قازاقستاننىڭ باس ءمينيسترى
                                                  ءا.ا.سمايىلوۆ مىرزاعا

قۇرمەتتى ءاليحان!

دارەجەڭنىڭ كوتەرىلۋىمەن قۇتتىقتاپ، ەلىمىزگە، حالقىمىزعا قىزمەتىڭ بارشامىزدى ريزا ەتەتىن بولۋىن تىلەيمىن!

«سەن» دەگەنىمە رەنجىمەگىن، وزىمنەن جاسى كىشىلەرمەن سويلەسكەندە، ول كىم بولسا دا، «ءسىز» دەپ سىزىلمايتىن ادەتىم بار.

«باس مينيستر» دەگەنىمدى دە تۇسىنگەيسىڭ. «پرەمەر» – فرانتسۋز ءسوزى، ماعىناسى – «باسشى»، «ءبىرىنشى». جاڭا سپەكتاكلدىڭ ءبىرىنشى رەت كورسەتىلۋى دە «پرەمەرا» دەلىنەدى عوي. ياعني ءوز تىلىمىزدە «باس مينيستر» دەۋ قيسىندى. ال «مينيستەر» – لاتىن ءسوزى، ماعىناسى – يمپەراتوردىڭ، پاتشانىڭ، كورولدىڭ... قىزمەتشىسى; مۇنى قازاق تىلىنە تىقپالاۋعا بولمايدى.

سونىمەن، ءاليحان، بۇل حاتىمدا ايتپاعىم:

1. «جاڭا قازاقستان قۇرۋ» ويىمىزدىڭ اياسىندا كوپتەگەن يگى ىستەردى جوسپارلاۋشى باسشىلارىمىزدىڭ ءبىرىسىڭ. قايسىسى قالاي ورىندالعانىن ۋاقىت كورسەتەر، ال مەنىڭ ازىرشە اڭعارعانىم – ءبىرىنشى كەزەكتە حالىقتىڭ ءال-اۋحاتىن كوتەرۋگە كۇش سالىپ جاتقاندارىڭ. دۇرىس! الايدا، رۋحاني ءومىرىمىزدىڭ وڭالۋىن مۇمكىندىككە قاراي ىلەستىرە ويلاستىرۋ قاجەت. بۇل تۇرعىداعى «اتتەڭدەرىمىزدەن» ءبىر مىسال: تەلە-راديوارنالارىمىزدا بەرىلىپ جاتقان   قازاق كونتسەرتتەرى سوڭعى 15 جىل الەتىندە بەرەكەسىزدەنىپ كەتتى. «ەسكىرمەس ەسكى  اندەرىمىزگە» ۇقساس جانە بىرىنە ءبىرى ۇقساس انسىماقتار، ليريكالىق ءنارى جوق انتەكستىسىماقتار كوبەيدى. عاشىق قىزىمەن حابارلاسا الماي، كورە الماي، ساعىنىپ-سارعايىپ، «ءانىن ارناپ» جۇرگەن، ومىرىندەگى ارماندارىنا قولى جەتپەي جۇرگەن جاس اقىندار از ەمەس ەكەن.

بالا كەزىمىزدەن قۇلاعىمىزعا قۇيىلىپ، سانامىزعا سىڭگەن ەسكى اندەردىڭ اۋەنىن دە، تۇپنۇسقا ولەڭدەرىن دە بۇرمالاپ ايتاتىن دا «انەر» پايدا بولدى. اۋەنىن بۇرمالاۋشىلىقتى حات بەتىندە جەتكىزۋ مۇمكىن ەمەسى تۇسىنىكتى. دەگەنمەن، بىرەۋىنەن حاباردار ەتىپ كورەيىن. ءبىر راديوارنامىز (قايسىسى، قاشان ەكەنى ەسىمدە قالماپتى، باستان-اياق تىڭداۋعا مەنىڭ دە ۋاقىتىم جوق، دەم الۋىم كەرەكتە عانا قول سوزامىن): «ەندىگى تىڭدايتىندارىڭىز – حالىق ءانى «دۋداراي» دەدى. الدەبىر اسپاپتار داڭعىر-دۇڭعىر ەتتى دە، ول تىنا قالىپ: «دۋدا-ا-ار» دەگەن سوزىلىڭقى داۋىس ەستىلىپ، سودان كەيىن شيقىلعا ۇقساستاۋ ءبىر جىڭىشكە داۋىس شىعىپ، ءان باستالدى.  ماريام جاگورقىزىنىڭ ساعىنىش سازدى ءانى  كوڭىلدى انگە اينالىپ جۇرە بەردى. قايىرمالارى قۇبىلتىلا ءۇش رەت قايتالاندى. ءيا، بۇگىنگى انشىلەرىمىزدە ەسكى اندەردىڭ دە، «جاڭا» اندەردىڭ دە «تاڭداۋلى» ءبىر ءسوزىن ون شاقتى رەت، قايىرمالارىن ويناقى ۇنمەن كەمىندە ءتورت رەت ايتاتىن «مودا» بار. وعان ىلىككەندەردىڭ ءبىرى – «بالقاديشا». ءبىر ءانشى «قاراعىم بالقاديشا» دەۋدەن تانبايدى (اقان سەرى ايتپاعان بولسا دا) جانە جاس  انشىلەر: «...كەتتى دەپ بالقاديشا ەستىگەندە، قۇشاقتاپ اتتىڭ جالىن جىلاعانىم»; «...قۇشاقتاپ قۇسجاستىقتى جىلاعانىم»; «...قۇشاقتاپ قارا جەردى جىلاعانىم»; «...قۇشاقتاپ قۇز-جارتاستى جىلاعانىم» دەپ، سونداي-اق: «اينالدىم بالقاديشا»، «جانىم بالقاديشا» دەپ  «جاڭالاپ شىرقاي» بەرەدى.

ءيا، ءان ونەرىمىزدە «زاماناۋي جاڭالىق» اسقىندى. سوناۋ مۇحيتتىڭ           ارعى-بەرگى جاعىنان، ىرگەلەس رەسەيدەن جەتىپ جاتا ما، ايتەۋىر، باج-بۇج       ەتكەن، تاقپاقشا تاقىلداعان، شىڭعىرعان-شاڭقىلداعان «جاڭا اندەرىمىزدى»: دۇڭكىلدەگەن، توڭقىلداعان، تاڭقىلداعان، تارسىلداعان، كۇرسىلدەگەن، الدەنەنى تۇيگىشتەگەندەي دۇڭكىلدەگەن داڭعازا اسپاپتار «سۇيەمەلدەيتىن» بولدى. دومبىرا، قوبىز، سىرناي-كەرنەيىمىزدى جەكە ءانشى-كۇيشىلەردىڭ عانا قولىنان كورىپ ءجۇرمىز.

ءانشى، ءبيشى، كۇيشى قىز-كەلىنشەكتەردىڭ شاشتارىن الدى-ارتىنا جايىپ تاستاپ، ءتىپتى بەتىنىڭ جارتىسىن جابا جالبىراتقانى ازداي، قاۋدىراعان سابان شاشتىلاردىڭ كوبەيگەنىن  كورىپ جۇرگەن بولارسىڭ. شاش سارعايعان زامان كەلگەنى مە؟

بۇرىندا ساحنالارىمىزدىڭ تورلەرى تابيعاتتىڭ نەبىر تاماشا سۋرەتتەرىمەن بەزەندىرىلەتىن ەدى، ول ءداستۇر جوعالدى، ۇلكەن-كىشى ساحنالاردىڭ ءبارى ءتىپتى نە ەكەنىن اڭعارۋ قيىن ايباق-سايباق، جالت-جۇلت، وپىر-توپىر، ايقىش-ۇيقىش ساپىرىلىستى بەينەكورىنىسكە تولدى. ەلەكترشامدار (پروجەكتورلار) ساحنانى دا، زالدى دا وسقىلايتىن بولدى، - ول جۇيكەسى مەن كوزىندە كىنارات بارلارعا وتە زياندى.

سونداي-اق، «حالىق اندەرى» مەن «حالىق كۇيلەرى» كوبەيىپ بارادى. راديوكونتسەرتتى جۇرگىزۋشىلەردىڭ قايسىبىرى: «حالىق ءانى «قاراتورعاي»، «حالىق ءانى «گاۋھارتاس»، «حالىق كۇي» اقساققۇلان»... دەپ جايباراقات حابارلاي سالادى. مۇنداي «جاڭالىق» ەتەك الىپ كەتسە، الداعى جىلدارى بىزدە:  اقان، ءبىرجان، ۇكىلى ىبىراي، مۇحيت، سەگىز سەرى، ەستاي، كەتبۇعا...  بولماعان سياقتانۋى عاجاپ ەمەس. مەنىڭ ويىمشا، قۇرامىندا قازىرگى   كورنەكتى سازگەر، ءانشى-كۇيشى جانە بۇل ونەردى زەرتتەۋشى عالىم بار (4-5 كىسى) كوميسسيا قۇرىپ، ولار اسىقپاي، بايىپتاپ ساراپتاسا، «حالىق ءاندىرىنىڭ» كوبىنىڭ اۆتورىن انىقتاۋعا بولار ەدى. كەزىندە اۆتورى سەلقوستىقپەن ەلەنبەي قالعان سوڭ «حالىق ءانى» بولىپ كەتكەن عوي، ايتپەسە ەشبىر حالىق جيىلىپ ءان شىعارعان ەمەس.

تەلەارنالارىمىزدىڭ بىرنەشەۋىندە ۇنەمى كورسەتىلتىن بي اتاۋلىنى دەنى دۇرىستار ورىنداپ ءجۇر دەۋگە بولمايدى. قالاۋىنشا كيىنگەن قىز-كەلىنشەكتەر مەن جىگىتتەر سەكەكتەپ-سەكىرىپ، ىرجالاڭداپ شىعا كەلىپ، ارى-بەرى جۇگىرىپ، توقتاي قالىپ بۇراڭداپ، ەڭكەڭدەپ-شالقاقتاپ، دىرىلدەپ-قالشىلداپ، ءبىرىن ءبىرى كوتەرىپ الىپ ءيىرىپ، ودان سوڭ وتىرا قالىپ، جاتا كەتىپ اۋناي ما-اۋ... ۇستىندە «ءتوسايىلى» مەن «شاپايىلى» عانا بار كەيبىر قىز-كەلىنشەك ساحنانىڭ زال جاق  شەتىنە سەكەڭدەپ بارىپ، دەنەسىن دىرىلدەتە شالقايادى، سىرتبۇرىلا توڭقايادى... ونداي سۇمدىق «ونەردىڭ» شەتى قىلت ەتكەندە  باسقا ارناعا كوشە قوياتىن بولدىق. ءسىرا، ول ارنالاردىڭ يەلەرى شەتەلدىكتەر شىعار دا، بىزدە ولارعا: «بۇلارىڭ بىزگە ۇناڭقىرامايدى» دەر لاج جوق شىعار.

«بۇل شاققان مۇڭىم»، قۇرمەتتى ءاليحان، – «رۋحانيات» اتتى ايدىن داريانىڭ ءبىر ءيىرىمى. باسقالارى: انا ءتىلىمىز، اتا ءدىنىمىز، سالت-سانامىز، ادەت-عۇرپىمىز، ۇلتجاندىلىعىمىز، تىرشىلىك داعدىمىز، اينالامىزدىڭ اجارى...

سان سالا. ءار سالادا ءومىر ۇيلەستىرگەن كاسىبي ۇجىم بولدى دا، ولار شىعارماشىلىق وداققا اينالىپ، جەكە-جەكە شاڭىراق كوتەرىپ، بولاشاعىمىز ءسۇيىنىشتى بولا ءتۇسۋى ءۇشىن ەڭبەك ەتتى. ءالى ەسىمدە: 1996-جىلى ساۋلەتشىلەر وداعىنىڭ مۇشەسى قويشىباەۆ نۇرباقىت دەگەن جىگىتپەن ويدا جوقتا تانىسىپ، اشىق اڭگىمە بارىسىندا: «الماتىنىڭ قۇرىلىسىندا شىعىس ساۋلەتىن تانىتقان ەشتەڭە جوق. وپەرا جانە بالەت تەاترىمىز بەن ورتالىق مۇراجايدىڭ ماڭدايالدى بولماسا، وزگەلەرى ىرىپانەل قابىرعالاردان قۇراستىرا سالعان تۇربالار مەن قوراپتار دەرسىڭ. ولاردى ەلىمىزدىڭ ەندىگى باس قالاسى بولماق اقمولاعا الا بارماڭىزدارشى، وسىندا قالسىنشى! استانا كورگەننىڭ كوڭىلىن كونشىتەتىن شىعىستىق ساۋلەت ورداسى بولعاي!» دەدىم. نۇرباقىت ءسال جىميىپ، باسىن يزەپ: «ءسىز كورگەنىڭىزدى ايتتىڭىز. دۇرىس. قارسى ءسوزىم جوق. الماتى قالاسىنىڭ ەڭ باستاپقى جوباسىمەن تانىسۋ ويىڭىز بولسا، ءبىزدىڭ وداققا كەلىڭىز، كورىڭىز. ول جوبامىز، امال نە، قۇرىلىس كەزىندە وزگەرىسكە ۇشىرايدى. مىسالى، اناۋ سورايعان «قازاقستان» مەيمانحانامىز، اباي داڭعىلى باستالعان تۇستاعى جاپىرايعان مادەنيەت سارايىمىز، تاعى باسقالارى. ماسكەۋدە جىلارا ساۋلەتشىلەردىڭ وداقتىق كونكۋرس بولادى، سوندا وتپەي قالعان عيمارات جوبالارى رەسپۋبليكالارعا تىقپالانادى» دەدى. «كىم تىقپالايدى؟ كىم قابىلدايدى؟» دەدىم. «ماسكەۋ مەن لەنينگرادتىڭ ساۋلەتشىلەرى  تىقپالايدى، جولىن تاۋىپ. ديمەكەڭ، قوناەۆ جولداس، قابىلداتتىرادى. استانادا دا سولاي بولادى-اۋ، كىم ءبىلسىن».

نۇرباقىتتىڭ كۇدىگى بەكەر بولمادى. پرەزيدەنت ن.نازارباەۆتىڭ قۇزىرىنداعى استانا قۇرىلىسىنا دا شىعىس ساۋلەتى كەرەك بولمادى.

ول ول ما... 1994-جىلدىڭ كوكتەمىندە بولار، ن.نازارباەۆ اقش-قا العاش بارىپ كەلگەنەن كەيىنگى ءبىر سوزىندە وندا شىعارماشلىق وداق دەگەن جوق، مىسالى، جازۋشىلار گازەت-جۋرنال كورپوراتسيالارىمەن بايلانىستا ەكەن، ءوز كۇندەرىن وزدەرى كورەدى» دەدى. بىرەر ايداڭ ءبىزدىڭ: جازۋشىلار، جۋرنالشىلار، سۋرەتشىلەر، ساۋلەتشىلەر، سازگەرلەر... وداقتارى مەملەكەتتىك بيۋدجەتتەن شەتتەتىلدى. باسقاسىن بىلمەيمىن، ءوزىم 30 جىلىمدى وكىنىشسىز وتكىزگەن جازۋشىلار وداعىمىز سودان بەرىدە «ءوز كۇنىن ءوزى كورىپ»، اتى باردىڭ از-اق الدىندا. قاراماعىنداعى گازەت-جۋرنالدارى قالت-قۇلت حالدە.

رۋحانياتىمىزدان الپەتى، مىنە وسىنداي.

2. حالىقارالىق ءسيونيمنىڭ كۇشىمەن ىدىراتىلعان سوۆەت وداعىندا بيلىك پەن حالىقتى تۇراقتى بايلانىستىراتىن قاراپايىم ءتارتىپتىڭ ءبىرى – قاي مەكەمەگە، كىمگە بولسىن كەلگەن حاتقا اپتادان اسىرماي جاۋاپ بەرۋ ەدى. ونى، مىسالى، شىعىس قازاقستان وبلىستىق «كوممۋنيزم تۋى» (قازىرگى «ديدار») گازەتى رەداكتسياسىنا جۇمىسقا ورنالاسقانىمدا (1958-جىلى) ءبىلدىم. رەداكتسيانىڭ «حات ءبولىمى» ءوزى تىركەپ تاپسىرعان حاتقا جاۋاپ قايتارۋدى 4-5 كۇن وتە بەرە تالاپ ەتەدى ەكەن. ال گازەتتە سىن ماقالا جاريالانعان كۇنى وبلىستىق پارتيا كوميتەتىنىڭ ۇگىت جانە ناسيحات بولىمىنەن قوڭىراۋ شالىنىپ، ماقالانىڭ ءتيىستى تەكسەرۋ ورنىنعا جىبەرىلۋى قاداعالانادى ەكەن. سول ءتارتىپتىڭ ناتيجەسىندە گازەتتىڭ بەدەلى كۇشتى بولدى. باسشىلاردىڭ سالعىرتتىعى، نەمكەتتىلىگى، وراشولاقتىعى سالدارىنان كولحوزدىڭ، سوۆحوزدىڭ، ونەركاسىپ-قۇرىلىس توراپتارىنىڭ قاي شارۋاسى شاتقاياقتاپ جاتقان جونىندە قاققان دابىلى جەتۋى ءتيىس قۇلاقتارعا تەز جەتكەنىنە، ويى ورىندالعانىنا حات يەلەرى دە رازى بولادى. ال تاۋەلسىزدىك بۇيىرىسىمەن، وكىنىشكە قاراي، ول ءتارتىپ كەرەك بولماي قالدى.

ءسال شەگىنىس جاساپ ايتايىن: بۇگىندە كەراۋىزدار جاماندايتىن كەڭەس داۋىرىندە مادەنيەت مينيسترلىگىندە «كوركەمدىك كەڭەس» بولدى دا، ەشبىر جاڭا ءان، بي، كۇي، سپەكتاكل ونىڭ قۇپتاۋ شەشىمىنسىز ساحنا بەتىن كورە المايتىن. شىعارمانىڭ كوركەمدىك ساپاسى جوعارى، جاڭا لەبى بولۋى تالاپ ەتىلەتىن. ول كەڭەس تە تاراتىلىپ، ساحنا مەن تەلە-راديوارنالارىمىز اشىق-شاشىق جاعدايعا تاپ بولدى. مينيسترلىكتە «تاۋەلسىز انوڭدەگىشتەر بريگاداسى» قۇرىلعان سەكىلدى.

رۋحاني ومىرىمىزدەگى وسىناۋ وكىنىشتەردى دالەلدەپ ماقالا جازۋمەن قاتار: مادەنيەت جانە سپورت مينيسترلەرى ا.مۇحامديۇلىنا (2014-جىلى), ا.رايىمقۇلوۆاعا (2018-جىلى), باس مينيستر ا.مامينگە (2020-جىلى) حات جولدادىم. حابار وشارسىز كەتتى. ونى ايتامىن-اۋ،  بىلتىر شىلدە ايىنىڭ     13-ءى كۇنى: پرەزيدەنت ق.توقاەۆ، پرەمەر-مينيستر ا.مامين، پارلامەنت سەناتىنىڭ توراعاسى م.اشىمباەۆ، ءماجىلىس توراعاسى ن.نىعمەتۋللين مىرزالارعا حات اتتاندىردىم. مازمۇنى: پەتروپاۆل مەن پاۆلودار قالالارىنىڭ ءاۋ باستاعى قازاقشا اتتارىن قايتارۋ، اقمولا قالاسى اتىن بۇرىنعى قالپىنا كەلتىرۋ تاريحىمىزدى سيلاۋدىڭ ءبىر نىشانى بولارىن ەسكەرۋ. ول كونە قالالارىمىزدىڭ قاشان، قالايشا اتالعاندارىن دەرەكپەن دالەلدەدىم. بىراق، نە شارا، ول حاتىم دا قۇمعا قۇيىلعان سۋ بولدى. تورتەۋىنىڭ ەڭ بولماسا بىرەۋىنەن «سالەم» كەلمەدى.

ن.نازارباەۆقا دا 30 جىلدا ون شاقتى حات جازعانمىن. وزىمە ەشتەڭە سۇراعان ەمەسپىن. حالىق مۇددەسىنە، قوعام سيپاتىنا كەرەعار ىستەر بولىپ جاتقانىن حابارلاپ، تۇزەتۋىن ءوتىندىم. «سىزگە ارناپ جازسام دا، جاۋاپ قايتارىلماعان  الدىڭعى حاتتارىمنىڭ مازمۇندارى مىناداي ەدى، - دەپ قىسقاشا ءمالىم ەتىپ: - بۇل – سوڭعى حاتىم. ەندى مازالامايمىن» دەدىم. 2017-جىلى جاعان ول حاتىم «كەشىرىمنىڭ كىناسى نە؟» دەپ اتالعان. سەمەي پوليگونىن جابۋدى سەمەيلىكتەردىڭ اتىنان تالاپ ەتە م.گورباچەۆقا 1989-جىلى اقپاندا جەدەلحات جولداعان، پوليگوننىڭ جابىلۋىنا بىردەن-ءبىر سەبەپشى بولعان ازامات، مەملەكەت جانە قوعام قايراتكەرى، سەمەي وبلىستىق پارتيا كوميتەتىنىڭ 1-حاتشىسى كەشىرىم بوزتاەۆتىڭ تاريحي ەڭبەگىن كەشىرىم قايتىس بولعان سوڭ مانسۇقتاي باستاعان اتاققۇمار اقىن ولجاس سۇلەيمەنوۆتىڭ تەرىس قىلىقتارىن اتاپ: «كەشىرىمنىڭ كىم بولعانىن سىزدەن جاقسى بىلەتىن ەشكىم جوق. «پوليگوندى ءبىز جاپتىق! مەن جاپتىم!» دەپ جۇرگەن دوسىڭىزعا: «شىندىقتى بۇرمالاۋىڭدى توقتات!» دەمەيسىز بە؟» دەگەنمىن. «سوڭعى حاتىم» دەگەن سوڭ با، ايتەۋىر، پرەزيدەنت اپپاراتىنان جاۋاپ كەلدى. كىم قول قويعانى ەسىمدە قالماپتى. «نۇرەكەڭ ءسىزدىڭ حاتتارىڭىزدى وقىپ، قۇپتاپ وتىرادى» دەپ باستاپ، «الاي عوي دا بىلاي عويلاپ»، ماعان كەرەگى جوق سوزدەردى سۋسىلداتىپتى.

«قايدا ءوتىنىش، ۇسىنىس، ارىز-شاعىم جازسام دا، جاۋاپ كەلمەيدى» دەگەندى ءجيى ەستيمىن. مەنىڭشە، قالا اكىمدىگىنەن پرەزيدەنت كەڭسەسىنە دەيىن جوعارى لاۋازىمدىلار اپپارات بار دا، جەتكەن حاتتار ودان ارىدا سولاردىڭ باعىتتاۋىمەن  تاراتىلادى. تىكەلەي پرەزيدەنتتىڭ، ءمينيستردىڭ تانىسۋى قاجەت بولسا دا، تومەنگە سىرعىتىلا سالاتىن سەكىلدى. ونداي توڭمويىندىقتان  ارىلۋدىڭ جولى بار ما؟ ال جۇرتشىلىقتان كەلگەن حاتقا ءبىر اپتا ىشىندە جاۋاپ قايتارۋدى بارشاعا مىندەتتەيتىن ۇكىمەتتىك رەسمي شەشىم قاجەت.

3. تۇرمىستىق قىزمەت تۋرالى. «جەكەمەنشىك پاتەرلەر كووپەراتيۆى» (جپك – كسك. كووپەراتيۆ سوبستۆەننىح كۆارتير) تاراتىلاتىن، كوپقاباتتى ءاربىر ءۇي تۇرعىندارىنىڭ ۇيعارۋىمەن 1 كىسى  باسشى ەتىلىپ، ايلىقاقىنى تۇرعىنداردان الاتىن، وعان سول ءۇيدىڭ تۇرمىستىق قىزمەت كورسەتۋ تۋرالى تالاپ-تىلەگىن وتەۋدى ۇيىمداستىرۋ جۇكتەلەتىن بولىپتى. مينيسترلىك دەڭگەيىندە ماقۇلدانعان ول ماسەلە ۇكىمەتتىڭ  بەكىتۋىنە تاپسىرىلىپتى، شىلدە ايىندا ىسكە اسادى، دەگەندى ەستىدىم. سەنگىم كەلمەيدى. نەگە؟ تۇرمىستىق قىزمەت كورسەتۋ ماماندارى جپك-نىڭ شتاتىندا بولدى. مىسالى، مەنىڭ پاتەرىمدە جىلۋ باتارەياسى، نەمەسە سۋىق سۋ، ىستىق سۋ كراندارى، ەلەكتر تەتىكتەرى، ت.ب. بۇلىنە قالعاندا جپك-عا تەلەفون شالا قوياتىنمىن دا، كومەك دەرەۋ كەلەتىن. ەگەر سان-تەحنيك، ەلەكتريك الدىڭعى شاقىرۋمەن باسقا ۇيگە كەتكەن بولسا، جپك كەزەكشىسى وعان قالتاتەلەفونى ارقىلى مەنىڭ ءادرىسىمدى ايتاتىن. جەكە ءۇي باسشىسى ەندى ول مامانداردى قايدان ىزدەيدى جانە  جوندەۋاقىسىن كىم تولەيدى؟ پاتەر يەسىنىڭ قالتاسىن ەسەلەپ قاعۋ بولماي ما؟ مەنىڭشە، جپك-ءنى جابۋ پاتەر يەلەرىنىڭ جۇيكەسىن شاباقتايتىن «رەفورما» بولادى. بۇعان دا كوڭىل اۋدارۋىڭ كەرەك، دەپ بىلەم.

سالەممەن،

عابباس قابىشۇلى، قارت جازۋشى

Abai.kz