ادىلەت ءمينيسترى قانات مۋسين مەملەكەت باسشىسى ۇسىنعان جاڭا كونستيتۋتسيالىق تۇزەتۋلەر بويىنشا كىمنىڭ مەملەكەتتىك قىزمەتكە سايلانا المايتىنىن ايتتى، دەپ حابارلايدى Zakon.kz سايتى.

پارلامەنت وتىرىسىندا پرەزيدەنت قاسىم-جومارت توقاەۆ «مەملەكەت باسشىسى بارلىق ازاماتتار ءۇشىن مۇمكىندىكتەر تەڭدىگىنىڭ مىزعىماس كەپىلى بولۋى ءتيىس", - دەدى.  سونداي-اق، پرەزيدەنتتىڭ جاقىن تۋىستارىنا ساياسي مەملەكەتتىك قىزمەتكە جانە كۆازيمەملەكەتتىك سەكتور باسشىلىعىنا سايلانۋىنا زاڭ تۇرعىسىنان تىيىم سالۋ قاجەت ەكەنىن ايتتى.

قوعامدا وسى كونستيتۋتسيالىق تۇزەتۋلەرگە قاتىستى تالقى بولىپ، جۋرناليستەر ادىلەت مينيسترلىگىنە «مەملەكەت باسشىسىنىڭ تۋىستارى ديپلوماتيالىق كورپۋستاعى ساياسي قىزمەتىن جالعاستىرا الا ما؟»، دەگەن سۇراق جولدادى.

وسى سۇراق بويىنشا جاۋاپ بەرگەن ادىلەت ءمينيسترى قانات مۋسين - مەملەكەت باسشىسى پرەزيدەنتتىڭ جاقىن تۋىستارى ساياسي مەملەكەتتىك لاۋازىمداردى اتقارماۋى كەرەكتىگىن ناقتى ايتىپ، بۇل نورمانى كونستيتۋتسيادا بەكىتۋدى تاپسىرعانىن مالىمدەدى.

«اتالعان تىيىم كونستيتۋتسيالىق تۇزەتۋلەر جوباسىنا ەنگىزىلدى. تۇزەتۋلەر قابىلدانىپ، كۇشىنە ەنگەن كەزدە قانداي دا ءبىر لاۋازىمدى قىزمەتتى اتقارۋ مۇمكىندىگى ەكى فاكتورعا بايلانىستى بولادى.  ولار: تۋىستىق قاتىناستىڭ زاڭمەن انىقتالۋى جانە لاۋازىمنىڭ كونستيتۋتسيادا بەلگىلەنگەن ساناتتارعا جاتقىزىلۋى. ارينە، وسى ەكى شارت تولىق ورىندالعان كەزدە تىيىم سالۋ جۇزەگە اسادى»، -دەدى قانات مۋسين.

ءمينيستردىڭ ايتۋىنشا، بۇل نورما مەملەكەت باسشىسىنىڭ جاقىن تۋىستارىنا عانا قاتىستى بولماق. ماسەلەن، "نەكە (ەرلى-زايىپتىلىق) جانە وتباسى تۋرالى" قر كودەكسىنە سايكەس جاقىن تۋىستار دەگەنىمىز - اتا-انا، بالالار، بالانى اسىراپ الۋشىلار، اسىراپ الىنعان بالالار، اتا-اناسى ءبىر جانە اتا-اناسى بولەك اعا-ءىنىلى مەن اپا-سىڭلىلەر، اتا-اجەلەر، نەمەرەلەرى.

مۋسين سونداي-اق، ساياسي لاۋازىمدار قر پرەزيدەنتىنىڭ 2015 جىلعى 29 جەلتوقسانداعى № 150 جارلىعىمەن بەكىتىلگەن ساياسي جانە اكىمشىلىك مەملەكەتتىك قىزمەتشىلەر لاۋازىمدارى تىزىلىمىندە كورسەتىلگەنىن اتاپ ءوتتى. ولارعا پرەزيدەنتكە ەسەپ بەرەتىن ورتالىق مەملەكەتتىك ورگاندار مەن مەملەكەتتىك ورگانداردىڭ باسشىلارى، پرەزيدەنت اكىمشىلىگى مەن پرەمەر-مينيستر كەڭسەسىنىڭ باسشىلارى، وبلىستاردىڭ، قالالاردىڭ، اۋدانداردىڭ اكىمدەرى، توتەنشە جانە وكىلەتتى ەلشىلەر جانە باسقا دا بىرقاتار لاۋازىمدار كىرەدى.

كۆازيمەملەكەتتىك سەكتورداعى باسشىلىق لاۋازىمدار دەگەنىمىز - قۇرىلتايشىسى، قاتىسۋشىسى نەمەسە اكتسيونەرى مەملەكەت بولىپ تابىلاتىن مەملەكەتتىك كاسىپورىنداردىڭ، ۇلتتىق باسقارۋشى حولدينگتەردىڭ، ۇلتتىق كومپانيالاردىڭ باسشىلارى، - دەپ ءسوزىن تۇيىندەدى مۋسين.

Abai.kz