن كەلەڭسىز جاعدايلاردىڭ بەتىن اشىپ جاتۋى دا كوڭىلگە جىلۋ ۇيالاتادى. ءبىراز ەلىمىزدىڭ اتپال ازاماتتارى جاۋاپقا تارتىلىپ، ولاردىڭ جاساعان تىرلىكتەرىنىڭ اق-قاراسى تەرگەلىپ جاتقىنىنان دا حاباردارمىز.

سولاردىڭ ءبىرى، قر ازاماتى – بورانباەۆ قايرات سوۆەتايۇلى.

بىزدەر وسىناۋ ازاماتپەن تۋعان باۋىر-تۋىس بولماساق تا، ءبىزدى جاقىنداستىراتىن قازاقتىڭ مادەنيەتى مەن ءان ونەرى ەدى. بورانباەۆ قايرات – بۇگىنگى كۇنگە دەيىن قازاق مادەنيەتى مەن ونەرىنىڭ دامۋىنا، سونىڭ ىشىندە وسى جولدى ارقالاپ جۇرگەن ونەر وكىلدەرىنە اركەز قامقورشى بولىپ قانا قويماي، كەرەك كەزىندە قارجىلاي كومەك بەرگەن قامقورشى-مەتسەنات ەدى. وسى ازاماتتىڭ كومەگىمەن قانشاما جاس تالانت وزدەرىنىڭ بيىگىنە كوتەرىلە ءبىلدى. قانشاما ونەر مايتالماندارى جەكە كونتسەرتتەرىن، جەكەە البومدارى مەن بەينە كليپتەرىن جارىققا شىعاردى. جاس بۋفىننىڭ جوعارعى ءبىلىم الۋىنا، كوپتەگەن اتا-انانىڭ تۇرمىس-تىرشىلىگىنىڭ قالىپقا كەلۋىنە مۇرىندىق بولدى.

قۇرمەتتى پرەزيدەنت!

بىزدەر، تومەندەگى كورسەتىلگەن ونەر وكىلدەرى – قازىرگى كەزدە باسىنا ءىس ءتۇسىپ، تەرگەلىپ جاتقان بورانباەۆ قايرات سوۆەتايۇلىنىڭ ءىسىنىڭ وبەكتيۆتى اشىق ءارى جەڭىل بولۋىنا قامقورشى بولۋىڭىزدى وتىنە سۇرايمىز. قازاق ونەرىنە قامقورشى بولىپ جۇرگەن ازاماتتارىمىز امان بولسىن!

ءسىز باسقارىپ وتىرعان مەملەكەتىمىزدىڭ بولاشاعى جارقىن، ەرتەڭى ەرەكشە بولاتىنىنا سەنەمىز!

بۇرىنعى پرەزيدەنتتىڭ قۇداسى، ەلدەگى ءىرى كاسىپكەر قايرات بورانباەۆتى الماتىدا قارجى مونيتورينگى اگەنتتىگىنىڭ قىزمەتكەرلەرى 15 ناۋرىزدا ۇستادى. بورانباەۆ سوت شەشىمىمەن ەكى ايعا قاماۋعا الىندى.

«2022 جىلعى 17 ناۋرىزدا نۇر-سۇلتان قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى قايرات بورانباەۆقا قاتىستى ەكى اي مەرزىمگە قاماۋعا الۋ تۇرىندەگى بۇلتارتپاۋ شاراسىن سانكتسيالادى»، - دەلىنگەن ارنايى حابارلامادا.

سوتالدى تەرگەپ-تەكسەرۋدىڭ باسقا دەرەكتەرى قىلمىستىق ءىس جۇرگىزۋ كودەكسىنىڭ 201-بابىنا سايكەس جاريا ەتۋگە ​جاتپايدى.

Abai.kz